Փաստ ինֆո

Սեռական շահագործման նպատակով կանանց թրաֆիքինգի մեջ մեղադրվող Հերիքնազ Խաչատրյանն առաջադրված մեղադրանքում իրեն մեղավոր չճանաչելով՝  այսօր հայտարարեց, որ ինքը սուրբ չի:  «Ես չեմ ասում, որ սուրբ եմ, եթե Գերչին չհանդիպեի, ես էլ մարմնավաճառությամբ էի զբաղվելու, որ փող աշխատեի»,- ասաց նա:

Ամբաստանյալն իր ցուցմունքում նշեց, որ գործով անցնող բոլոր տուժողների այն պնդումները, թե իր միջոցով են շահագործան ենթարկվել,  սուտ են և որ բացի օգնության ձեռք մեկնելուց  ինքը տուժողներին  ոչ մի վատ բան չի արել, նրանց հետ վատ հարաբերությունների մեջ չի գտնվել և չգիտե, թե իր դեմ ինչու են այսպիսի ցուցմունքներ  տվել:

Մինչ տուժողներին անդրադառնալն, ամբաստանյալը նախ իր պատմությունը պատմեց, ըստ որի ինքն է սեռական շահագործման զոհ դարձել, սակայն չգիտես ինչու տարիներ շարունակ այդ մասին չի ցանկացել բարձրաձայնել:

Այս գործով տուժողներից մեկը,  ում հետ նա գտնվել է բավականին մտերիմ հարաբերությունների մեջ,  իրեն առաջարկել է Թուրքիայում իր ծանոթի տանն աշխատել, և 2006թ. ամբաստանյալը մեկնել է Թուրքիա, որտեղ նրա խոսքով իրեն հարկադրել են շուրջ 1,5 ամիս զբաղվել մարմնավաճառությամբ: Ինքը լաց է եղել, հետ պահանջել իր  անձնագիրը, սակայն այն իրեն չեն վերադարձրել և ստիպել են աշխատել, որպեսզի Թուրքիա իրեն տանելու՝  մուտքի վիզայի և ճանապարհածախսի գումարն աշխատի և վերադարձնի:

Ըստ ամբաստանյալի,  «աշխատանքի» դիմաց իրեն  «ոչ մի կոպեկ» չեն տվել, շահագործել են ու առանց գումարի հետ ուղարկել Հայաստան:

Որոշ ժամանակ անց ամբաստանյալը Դուբայ է գնացել՝ իր հետ վերցնելով հայերեն-անգլերեն բառարան, քանի որ օտար լեզվի չի տիրապետել, այնտեղ 2 օր գտնվել է հյուրանոցում,  որտեղ որ «շատ բան չի եղել»: Այն ժամանակ, երբ ինքը  «հլը մարմնավաճառությամբ չի զբաղվել», ինքը իջել է ու նստել հյուրանոցում գտնվող դիսկոտեկում և բարում,  իրեն մոտեցել են տարբեր ազգության տղամարդիկ, բայց քանի որ օտար լեզու չի իմացել,  իր ծառայություններից օգտվել ցանկացողները գնացել են: Եկել է ազգությամբ գերմանացի Գերչն ու ծանոթացել են, ում հետ հետագայում միասին են ապրել:

Ըստ ամբաստանյալի,  Գերչը իրեն անգլերեն է սովորեցրել, իսկ մինչև այդ հարաբերվել են մի կերպ իրար հասկացնելով. «Ինքն ինձ ասում էր, ես հակառակն էի անում, մինչև անգլերեն  սովորեցի»:

Նա հայտնեց, որ  2008թ. իրեն վտարել են Դուբայից,  և ինքն  այնտեղից մեկնել է Մոսկվա, որտեղ մի կին է իրեն օգնել՝  ապաստան ու աշխատանք տվել, և միայն 8 ամիս անց վերադարձել է Հայաստան:

Դուբայում գտնվելու և իր զբաղմունքի մասին,  ըստ ամբաստանյալի, տեղեկացված են եղել մայրը և մի քույրը.  2 անգամ զանգահարել է մորը և այնտեղ բնակվող մի հայ տղամարդու միջոցով երբեմն գումար և նվերներ ուղարկել:

Ամբաստանյալը պնդեց որ քույրը՝ Բավականը, ով սեռական շահագործման նպատակով մարդկանց հավաքագրելու համար  2014թ. դատապարվել է 11,5 տարվա ազատազրկման իր գտնվելու վայրի մասին տեղյակ չի եղել:

Ըստ ամբաստանյալի,  ինքը Դուբայում ծանոթ մարմնավաճառներ չի ունեցել, իսկ թե քույրը ինչ ծանոթներ ունի,   դա նրա  գործն է:

Ամբաստանյալը հերքեց գործով բոլոր տուժողների ցուցմունքներն  առ այն, որ նրանցից 3-ի պնդմամբ Դուբայում իր գտնվելու ժամանակ հեռախոսային զրույց է ունեցել նրանց հետ և առաջարկել տանել Դուբայ՝  մարմնավաճառությամբ զբաղվելու:   «100 տոկոս անմեղ եմ»,-  ասաց ամբաստանյալը:

Իր և  իր քրոջ՝ Բավականի,  առերևույթ վատ հարաբերությունների վերաբերյալ այսօր էլ ամբաստանյալը փորձեց այնպիսի տպավորություն ստեղծել, որ քույրերով տարիներ շարունակ միմյանց հետ վատ հարաբերությունների մեջ են եղել:

Այս պնդումներից հետո ամբաստանյալը հանկարծակի ասաց, որ Օմանում գտնվելու ժամանակ,  երբ տեղեկացել է, որ քույրը «բռնվել» է,   խնդրել է Գերչին իրեն օգնել Հայաստան վերադառնալ: Օրեր անց Հայաստան է վերադարձել ու պարզել, որ քույրը «դատված է»:

Ամբաստանյալի հայտարարությունից կարելի է ենթադրել, որ քրոջ գործով նախաքննությունը և դատաքննությունը տևել է ընդամենը մի քանի օր: ՝

Ըստ ամբաստանյալի, իր համար անհասկանալի է, թե քույրն  ինչու է իր անունը տվել նախաքննության ընթացքում, մասնավորապես, ասել, որ ինքն օգնել է քրոջը կանանց հավաքագրելու գործընթացում:

Ամբաստանյալը հայտնեց նաև, որ  այս տարիների ընթացքում ինքն  ունեցել է 4 անձնագիր,  պարբերաբար անձնագիրը  փոխել է: Ինքը  չի ցանկացել, որ  որևէ մեկը տեսնի անձնագրերում առկա կնիքներն առ այն, որ  ինքը գտնվել է Թուրքիայում  և Դուբայում:

Դատարանն  այսօր բավարարեց պաշտպանական կողմի միջնորդությունը՝ մինչև դատաքննության  ավարտը դատարան հրավիրել և հարցաքննել մի քանի վկաների: