Փաստ ինֆո

ՀՀ վերաքննիչ քրեական դատարանն  այսօր մերժեց  արդարացված Ալեքսանդր  Ցվերիանովի ներկայացուցիչ, Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցի բողոքը՝  իր վստահորդի նկատմամբ խոշտանգումների վերաբերյալ գործը կարճելու ՀՔԾ որոշման դեմ: 

Ալեքսանդր Ցվերիանովի դիմումի հիման վրա ՀՀ հատուկ քննչական ծառայությունում  քրեական գործը էր հարուցվել  ՀՀ քրեական օրենսգրքի 309-րդ հոդվածի 2-րդ մասի հատկանիշներով՝ պաշտոնեական լրազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով: Ա.Ցվերիանովը  հայտնել էր, որ 2012 թվականի նոյեմբերի 30-ին` ժամը 07:30-ի սահմաններում, ՀՀ ոստիկանության Երևան քաղաքի վարչության Էրեբունու բաժնի պետական հատուկ ծառայություն իրականացնող պաշտոնյաներն իրեն բերման են ենթարկել ոստիկանության բաժին, որտեղ բռնություն գործադրելու միջոցով հարկադրել են խոստովանել տարբեր գողությունների կատարում, որոնց հետ ինքն իրականում առնչություն չի ունեցել:

Սակայն հետագայում  ՀՔԾ-ի Խոշտանգումների և մարդու դեմ ուղղված հանցագործությունների քննության վարչության պետի տեղակալ  Վ. Ավետիսյանը որոշում էր կայացրել՝ ոստիկանության աշխատակիցների նկատմամբ քրեական հետապնդում չիրականացնելու և գործով վարույթը կարճելու մասին՝  հանցակազմի բացակայության հիմքով:

ՀՔԾ-ի այս  որոշումը բողոքարկվել էր նախ  ՀՀ գլխավոր դատախազություն, ապա նաև՝  դատարան, երկու դեպքում էլ բողոքները մերժվել էին:

Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2015 թ. հունիսի 26-ի որոշման դեմ ներկայացված վերաքննիչ բողոքում Ա. Սաքունցը նշել էր, որ  նախաքննության մարմնի կողմից ձեռնարկված միջոցառումները կատարվել են թերություններով և  օբյեկտիվորեն չեն գնահատվել գործում առկա ապացույցները: Մասնավորապես, վարույթն իրականացնող մարմինը միջոցներ չի ձեռնարկել պարզելու ոստիկանության աշխատակիցների և տուժող Ա. Ցվերիանովի ցուցմունքներում առկա անհամապատասխանությունները՝  կապված վերջինիս բերման ենթարկելու ժամի հետ: Քրեական գործի նյութերով չի հերքվել Ա. Ցվերիանովի՝ ալկոհոլ օգտագործած լինելու փաստը, իսկ ձեռք բերված տվյալները բավարար են ենթադրելու, որ Ա. Ցվերիանովն ալկոհոլ օգտագործել է ոստիկանության աշխատակիցների հյուրասիրությամբ, քանի որ, գտնվելով ոստիկանության բաժնում, այլ կերպ, քան ոստիկանության աշխատակիցների միջոցով, չէր կարող ալկոհոլ ձեռք բերել և օգտագործել: Բացի այդ, Ա. Ցվերիանովն ինքնախոստովանական ցուցմունքով ընդունել է գողությունների 16 դրվագի կատարումը, մինչդեռ, հետագայում դատարանի դատավճռով անմեղ է ճանաչվել նշված արարքների կատարման մեջ: Ա. Սաքունցը նշել է նաև, որ վարույթն իրականացնող մարմինը չի նշանակել համապատասխան փորձաքննություններ՝ Ա. Ցվերիանովի նկատմամբ կիրառված ֆիզիկական և հոգեբանական բռնությունների փաստի հաստատման համար:

Ա. Սաքունցի գնահատմամբ,  ինքնին խոշտանգում է նաև այն, որ խիստ ցավերի առկայության պարագայում Ա. Ցվերիանովին բուժօգնություն չի տրամադրվել և այդ ընթացքում կատարվել են քննչական գործողություններ:

Ներկայացված բողոքի դեմ առարկել են դատավարական հսկողություն իրականացնող  դատախազ Գ. Գևորգյանը և վարույթն իրականացրած Վ. Ավետիսյանը:  Մասնավորապես, ըստ Գ. Գևորգյանի, նախաքննական մարմինը տվել է բոլոր հարցերի պատասխանները և քննությունը կատարվել է քրեական դատավարության օրենսգրքի պահանջներին համապատասխան:

Արթուր Սաքունցը «Փաստինֆո»-ի լրագրողին հայտնեց, որ Վերաքննիչ դատարանի որոշումն անպայման բողոքարկելու է ոչ միայն Վճռաբեկ դատարան, այլև Մարդու իրավունքների եվրոպական դատարան: