Փաստ ինֆո

 

«Բարգավաճ Հայաստան» կուսակցության «Կենտրոն» տարածքային կազմակերպության խորհուրդը նախօրեի նիստում միաձայն որոշում է կայացրել միջնորդել կուսակցության քաղխորհրդին՝ տարածքային կազմակերպության և կուսակցության քաղաքական խորհուրդների անդամ, Ազգային ժողովի «Բարգավաճ Հայաստան» խմբակցության անդամ, Մարդու իրավունքների պաշտպանության և հանրային հարցերի մշտական հանձնաժողովի նախագահ Էլինար Վարդանյանի կուսակցական լիազորությունները դադարեցնելու վերաբերյալ:  

 

Այս որոշումը կայացվել է՝ հիմք ընդունելով ԲՀԿ կանոնադրությունը: Մասնավորապես՝ հաշվի է առնվել այն, որ Է.Վարդանյանը բոյկոտել է կուսակցության աշխատանքը, խմբակցության նիստերը, հրաժարվել է մարզային հանդիպումներին մասնակցելուց, չի մասնակցել նաև կուսակցության կազմակերպչական աշխատանքներին:

 

ԲՀԿ կանոնադրության համաձայն՝ կուսակցության քաղխորհուրդը պետք է հաստատի կամ մերժի տարածքային կազմակերպության որոշումը:

 

Ինչպես «Փաստինֆո»-ն ավելի վաղ հայտնել էր,  ԲՀԿ խմբակցության որոշմամբ Էլինար Վարդանյանը և Ստեփան Մարգարյանը հետ են կանչվել միջազգային խորհրդարանական կազմակերպությունների հայաստանյան պատվիրակություններից: Այս կապակցությամբ Է.Վարդանյանը հանդես էր եկել հայտարարությամբ, մասնավորապես նշելով. «Ես երբեք չեմ մտածել, որ միջազգային կառույցներում առաջնորդվում են կուսակցության շահերով»: Էլինար Վարդանյանը նաև փաստել է, որ խմբակցության հիշյալ նիստի և որոշման մասին տեղյակ չի եղել և տհաճ անակնկալի է եկել. «Ինձ համար տհաճ անակնկալ էր այն, որ իմ անձի հետ կապված հարցի քննարկում նախատեսող խմբակցության նիստի վերաբերյալ ես տեղյակ չեմ եղել: Ես դա ուզում եմ արձանագրել: Դա ճիշտ մշակույթ չէ»:

 

Ինչ վերաբերում է իր հանդեպ հարազատ կուսակցության ու խմբակցության նման վերաբերմունքին, ապա Էլինար Վարդանյանը թեև հստակ պատճառ չի նշել, բայց որոշակի ակնարկներ արել է: «Խմբակցության մոտեցումները և շահերը իմ կողմից միշտ հաշվի են առնվում: Ես նաև կուսակցության անդամ եմ, և չի եղել մի դեպք, երբ ես անտեսեմ ինձ դիմած որևէ շարքային ԲՀԿ-ականի շահերը, կամ անեմ մի քայլ, որը կուսակցությանը վնաս կպատճառի: Ինչ վերաբերում է քվեարկություններին, ապա ՀՀ Սահմանադրության համաձայն ես առաջնորդվում եմ իմ խղճով և համոզմունքներով»,-ասված էր հայտարարության մեջ:

 

Հիշեցնենք, որ երկու վերոհիշյալ պատգամավորները՝ ի հակառակ խմբակցության դիրքորոշման, դեմ են արտահայտվել Սահմանադրությունում փոփոխությունների նախագծին և չեն մասնակցել ԱԺ-ում հարցի քվեարկությանը:

 

Ըստ ԲՀԿ մամուլի քարտուղար Վահան Բաբայանի՝ այս պահին խմբակցությունը չի քննարկում Էլինար Վարդանյանի և Ստեփան Մարգարյանի՝ ԱԺ հանձնաժողովների նախագահների պաշտոնից հեռացման հարցը, բայց դա չի էլ բացառվում: Նշենք, որ խմբակցության անդամ  Ս.Մարգարյանը, ով ԱԺ Տարածքային կառավարման և տեղական ինքնակառավարման հարցերի մշտական հանձնաժողովի նախագահն է,  «Հզոր Հայրենիք» կուսակցության փոխնախագահն է: