Փաստ ինֆո

Գործարար Սիլվա Գալստյանի սպանության գործով այսօրվա դատական նիստում գործարարի Ձորաղբյուրի առանձնատան պահակը հայտնեց, որ գործարարի՝  սպանության մեջ մեղադրվող թոռը դեպքի օրը եկել է ամառանոց, սակայն այնտեղ չի գիշերել:  Ի պատասխան դատարանի ճշտող հարցի, նա հայտնեց, որ մինչ այդ նա երկու ամիս բնակվել է ամառանոցում և այնտեղ էլ գիշերել է: Պահակը հայտնեց նաև, որ ամբաստանյալը դեպքի օրը ամառանոցից հեռացել է ոչ մուտքի դռնով, այլ ցանկապատի կամ ավտոտնակի տանիքի վրայով  անցնելու միջոցով:

Դատավարության մասնակիցների հարցերին, թե գործարար տատը վախենո՞ւմ էր թոռանից և թե արդյո՞ք ամբաստանյալը  մոլախաղերով  էր զբաղվում, վկան պատասխանեց՝  «ես ի՞նչ իմանամ», «չեմ կարող ասել»՝ պատասխաններն էապես հակասում էին նախաքննական ցուցմունքում նրա տված պատասխաններին: Մասնավորապես, նախաքննական ցուցմունքում վկան հայտնել էր, որ իր կնոջը տուժողը  ասել է, որ վախենում թոռանից, քանի որ վերջինս, ըստ տուժողի, ընդունակ է ամեն ինչի:  Տուժողը վախենում էր թոռանից, որովհետև վերջինս անպատասխանատու, խաղամոլ  և վատ սովորությունների տեր անձնավորություն է: Տատը զայրանում էր, որ  «անիծվածը չի աշխատում»:

Վկայի նախաքննական ցուցմունքի համաձայն, դեպքի օրը ամբաստանյալը վկայի կնոջն ասել է՝ «իմ անելիքն արեցի, եկա»: 

Այսօրվա դատական նիստում հարցաքննվեցին վկաներ  ամբաստանյալի ու տուժողի հարազատական շրջապատից:

Այսպես,  ամբաստանյալի հոր կինը հայտնեց, որ դեպքի օրը սկեսուրի, այսինքն՝  սպանվածի, հետ պայմանավորվել էր, որ գնալու է վերջինիս տուն, սակայն դռան զանգին ու հեռախոսազանգերին սկեսուրը չէր պատասխանում: Հետագայում, երբ տուժողի դուստրն իր մոտ եղած բանալիի օրինակով  բացել է  տան դուռը, այնտեղ հավաքված վիճակ էր, իրերն այնպես չէին դրված, ինչպես դրվում էին սկեսուրի կողմից:

Վկան հայտնեց, որ ամուսնուց լսել է, որ նրա որդին խաղամոլությամբ է զբաղվում, պարտքեր ունի, սակայն ինքը հարցեր չի տվել, աշխատել է չմիջամտել: Ինչպիսի՞ն են եղել տատի ու թոռան փոխհարաբերությունները հարցին ի պատասխան ամբաստանյալի հոր կինը հայտնեց՝ ամենասիրելի թոռնիկն է եղել:

Վկան բացառեց, որ տատը կարող էր թոռանը ոսկեղեն տար, որպեսզի վերջինս գրավատուն հանձներ ու գումար ստանար:

Ամբաստանյալի հորաքույրն ու տուժողի դուստրը հայտնեց, որ իր մայրը շատ հոգատար, բարի տատիկ էր, թոռան համար ամեն ինչ անում էր:

Դեպքի օրը մայրը սովորական ժամին չէր զանգել, դրա համար հարազատները անհանգստացել էին, իրենց հեռախոսազանգերը մնացել էին անպատասխան: Երբ իր մոտ եղած բանալիի  օրինակով բացեց դուռը ու տեսել, որ մայրը տանը չէ, առաջին պահին ուրախացել է՝ մտածելով՝ երևի տնից դուրս է եկել:  Սակայն իր համար արտասովոր է եղել, որ չի զգացվում մոր օծանելիքի բույրը՝ մայրը    դուրս գալիս օծանելիք էր ցանում: Երբ համոզվել են, որ մայրը տանը չի գիշերել, արդեն սկսել են անհանգստանալ:  Վկան հայտնաբերել է նաև, որ մոր ոսկյա զարդերը չկան: Վկան հաստատեց, որ եղբոր որդին՝ ամբաստանյալը, խաղամոլությամբ էր զբաղվում, նրա պարտքերը վճարվել են, սակայն  ում ՝ իր եղբոր, թե մոր կողմից, ինքը չգիտե:

Վկան հայտնեց նաև, որ իր մայրը թոռան ուսման ու առողջության համար ամեն ինչ կաներ, սակայն այլ նպատակով փող չէր տա՝ հաշվի առնելով, որ թոռն ազարտ սիրում է: Տատը թոռանը չէր վստահում ոչ իր ավտոմեքենան, ոչ էլ իր երևանյան բնակարանի բանալին:

Ամբաստանյալի հորաքրոջ որդին հայտնեց, որ դեպքի օրն ամբաստանյալը մոտ մեկ ժամով եկել է վերջինիս եղբոր ծննդյան հանդիսությանը, ապա գնացել է, ասելով՝ «աղջկա հետ հանդիպման եմ գնում»: Ինքն ամբաստանյալի պահվածի մեջ որևէ արտասովոր բան չի նկատել, սակայն նկատել է, որ Ալբերտի ձեռքն ուռած է: Վկան ևս լսել է, որ ամբաստանյալը զբաղվում էր մոլախաղերով, մասնավորապես, Վիվառոյում խաղադրույքներ անում:

Հիշեցնենք, որ ըստ 24-ամյա Ալբերտ Մոմջյանին առաջադրված մեղադրանքի, նա՝  ժամանակավորապես բնակվելով իր տատ Սիլվա Գալստյանին պատկանող բնակարանում, միասնական հանցավոր մտադրությամբ, շարունակաբար` 2014թ. սեպտոմբերի 1-ից մինչև սեպտեմբերի 15-ն ընկած ժամանակահատվածում գաղտնի հափշտակել է վերջինիս պատկանող խոշոր չափի` ընդհանուր 2.963.000 ՀՀ դրամ արժողության ոսկյա զարդեր:

Այնուհետև` իր կատարած հանցանքը թաքցնելու նպատակով, կյանքի համար վտանգավոր բռնություն գործադրելով` պարանոցի օրգանները սեղմելով, ձեռքերով հարվածներ է հասցրել իր տատին ու նրան դիտավորությամբ ապօրինաբար զրկել է կյանքից, որից հետո գիշերը` իր մեքենայով կնոջ  դին տեղափոխել է Կոտայքի մարզի Գառնի գյուղից դեպի Արտաշատի տարածաշրջան տանող ավտոճանապարհի հարակից տարածք և այրել: