Փաստ ինֆո

Ընդդեմ իր դեմ հարուցված քրեական գործը կարճելու որոշումը վերացնելու՝ դատախազի որոշման փաստաբան Նիկոլայ Բաղդասարյանի բողոքի գործով այսօրվա դատական նիստում փաստաբանը դատարանին ներկայացրեց նախադեպային որոշումներ: Դրանց համաձայն,  ստորադաս դատախազի որոշման դեմ վերադաս դատախազին ներկայացված բողոքը քննվել է ու որոշում կայացվել:  Մինչդեռ  Ն.Բաղդասարյանի  դեպքում դատախազը մերժել է քննել բողոքն՝ ընդգծելով, որ ինքը դրա իրավունքը չունի: Ն.Բաղդասարյանը  տարակուսանք հայտնեց իր նկատմամբ նման տարբերակված վերաբերմունքի կապակցությամբ:

Նիկոլայ Բաղդասարյանի ներկայացուցիչները, մասնավորապես, փաստաբան Սամվել Ջաղինյանը Շենգավիթ վարչական շրջանի դատարանի՝  նախագահող դատավոր Ալեքսանդր Ազարյան,  ուշադրությունը հրավիրեց ոչ ստանդարտ իրավիճակի վրա՝  երկու դատարաններում, երկու դատավորների մոտ գտնվում են Նիկոլայ Բաղդասարյանի բողոքներն ըստ էության նույն հարցի շուրջ, և եթե տեսականորեն մի դատարանը բավարարի բողոքը, մյուսը՝ մերժի, իրավական կազուս է առաջանալու:

Բողոքներին առնչվող այս և այլ հարցերի քննարկումը կշարունակվի արդեն հաջորդ դատական նիստում:

Հիշեցնենք, որ փաստաբանին մեղադրանք է առաջադրվել ՀՀ քրեական օրենսգրքի 144-րդ հոդվածով՝ անձնական կամ ընտանեկան կյանքի մասին տեղեկություններ ապօրինի հավաքելը, պահելը, օգտագործելը կամ տարածելը:

2-3 տարի առաջ  դատական գործընթացի շրջանակում Ն.Բաղդասարյանը՝  ներկայացնելով ամբաստանյալի շահերը,  միջնորդել է հարցում ուղարկել համապատասխան բուժհաստատություն՝ պարզելու, թե արդյոք անձը, ում ցուցմունքը դրվել է  իր պաշտպանյալի մեղադրանքի հիմքում, տառապո՞ւմ է հոգեկան հիվանդությամբ, թե՝ ոչ: Դատարանը բավարարել է միջնորդությունը, պարզվել է, որ անձը տառապում է որոշակի հոգեկան  հիվանդությամբ:  

Քրեական գործը որոշակի ճանապարհ է անցել. նախ  քննչական մարմինը  որոշել էր քրեական գործ չհարուցել, ապա  Երևանի դատախազը վերացրել էր քրեական գործ չհարուցելու որոշումը,  որոշում էր  կայացվել քրեական գործ հարուցելու մասին, սակայն ավելի ուշ քրեական գործի վարույթը կարճվել էր: Այս անգամ էլ Շենգավիթ վարչական շրջանի դատախազի տեղակալն էր վերացրել  քրեական գործի վարույթը կարճելու որոշումը:

 Ն.Բաղդասարյանը սկզբնապես բողոք էր ներկայացրել դատարան  վերջին՝  Շենգավիթի դատախազի տեղակալի որոշման դեմ, որով վերացվել է քրեական գործի վարույթը կարճելու որոշումը: Բողոքի քննության ընթացքում Նիկոլայ Բաղդասարյանն ու իր ներկայացուցիչները հայտնաբերել էին, որ քրեական գործ չհարուցելու որոշումը վերացնելու որոշում կայացնելիս Երևանի դատախազը խախտել է օրենքով սահմանված ժամկետը, այսինքն՝  ժամկետանց որոշում է կայացրել, ուստի այդ  հիմքով  բողոքը լրացվել էր:

Բացի այդ Ն.Բաղդասարյանը բողոք էր ներկայացրել նաև  Երևանի Կենտրոն և Նորք-Մարաշ վարչական շրջանների դատարան՝  Երևանի դատախազի հիշյալ որոշման դեմ,  այն  արդեն ընդունվել  է  դատարանի դատավոր Մեսրոպ Մակյանի վարույթ:

«Փաստինֆո»-ի լրագրողի հետ զրույցում Ն.Բաղդասարյանի ներկայացուցիչ, փաստաբան Լուսինե Սահակյանը   նշեց, որ ըստ էության Շենգավիթի դատարանը կաշկանդված չէ,  որպասզի երկու որոշումների մասով էլ կայացնի դատական ակտ, և դա կլինի շատ ճիշտ լուծում: Կամ եթե Կենտրոնի դատարանը կայացնի որոշում, որից հետո նոր Շենգավիթի  դատարանը կայացնի որոշում, էլի կարծես թե խնդիրը կլուծվի: Սակայն  այդուհանդերձ, ըստ Լ.Սահակյանի,  երկու որոշումներն էլ պետք է քննվեին մեկ դատարանում՝  մեկ դատավորի կողմից և կայացվեր դատական ակտ: