Փաստ ինֆո

Կարեն Անդրեասյանն այսօր ԱԺ-ում  ներկայացրեց  «2014 թվականի ընթացքում ՀՀ մարդու իրավունքների պաշտպանի գործունեության և երկրում մարդու իրավունքների ու հիմնարար ազատությունների խախտման մասին» զեկույցը:

Կարեն Անդրեասյանը հիշեցրեց, որ զեկույցը հրապարակվել էր դեռևս մարտ ամսին, ուստի դրանում նշված 180 խնդիրներից այսօր ԱԺ-ում կներկայացնի միայն 40-ը, քանի որ մնացած 60-ը օրենսդրական խնդիրներ են:

Կարեն Անդրեասյանի նշած խնդիրների թվում էր պետպատվերով տրվող դեղորայքի որակի անբավարարությունը, քանի որ դրանց ձեռքբերման համար հայտարարվող պետական գնումների մասին մրցույթում հաղթում է նվազագույն գին առաջարկողը:

Կրթական համակարգում առկա խնդիրը վերաբերում էր բուհերի ուսանողների ուսման վարձի զեղչային համակարգին: Դրա համար օրենքը սահմանում է «առավել բարձր առաջադիմություն ունեցող ուսանողներ» արտահայտությունը, որիանորոշությունը Կարեն Անդրեասյանի խոսքով, խնդիրներ է ստեղծում:

Դատական համակարգում խնդիր է ստեղծում պետտուրքը: Անգամ փաստաթղթերի պատճենահանման համար գործող 150 դրամը շատ կալանավորների համար անհասանելի է և խնդիրներ է առջացնում սեփական իրավունքները իրացնելու համար:

Կարեն Անդրեասյանն իր զեկույցում անդրադարձել է նաև լրագրողների աշխատանքային գործունեության մեջ հաճախ հանդիպող խնդրին, երբ սահմանափակվում է տեղեկատվության աղբյուրը չբացահայտելու լրագրողի իրավունքը: «Անհրաժեշտ է Քրեական դատավարության օրենսգքրի 86-րդ հոդվածի երկորդ մասը լրացնել դրույթով, որի համաձայն՝ տեղեկատվության աղբյուրը բացահայտելու նպատակով որպես վկա չեն կարող կանչվել ու հարցաքննվել լրատավական գործունեությունն իրականացնողը և լրագրողը՝ բացառությամբ դատարանի որոշման»,- ասաց Անդրեասյանը` հավելելով, սակայն, որ նոր օրենսգրքի ընդունումը կարող է տևական ժամանակ պահանջել, մինչդեռ հարցը հրատապ լուծում է պահանջում:

Օրենսդրական ամրագրում է պահանջում նաև բնակարանի խուզարկության ժամանակ դատարանի համապատասխան որոշման ներկայացումը: Բանն այն է որ երբ քաղաքացին նման պահանջ է ներկայացնում, իրավապահները պատասխանում են, որ նման պահանջ օրենքում չկա: Խնդիր է նաև ազատազրկման դատապարտված անձանց ընտանիքների գոյատևման հարցը, հատկապես` երեխաների, անաշխատունակ անձանց դեպքում: «Գլխավոր դատախազությունը մեզ հետհամաձայն է»,- ասաց Կարեն Անդրեասյանը` հավելելով, որ օրենսդրական կարգավորման վրա աշխատանքներ տարվում են:

Կարեն Անդրեասյանն անդրադարձավ նաև բնակելի շենքերի տակ գործող գիշերային զվարճանքի վայրերին: «Հարյուրավոր մարդիկ տանջվում են այդ աղմուկից ու կռիվներից»,- ասա ՄԻՊ-ը և տեղեկացրեց, որ Երևանի քաղաքապետարանն այս առումով արդեն օրենսդրական կարգավորում է նախաձեռնել, որպեսզի այդ ակումբները չլինեն շենքերի տակ: «Սակայն մենք առաջարկում ենք, որ 50 մետր շառավղով հեռավորության վրա գտնվի, քանի որ կարող է լինել ոչ թե շենքի տակ, այլ հարևանությամբ, իսկ հատկապես ամռան ամիսներին աղմուկը սարսափելի է»,- ասաց օմբուդսմենը:

Զեկույցի համար նախատեսած ժամանակը սպառվեց և Կարեն Անդրեասյանը որոշեց այսքանով ավարտել զեկույցի ներկայացումը` խոստացած 40 խնդիրներից ներկայացնելով միայն 1-2 տասնյակը: