Փաստ ինֆո

Երկու տարի առաջ զինծառայող Մանուչար Մանուչարյանի ինքնասպանության գործով այսօր  շարունակվեց  քրեական գործի փաստաթղթերի հետազոտումը:

Մասնավորապես, հետազոտված  փաստաթղթերից էր  քննիչի  կողմից նշանակված  տուժողի հետմահու դատահոգեբանական և դատահոգեբուժական  համալիր փորձաքննության եզրակացությունը: Փորձաքննությունն  ուշացումով է կատարվել,   ինչը հանգեցրել է քրեական գործի  նախաքննության ժամկետների ձգձգմանն ու կողմերի դժգոհությանը:

Այսպես, ամբաստանյալ Արման Ստեփանյանի պաշտպան Նորայր Նորիկյանն այսօր փաստաթղթի հետազոտման ժամանակ հայտարարությամբ  դատարանի ուշադրությունը  հրավիրեց   այն հանգամանքի վրա, որ դեպքը տեղի է ունեցել 2013թ. հուլիսի 31-ին, որից շուրջ 7 ամիս անց է  քննիչը որոշում  կայացրել  հիշյալ  փորձաքննությունը նշանակելու մասին:  Ընդ որում, փորձաքննություն կատարելու համար քրեական գործի նյութերը  փորձագետներին են տրամադրվել ևս  2 ամիս անց:

Պաշտպանը հայտարարեց նաև, որ իր պաշտպանական ճառում ինքն ավելի մանրամասն կանդրադառնա քննիչի աշխատանքի «արդյունավետությանը»՝    ինչպիսի՞ վարկածներ են շրջանառվել, որոնց ձախողման արդյունքում ծնունդ է առել ներկա մեղադրանքը:

Փորձաքննության եզրակացությամբ արձանագրվել է, որ մահացած Մանուչար Մանուչարյանը կյանքի ընթացքում որևէ  հոգեկան հիվանդությամբ չի տառապել, եղել է հոգեպես առողջ: Այս եզրակացությանը փորձագետները հանգել են ընդամենը 3  անձանց, մասնավորապես,  տուժող Լիբիկ Մկրտչյանի և վկաներ Արման Սահակյանի, մասամբ նաև՝ Կարինե Պետրոսյանի ցուցմունքների հիման վրա:

Վկաների ցուցմունքների հիման վրա փորձագետները եզրակացրել են, որ զինծառայության վերջին 40 օրերի ընթացքում  ամբաստանյալների կողմից  սիստեմատիկորեն ծեծի, ստորացումների, նվաստացումների,  ծաղրի և  շահագործման ենթարկվելու  հետևանքով Մանուչար Մանուչարյանի մոտ  վերջին ժամանակահատվածում զարգացել է  «Սուր դեպրեսիվ հակազդում», որն արտահայտվել է  տրամադրության դիսթեմիկ ֆոնով, ընկճվածությամբ, հուսահատությամբ, ստեղծված իրավիճակը անելանելի ընկալելու զգացողությամբ, ինչն  և ամենայն հավանականությամբ  ինքնասպանության   է հանգեցրել:  Փորձագետները գտել են, որ Մանուչար Մանուչարյանը ինքնասպանություն կատարելու պահին  գտնվել է  խիստ հուզական,  ընկճված վիճակում:

Հոգեբանական մասով  փորձագետները հանգել են հետևության, որ ինքնասպանությունը դրդառապատճառային է, սակայն իրենց ներկայացված նյութերում բավարար   տվյալներ  չկան ստույգ որոշելու համար, թե  ինքնասպանությունը ասոցիա՞լ է, թե՞ աֆեկտիվ:

Ըստ փորձագետների՝   ինքնասպանություն կատարելու պահին Մանուչար Մանուչարյանը ամենայն հավանականությամբ չի գտնվել  ֆիզիոլոգիական աֆեկտի վիճակում, նրա մոտ գերակայել են  հուսահատությունը, շփոթվածությունը,   ստեղծված իրավիճակից անելանելիության զգացումը, սթրեսը, որպիսիք էապես ազդել են նրա գիտակցության ու վարքի վրա:

Փորձագետները գտել են նաև, որ Մանուչարյանի կողմից ինքնասպանություն կատարելը հիմնականում, պայմանավորված է ամբաստանյալների հակաօրինական գործողություններով:

Ամբաստանյալ Բաբկեն Գաբոյանի պաշտպան Հրանտ Անանյանն ընդգծեց, որ փորձաքննության եզրակացությունը կազմվել է 3 վկաների ցուցմունքների հիման վրա, սակայն չի էլ գնահատվել մյուս վկաների ցուցմունքներն առ այն, թե ի՞նչ հոգեբանական կամ ի՞նչ հոգեբուժական պատկեր կարող է առաջացած լինել, դա պաշտպանական կողմի համար խիստ անհասկանալի է:

Անելանելի վիճակի վերաբերյալ պաշտպանը նշեց,  որ նախաքննության ընթացքում հարցաքննված վկաներից որևէ մեկը չի նշել,  որ Մանուչարյանը դիմել է որևէ մեկի օգնությանը, ավելին՝  պատճառի և հետևանքի  կապը հստակ պատճառաբանված չէ:

Պաշտպան Նորայր Նորիկյանն էլ իր հերթին դատարանի ուշադրությունը հրավիրեց այն հանգամանքի վրա, որ տուժող Լիբիկ Մկրտչյանը ու հարցաքննված 6 վկաներից  միայն մեկն է նշել, որ մահացած զինծառայողը  դեպքին նախորդող ժամանակաշրջանում եղել է ընկճված, իսկ մյուս վկաները ինչպես նախաքննության,  այնպես էլ դատաքննության ընթացքում հայտնել են, որ Մանուչար Մանուչարյանի վարքագծում ու տրամադրության մեջ որևէ արտառոց բան  չեն նկատել:

Ապացույցների հետազոտումը կշարունակվի հաջորդ դատական նիստում: