Փաստ ինֆո

«Արդյո՞ք եղել են Հայաստանում սահմանադրական կոնֆլիկտներ, որոնք Սահմանադրությունն ի զորու չի եղել լուծել»,- այսօր ԱԺ-ում կազմակերպված սահմանադրական բարեփոխումների նախագծի քննարկման իր եզրափակիչ ելույթում ասաց մասնագիտական հանձնաժողովի անդամ Հրայր Թովմասյանը` թվարկելով. «1996թ., 2003թ., 2008թ.»:

Հնչող տեսակետին, թե սահմանադրական փոփոխությունը պետք է հանրության աջակցությունն ստանա, Հրայր Թովմասյանն արձագանքեց. «Փորձել պրոեկտել հանրության մեջ իշխանությունների նկատմամբ դժգոհությունը սահմանադրության նախագծի վրա, արդար չէ»:

«Տպավորություն է, որ գործող համակարգը շատ լավն է»,-ասաց Հրայր Թովմասյանը՝ ընդգծելով. «Եթե պարտվեցիք այս համակարգում 2017 թվականին, ի՞նչ եք անելու այս նույն համակարգում, եթե հանկարծ 2018թ-ին հաղթեցիք, ի՞նչ եք անելու, երբ որ պառլամենտն է ձևավորում քաղաքական մեծամասնություն»:

Բանախոսը հիշեցրեց, որ գործող համակարգում ՀՀ նախագահը միշտ ունեցել է պառլամենտական մեծամասնություն, բացառությամբ 1996թ-ի, երբ ստիպված եղավ հրաժարական տալ:

Ավարտելով ելույթը` Հրայր Թովմասյանը խոստացավ, որ ԱԺ քննարկմանը հնչած բոլոր առարկայական առաջարկները հաշվի կառնվեն, նախագծում կարվեն փոփոխություններ, և առաջիկայում կներկայացվի արդեն փոփոխված տարբերակը: