Փաստ ինֆո

Զինվորին զինվորական ծառայությունից ազատելու նպառակով  կաշառք ստանալու, կաշառք տալու ու կաշառքի միջնորդության վերաբերյալ գործով այսօր ցուցմունքներ տվեց կաշառքի միջնորդության մեջ մեղադրվող ամբաստանյալ Ա.Մութաֆյանը:

Ամբաստանյալը հայտնեց, որ կաշառք ստանալու մեջ մեղադրվող,  ՀՀ ՊՆ N զորամասի թերապիայի բաժանմունքի օրդինատոր-գաստրոէնտերոլոգ Ս. Եգանյանը իր գործընկերն է: Ամբաստանյալը հայտնեց, որ իրեն զանգահարել է իր վաղեմի ծանոթը ու խնդրել  օգնել իր բարեկամի որդուն, ում վիճակը լավ չէ, տեղավորել հոսպիտալում:  «Դու էլ ես մայր, խնդրում եմ օգնել»,- ասել է նա: Րոպեներ անց իրեն զանգահարել է  զինվորի մայրը ու հանդիպելով իր հետ հայտնել, որ զինվորը հարազատի հուղարկավորության ժամանակ ուշագնաց է եղել,  «փոքր ժամանակ սրտի արատ է ունեցել, առանց հետազոտություններ անցնելու գնացել է բանակ»: Մայրը խնդրել է բժշկուհուն ծանոթանալ հիվանդության պատմությանը: Ինքն էլ որոշել է օգնել, Եգանյանին  խնդրելով՝ «եթե կարող ես օգնիր, երեխան լավ վիճակում չէ: Պառկեցրեցինք, մի քիչ վիճակը ծանրացրեցինք»,- ասաց ամբաստանյալը:

Մայրը շնորհակալություն հայտնեց,  «վերցրել, տվել եմ ում որ պետք է՝  200 հազար դրամ»: Դատարանի ճշտող հարցին, թե ինչ են   նշանակում  վերջին խոսքերը, ամբաստանյալը հայտարարեց, որ գումարը փոխանցել է Ս.Եգանյանին: Ամբաստանյալը հայտնեց, որ զինվորի մորից ընդհանուր առմամբ ստացել է 480 հազար դրամ, որից 200 հազարը տվել է Ս.Եգանյանին,  60 հազարով օծանելիք է գնել՝ վերջինիս նվիրելու համար, ինչը նվեր է և ոչ թե  կաշառք, ևս 220 hազարից հարյուր հազարը ու 120 հազարով գնված կոնյակն ու կոնֆետի տուփը տվել է ոմն Գրիշայի: Վերջինս պետք է ապահովեր, որ զինվորին հոսպիտալում պահելու հարցում հենց հոսպիտալում ու զորամասում  խոչընդոտներ չառաջանային: Ի դեպ, Գրիշայի մասով գործից մաս է անջատված ու կասեցված:

Ամբաստանյալի հարցաքննությունը կշարունակվի հաջորդ դատական նիստում:

Դատական նիստի ժամանակ զինվորի մայրը, ով ևս ամբաստանվում է այս գործով, բարկացկոտ հայացքներ էր գցում նիստը լուսաբանող «Փաստինֆո»-ի լրագրողի վրա, ապա, դատական նիստի ավարտից հետո,  դատական նիստերի դահլիճից դուրս ամբաստանյալ տիկինը շատ ագրեսիվ պահվածք դրսևորեց՝ հայտարարելով, որ ինքն առարկում է, որ լրագրողը գրի տեսածի ու լսածի մասին, իսկ երբ լրագրողը նրան հանրամատչելի բացատրեց, որ  դռնբաց դատական նիստ է, ոչ ոք չի կարող արգելել լուսաբանել, եթե ցանկանում է, և խորհուրդ տվեց հաջորդ դատական նիստին դիմել դատարանին՝ փակ դռների հետևում  դատավարությունը անցկացնելու միջնորդությամբ, և  այն բավարարվելու դեպքում լրագրողը դատական նիստն  այլևս չի  լուսաբանի: Ամբաստանյալն ի պատասխան  սպառնաց՝ ուրեմն կպատժվեք: