Փաստ ինֆո

Սիրիայի կառավարությունը չի կարողանա ընտրություններ և սահմանադրական բարեփոխումներ անցկացնել, քանի դեռ երկիրը չի հաղթել ահաբեկչությանը:  ТАСС-ի փոխանցմամբ, այս մասին հայտարարել է Սիրիայի Արաբական Հանրապետության ԱԳՆ ղեկավար Վալիդ Մուալլեմը՝ ելույթ ունենալով ՄԱԿ-ի Գլխավոր վեհաժողովի 70-րդ նստաշրջանի շրջանակներում համաքաղաքական քննարկումներում:

ԱԳՆ ղեկավարն ընդգծել է, որ ՍԱՀ կառավարությունը շարունակում է հանդես գալ հակամարտության քաղաքական կարգավորման օգտին: Դրա հիմքում ընկած է «արդեն իր իրավացիությունն ապացուցած կարծիքն առ այն, որ ահաբեկչության դեմ պայքարը գերակա խնդիր է այլ ուղղություններով  առաջընթացի համար»: «Սիրիան չի կարողանա որևէ ժողովրդավարական քաղաքական միջոցներ ձեռնարկել՝  կապված ընտրությունների անցկացման, սահմանադրության  կամ այլ քայլերի հետ, քանի դեռ ահաբեկչությունը     շարունակում է հարվածներ հասցնել մեր հողում և սպառնում է անմեղ բնակիչներին», - ասել է  նախարարը: Ըստ նրա, կառավարությունը չի կարող խնդրել «սիրիական ժողովրդին շարժվել  դեպի քվեատուփերը՝ քվեարկության, երբ անվտանգ չէ գտնվել անգամ փողոցում կամ տանը»: 

Մուալլեմը նշել է, որ Դամասկոսը, ինչպես և նախինում, հավատում է քաղաքական կարգավորման հաջողությանը «բոլորին հայտնի պարամետրերի հիման վրա», որոնք նախատեսում են «ազգային ինքնիշխանության պահպանում, սիրիական տարածքի ու ժողովրդի միասնություն», ինչպես նաև արդեն գոյություն ունեցող իշխանության մարմինների աշխատանքի կատարելագործում:  «Քաղաքական կարգավորման հասնելու միակ ուղին երկխոսությունն է հենց սիրիացիների միջև, առանց որևէ արտերկրյա միջամտության»,- մատնանշել է նա:

ԱԳՆ ղեկավարը հիշեցրել է, որ այդ պարամետրերի հիման վրա սիրիական կառավարությունը համաձայնել է մասնակցել «Ժնև-2» միջազգային համաժողովին, ինչպես նաև ներքին ընդդիմության մասնակցությամբ Մոսկվայում անցկացվող երկռաունդանի խորհրդատվություններին: Եվ հիմա էլ պատրաստ է միանալ Շվեյցարիայում նոր հանդիպման նախապատրաստման գործընթացին:  

«Սիրիան համաձայն է մասնակցել խորհրդատվական չորս հանձնաժողովների փորձագետների աշխատանքներին, որոնք առաջարկել է ստեղծել  հատուկ դեսպան Ստաֆֆան դը Միստուրան: Պրն. դը Միստուրան  բազմիցս  ընդգծել է, որ այդ հանձնաժողովների գլխավոր նպատակը  մտքերի փոխանակությունն  է և որ նրանք կանցկացնեն ազատ նախնական  խորհրդատվություններ, որոնց համաձայնեցված արդյունքները կարող են օգտագործվել «Ժնև-3»-ի նախապատրաստությունը գործի դնելու  համար», - ասել է Մուալլեմը:

Նա  միաժամանակ զգուշացրել է Դամասկոսի ընդդիմախոսներին, որ նրանք չմտածեն, որ «կկարողանան բանակցությունների սեղանի շուրջ հասնել նրան, ինչին չեն կարողացել հասնել մարտի դաշտում»: Ըստ նախարարի, Սիրիայի ապագայի վերաբերյալ որոշումը «սիրիացի ժողովրդի ձեռքերում է, և ոչ ոք չի կարող նրան զրկել այդ իրավունքից»: