Փաստ ինֆո

Սերբիայի դեմ խաղում Հայաստանի հավաքականի կիսապաշտպան Հենրիխ Մխիթարյանը հենակետայինի դեր էր կատարում, սակայն դա չօգնեց միավորներ վաստակել։

Armsport.am-ը պարզել է, թե ինչպիսի արդյունք է գրանցել հավաքականը, երբ իր լավագույն ֆուտբոլիստը հանդես չի եկել հարձակողական կիսապաշտպանի դիրքում։ Ընտրանու կազմում անցկացրած 53 խաղից 18-ում նա գործել է հենակետայինի դիրքում։

Առաջին անգամ դա տեղի է ունեցել 2009 թվականի օգոստոսի 12-ին` Մոլդովայի հետ ընկերական խաղում։ Վարդան Մինասյանի թիմն ամբողջովին զիջել էր դաշտի կենտրոնը՝ մրցակցին պարտվելով 1։4 հաշվով։

Դրանից հետո Մինասյանն այդ գաղափարից ժամանակավորապես հրաժարվեց, սակայն արդեն 2010 թվականի հոկտեմբերին Հենրիխը կրկին ստիպված էր այդ դիրքում հանդես գալ սլովակների դեմ։ Այդ ժամանակ նրա հետ միասին խաղում էր Կառլեն Մկրտչյանը, իսկ Մարկոսը գործում էր առջեւում։ 72-րդ րոպեին, երբ Հայաստանը հաղթում էր 2։1 հաշվով, Մարկոսին փոխարինեց Արթուր Եդիգարյանը, ով հենակետայինի գոտում փոխարինեց Հենրիխին, իսկ վերջինս զբաղեցրեց հարձակողական կիսապաշտպանի գոտին։ 89-րդ րոպեին Մխիթարյանը դարձավ գոլի հեղինակ, իսկ Հայաստանի հավաքականը հաղթեց 3։1 հաշվով։

Եվրո-2012-ի ընտրական փուլում Վարդան Մինասյանը մի քանի անգամ գործարկել է այդ հնարքը։ Ենթադրվում է, որ առաջին փոխանցում ունեցող Մխիթարյանը կուղորդի գրոհները, սակայն դա միշտ չէր օգնում։ Հարկ է նշել, որ բազմաթիվ անգամ Հենրիխը ստիպված էր հանդես գալ այդ դիրքում, երբ տվյալ դիրքում հանդես եկող հիմնական կազմի ֆուտբոլիստներից մեկը տարբեր պատճառներով չէր միացել հավաքականին։

Կարևոր է նշել, որ առաջին անգամ Մխիթարյանը մշտապես սկսել է հենակետայինի գոտում խաղալ Դոնեցկի «Շախտյորում»: 2010-11 մրցաշրջանում, երբ Ֆերնանդինյոն երկար ժամանակով շարքից դուրս մնաց, Միրչա Լուչեսկուն ավելի լավ ելք չգտավ, քան Մխիթարյանին իջեցնել բրազիլացու դիրքը: Իհարկե, միշտ համեստ հայ ֆուտբոլիստը չէր բողոքում, իսկ լրագրողների հարցերին պատասխանում էր, որ պատրաստ է նույնիսկ դարպասում կանգնել, եթե մարզիչը նման որոշում կայացնի: Սակայն ռումինացի մասնագետը շատ արագ հասկացավ, որ Հենրիխն իրեն շատ ավելի լավ է զգում հարձակմանը մոտ գտնվելիս: Վերադառնալով իր հարազատ դիրք՝ Մխիթարյանը սկսեց արդյունավետ գործել, իսկ Ուկրաինայի 2012/13 առաջնությունում 25 գոլ խփեց, միաժամանակ, թարմացնելով այդ մրցաշարի ռմբարկուական ռեկորդը:

«Շախտյորից» հետո Մխիթարյանը հենակետայինի դիրքում կրկին հայտվեց Յուրգեն Կլոպի գլխավորությամբ, երբ Դորտմունդի «Բորուսիա» վերադարձավ Սինձի Կագավան: Բայց այդ ժամանակ էլ նման փորձարկումը հաջող չհամարվեց:

Վերադառնալով Հայաստանի հավաքականին՝ նշենք, որ Բերնար Շալանդի օրոք, երբ ազգային ընտրանի սկսեց հրավիրվել Ռումյան Հովսեփյանը, Մխիթարյանը հազվադեպ էր խաղում 6 համարի դիրքում: Այնուամենայնիվ շվեյցարացին նույնպես նրան օգտագործում էր հետ քաշված կիսապաշտպանի, երբեմն էլ նույնիսկ աջ կիսապաշտպանի դիրքում:

Այն 18 խաղերում, որոնցում Հենրիխ Մխիթրայանը հանդես է եկել հենակետային կիսապաշտպանի դիրքում, Հայաստանի հավաքականը 6 հաղթանակ է տոնել, կրել է 11 պարտություն, և մեկ խաղ ավարտվել է ոչ-ոքի արդյունքով: Գնդակների հարաբերությունը 26:33 է: Բայց ավելորդ չի լինի նշել, որ այդ մրցավեճերի կեսն ընկերական բնույթ են կրել:

Ստորև նշված են այն հանդիպումները, որոնցում Հենրիխ Մխիթարյանը գործել է հենակետային կիսապաշտպանի դիրքում.

Ընկ. Հայաստան – Մոլդովա՝ 1:4, 2009

Եվրո. Հաայստան – Սլովակիա՝ 3:1, 2010

Եվրո. Հայաստան – Անդորրա՝ 4:0, 2010

Ընկ. Հայաստան – Վրաստան՝ 1:2, 2011

Եվրո. Ռուսաստան – Հայաստան՝ 3:1, 2011

Ընկ. Հայաստան – Կանադա՝ 3:1, 2012

Ընկ. Հունաստան – Հայաստան՝ 1:0, 2012

Ընկ. Հայաստան – Բելառուս՝ 1:2, 2012

ԱԱ. Մալթա – Հայաստան՝ 0:1, 2012

Ընկ. Հայաստան – Լիտվա՝ 4:2, 2012

Ընկ. Լյուքսեմբուրգ – Հայաստան՝ 1:1, 2013

ԱԱ. Հայաստան – Չեխիա՝ 0:3, 2013

ԱԱ. Հայաստան – Բուլղարիա՝ 2:1, 2013

Ընկ. Ռուսաստան – Հայաստան՝ 2:0, 2014

Ընկ. Ալժիր – Հայաստան՝ 3:1, 2014

Եվրո. Ալբանիա – Հայաստան՝ 2:1, 2015

Եվրո. Հայաստան – Պորտուգալիա՝ 2:3, 2015

Եվրո. Սերբիա – Հայաստան՝ 2:0, 2015