Փաստ ինֆո

Հասարակական ուշադրության կենտրոնում հայտնված քրեական գործերով նախաքննական մարմիններն ու հատկապես դատախազությունը ավելորդ դաժանություն ու խստություն են ցուցաբերում, հնարավորինս ծանր մեղադրանքներ առաջադրում, խիստ պատիժներ միջնորդում, որպեսզի հասարակության մոտ թյուր կարծիք ստեղծվի, իբր, այդ մարմիններն օբյեկտիվ են ու անաչառ, որպեսզի դրանով հասարակության շրջանում հեղինակություն ձեռք բերեն: Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում հայտարարեց Վերնիսաժի գործով անբաստանյալ, ԱԺ պատգամավոր Կարո Կարապետյանի (Յուվեցի Կարո) փեսա, Գոռ Առաքելյանի պաշտպան Երեմ Սարգսյանը:

«Ապօրինաբար կյանքից զրկելու դիտավորությամբ, խուլիգանությամբ, անհարգալից վերաբերմունք է դրսևորել անցորդների նկատմամբ և իր կամքից անկախ հանցագործությունն ավարտին  չի հասցրել»,- քրեական գործի հարուցման մասին քննիչի որոշումից մեջբերեց Երեմ Սարգսյանն ու անցավ հիմքերից յուրաքանչյուրն առանձի-առանձին վեր լուծելու:

2 անձանց սպանելու դիտավորությունն, ըստ փաստաբանի, ոչ միայն նախաքննության, այլև դատաքննության ամբողջ ընթացքում, այդպես էլ չապացուցվեց: «Ի՞նչ հիմքերով է այս դիտավորությունը, ներքին մղումները նախաքննական մարմինը պարզել այդպես էլ  անհայտ մնաց»,- Երեմ Սարգսյանը` հանգամանալից նկարագրելով, թե նիչպես և ինչու է ծագել վիճաբանությունը, և ինչու է Գոռ Առաքելյանը սկսել կրակել իր ավտոմեքենայի ուղին փակած Վալերիկ Հովհաննիսյանի վրա:

Երեմ Սարգսյանը նաև նշեց, որ 2014թ-ին նախաքննությունը վարող Ոստիկանության ԿԳՎ քննչական բաժնի քննիչ Կիրակոսյանը բանավոր զրույց է ունեցել վկաներից մեկի հետ և այդ զրույցի հիման վրա տեղեկանք կազմել, որով և «փորձել են հիմք ստեղծել»: «Բանավոր զրույցը ՔԴՕ ի՞նչ հիմքով է կցվել գործին, բանավոր զրույցը քննչական դատավարական գործողությունչէ»,- հայտարարեց փաստաբանը:

Երեմ Սարգյանը նաև հիշեցրեց, որ դատավարության ընթացքում մեղադրող դատախազը վերավորակեց Գոռ Առաքելյանին մեղսագրվող արարքները` առաջադրված 104-րդ հոդվածի փոխարեն առաջադրելով 112-րդ հոդվածը:

«Մեղադրողի այդ որոշումից հետո հույս ծագեց, որ դատախազությունը երբեմն կարողանում է իր մեջ ուժ գտնել և նույնիսկ հասարակական հնչեղություն ստացած գործերով արդար որոշումներ կայացնել, ինչից ելնելով էլ հույս ունեինք, որ մեղադրողը գոնե իր մեղադրական ճառից առաջ լիարժեք օբյեկտիվություն կցուցաբերի և կհրաժարվի նաև այն որակումներից, թե իբր Գոռ Առաքելյանը գործել է խուլիգանական դրդումներով և շատերի կյանքի համար վտանգավոր եղանակով , սակայն պարզվեց, որ դատախազությունը դեռևս վերջնականապես չի հաղթահարել հասարակական հնչեղություն ունեցող քրեական գործերով ունեցած իր կոմպլեքսները»,-ասաց Երեմ Սարգսյանը:

Ինչ վերաբերում է այդ մեղադրանքներին, պաշտպանը վկայակոչեց Վճռաբեկ դատարանի մի շարք որոշումներ և սույն գործով կատարված փորձաքննությունների արդյունքներն ու եզրակացությունները` ցույց տալով, որ Գոռ Առաքելյանի արարքներում բացակայում են խուլիգանական դրդումներն ու շատերի կյանքի համար վտանգավոր գործողություններ կատարելու հանցակազմը:

Երեմ Սարգսյանը նշեց, որ փորձագետներն ապացուցել են, որ տուժողներ Մնացական Սուքիասյանն ու Ալվինա Բադալյանը վնասվածքներ են ստացել Գոռ Առաքելյանի կրակոցի ասֆալտից անդրադառնալու հետևանքով: Ուստի իր պաշտպանյալը նրանց կյաքնի համար վտանգավոր գործողություններ չի կատարել, այլ տնդամենը անզգույշ է եղել: Իսկ գետնին է կրակել Վալերիկ Հովհաննիսյանին վախեցնելու նպատակով:

Պաշտպանը նաև փաստեց, որ 4 տուժող քաղաքացիներից ոչ մեկը Գոռ Առաքելյանի նկատմամբ բողոք չի ներկայացրել, ուստի Քրեական դատավարության օրենսգրքի 183-րդ հոդվածի համաձայն բողոքի բացակայության դեպքում անձը չի կարող ենթարկվել քրեական պատասխանատվության: «Եթե բացակայում է տուժողի բողոքը, ՀՀ ՔՕ 113-րդ հոդվածի 1-ին մասով, 120-րդ հոդվածի 2-րդ մասով և 121-րդ հոդվածի 1-ին մասով Գոռ Առաքելյանի նկատմամաբ չի կարող քրեական հետապնդում իրականացվել»,- ասաց փաստաբանը:

Երեմ Սարգսյանը դատրանից խնդրեց Գոռ Առաքելյանին մեղսագրվող արարքներին տալ ճիշտ քրեաիրավական գնահատական, և նրան մեղսագրվող ՀՀ ՔՕ 112-րդ հոդվածի 2-րդ մասի 1-ին, 5-րդ և 9-րդ կետերով, ՀՀ ՔՕ 113-րդ հոդվածի 1-ին և 6-րդ կետերով և 235-րդ հոդվածի 1-ին մասով նախատեսված արարքները վերաորակել համապատասխանաբար ՔՕ 120-րդ հոդվածի 2-րդ մասով, 121-րդ հոդվածի 1-ին մասով և 235-րդ հոդվածի 1-ին մասով, իսկ իր պաշտպանյալի նկատմամբ նշանակել արդարացի ՝ նշված հոդվածներով նախատեսված նվազագույն պատժաչափերով նախատեսված պատիժ:

Երեմ Սարգսյանի ճառին պատասխանելու համար մեղադրող դատախազը դատարանից մի քանի օր ժամանակ խնդրեց` նախապատրաստվելու համար:

Դատական հաջորդ նիստը նշանակվեց հոկտեմբերի 1-ին: