Փաստ ինֆո

Պրոբացիայի ծառայության մասին ՀՀ օրենքի նախագիծն արդեն պատրաստ է, և հոկտեմբերի 21-ին Արդարադատության նախարարությունը պաշտոնապես կներկայացնի հանրությանը: Այս մասին այսօր «Փաստինֆո»-ի հետ զրույցում հայտնեց ՀՀ փաստաբանների պալատի փոխնախագահ Արթուր Հովհաննիսյանը` հավելելով, որ միաժամանակ կներկայացվեն նաև այն օրենսդրական նախաձեռնությունները, որոնցում ևս փոփոխություններ են կատարվել` կապված պրոբացիոն ծառայության ներդրման համար իրավական հիմքերի ստեղծման անհրաժեշտությունից:

Մեր զրուցակիցը հիշեցրեց նաև, որ շրջանառության մեջ դրված նոր Քրեական օրենսգրքի նախագծում նախատեսվել են նաև նոր պատժատեսակներ, որոնք կկիրառվեն պրոբացիոն ծառայության կողմից: Մեր հարցին, թե կոնկրետ ինչ նոր պատժատեսակներ են ամրագրվել օրենսգրքով Արթուր Հովհաննիսյանը պատասխանեց. «Բոլորն անգիր չնշեմ, բայց, օրինակ հանրային աշխատանքի պատճատեսակը, որ նախատեսված է նաև քրեական օրենսգրքւմ, արդեն կլինի ոչ թե ազատըազրկմանն այլընտրանք և կպահանջվի պատիժը կրողի համաձայնությունը, այլ նախագծով արդեն դիտարկվում է որպես առանձին պատժատեսակ, արդեն նախատեսված է հատուկ մասի սանկցիաներում, և այստեղ դատարանն այլևս կաշկանդված չի լինի այդ պատիժը նշանակել` սպասելով անձի համաձայնությանը»:

Արթուր Հովհաննիսյանը նշեց, որ հարկադիր աշխատանքի հետ կապված որոշակի խնդիրներ կարող են ծագել գործող Սահմանադրության պարագայում, բայց և հավելեց, որ նոր սահմանադրության նախագիծն այս հարցի լուծումն առջարկում է: «Նախագծում ասվում է, որ դատապարտյալի կողմից կատարվելիք աշխատանքը չի դիտվում որպես հարկադիր աշխատանք»,- ասաց նա:

Քրեական օրենսգրքով նախատեսված նոր պատժատեսակներից Փաստաբանների պալատի փոխնախագահը նշեց նաև ազատության սահմանափակում, հանրային իրավունքների սահմանափակում, ծնողական իրավունքներից զրկելու պատժատեսակները:

«Պետք է հասկանանք, թե նոր ստեղծվող պրոբացիան ծառայությունն ինչպես է կիրառելու այս նոր պատժատեսակները»,- եզրափակելով զրույցը նշեց մեր զրուցակիցը: