Փաստ ինֆո

«ТАСС»-ի տեղեկացմամբ, Դեմոկրատները ԱՄՆ Կոնգրեսի Սենատում հինգշաբթի արգելափակել են Իրանի միջուկային ծրագրին առնչվող համաձայնագիրը մերժելու Հանրապետականների հերթական փորձը:

Այդ պայմանավորվածության կողմնակիցները թույլ չեն տվել քվեարկության դնել բանաձևը, որն արգելում է  ԱՄՆ նախագահին Իսլամական Հանրապետության դեմ պատժամիջոցները վերանայել այնքան ժամանակ, քանի դեռ այն չի ճանաչել Իսրայելի պետության գոյության իրավունքը և չի ազատել իր բանտերից ամերիկյան քաղաքացիներին:

Այս հարցերն իրար հետ կապելու առաջարկությամբ հանդես էր եկել Սենատում Հանրապետական մեծամասնության առաջնորդ Միտչ Մակքոննելլը, ով իր նախաձեռնությունը ձևակերպել էր մեկ այլ օրինագծում  ուղղում կատարելու տեսքով: Սակայն Հանրապետականները չեն կարողացել հավաքել երկու երրորդ որակյալ մեծամասնություն՝ դադարեցնելու համար դեբատներն ու դնելու ուղղումը քվեարկության:

Հինգշաբթի լրանում է  60-օրյա ժամկետը, որը Կոնգրեսն իր համար սահմանել էր  Իրանի հետ միջուկային ծրագրի համաձայնագիրն ուսումնասիրելու և  այդ առնչությամբ իր վերջնական կարծիքը հայտնելու համար:

Ավելի վաղ Դեմոկրատները Սենատում և Ներկայացուցիչների պալատում արդեն արգելափակել էին Թեհրանի հետ այդ գործարքը «սպանելու» Հանրապետականների մի շարք փորձերը:

Համաձայնագիրը, որը ձևակերպվել էր որպես համատեղ համապարփակ գործողությունների պլան, կողմերը չեն ստորագրել և այդ պատճառով չի պահանջվում ազգային խորհրդարանների կողմից վավերացում: Սակայն

ԱՄՆ-ում օրենք էր ընդունվել, որը թույլ էր տալիս Կոնգրեսին մերժել պայմանավորվածությունը, իսկ նախագահ Բարաք Օբաման, ինչպես նաև նա, ով ապագայում կփոխարինի նրան Սպիտակ տանը,  ստիպված կլիներ հաշվի նստել օրենսդիրների դիրքորոշման հետ: Հանրապետականներին, ովքեր ի սկզբանե հանդես էին գալիս Իրանի հետ միջուկային գործարքի դեմ, դա անել չի հաջողվել:

Սպասվում է, որ չնայած 60-օրյա ժամկետը սպառվում է, նրանք համաձայնագրին խոչընդոտելու տարբեր փորձեր  կձեռնարկեն, սակայն Դեմոկրատները համոզված են, որ իրենք բավարար ուժեր ունեն հետմղելու նման հարձակումները  և պահպանելու Իսլամական Հանրապետության հետ համաձայնությունը: Սենատում Դեմոկրատների առաջնորդ Գէրի Ռիդը հայտարարել է, որ իր քաղաքական ընդդիմախոսների մոտ ոչինչ չի ստացվի և այսօրվա քվեարկությունն որակել է  որպես «ժամանակի դատարկ վատնում»: