Փաստ ինֆո

Ազատամարտիկ Վարդան Թումանյանի առողջությանը դիտավորությամբ միջին ծանրության վնաս պատճառելու 2 գործերը,  որոնք վերաբերում են միևնույն դեպքին,  այսօր միացվեցին և կքննվեն   մեկ վարույթում:

Գործերը միավորելու  տուժողի իրավահաջորդի ներկայացուցչի միջնորդության դեմ կողմերը չառարկեցին:

Գործով այսօրվա  դատական նիստին երկու ամբաստանյալները՝ Սարգիս Ղուկասյանը և Գևորգ Սարգսյանը,  բերման  էին ենթարկվել: Նախորդ դատական նիստերին իրենց չներկայանալու պատճառն, ըստ ամբաստանյալների,  այն է, որ իրենք վթարի են ենթարկվել, իսկ Սարգիս Ղուկասյանը նաև թունավորվել է սննդամթերքից:

«Ջունգլ» մականվամբ Գևորգ Սարգսյանը նշեց, որ իր մոտ ախտորոշվել է ուղեղի ցնցում,  և ինքը ստացիոնար բուժում է ստացել:

Ամբաստանյալները նշված պատճառաբանությունները հիմնավորող որևէ փաստաթուղթ չներկայացրեցին, ուստի դատարանը նրանց բացակայությունն  անհարգելի որակեց: Դատարանը նրանց զգուշացրեց, որ եթե նրանք նորից  նման վարքագիծ դրսևորեն,  ապա դատարանը  քննության կառնի նրանց խափանման միջոցի փոփոխման հարցը:

Մինչև դատաքննությունը սկսվելը տուժողի իրավահաջորդի ներկայացուցիչ Տիգրան Մուրադյանը  միջնորդեց նշանակել  տուժողի կրկնակի դատաբժշկական փորձաքննություն:

Տուժող կողմը գտնում է, որ նախաքննության ընթացքում Վարդան Թումանյանի մահվան փաստի առթիվ արդյունավետ քննություն չի իրականացվել:  Ըստ տուժողի իրավահաջորդի ու նրա ներկայացուցչի, իրենց իրավունքները սահմանափակված են եղել և նախաքննության ընթացքում նրանց կողմից բարձրացված հարցերը անտեսվել են:

Գործով նախաքննության ընթացքում նշանակվել է դատաբժշկական և լրացուցիչ դատաբժշկական փորձաքննություններ, որոնցով  տուժողի մահվան վերաբերյալ տրվել են 2 տարբեր,  իրար հակասող եզրակացություններ:

Տուժող կողմը գտնում է, որ ամբաստանյալների արարքը ենթակա է որակման ՀՀ քրեական օրենսգրքի 112-րդ հոդվածի 2-րդ մասի 6-րդ և 14-րդ կետերով՝  մի խումբ անձանց կամ կազմակերպված խմբի կողմից  դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահը,   և   104-րդ հոդվածի 2 մասի 6-րդ կետով՝ շատերի կյանքի համար վտանգավոր եղանակով սպանություն: Նախաքննական մարմինը տուժողի իրավահաջորդին զրկել է ապացույցներ ներկայացնելու իրավունքից, քանի որ   իրար հակասող  եզրակացությունների առկայության պայմաններում  մերժել է կրկնակի դատաբժշկական փորձաքննություն նշանակելու մասին տուժող կողմի միջնորդությունները:

Տուժող կողմը նշեց, որ լրացուցիչ  հանձնաժողովային դատաբժշկական փորձաքննության եզրակացությանը հիմնավորված չէ,  կասկած է հարուցում, առկա են փորձաքննության կատարման դատավարական կանոնների խախտումներ:

Մասնավորապես, եզրակացության հետևությունների մասում նշված է, որ Վարդան Թումանյանը ունեցել է գլխուղեղի բնածին արատ, որն էլ հանդիսացել  է մահվան պատճառ, սակայն այս պնդումը փորձագետները չեն  հիմնավորել կոնկրետ ապացույցներով:

Փորձաքննության եզրակացության մեջ նշված է, որ մահվան հանգեցնող գլխուղեղի արյունազեղումն առաջացել է բնածին արատով պայմանավորված՝ անոթների հանկարծակի պատռման հետևանքով: Նշվածից հետևում է, որ մահվան հանգեցնող արյունազեղումը հանկարծակի չի եղել,  այլ եղել է տևական՝   մահվանից առաջ 24-ից  ավելի ժամվա ընթացքում:

Միևնույն ժամանակ եզրակացության մեջ նշված չէ,  թե ինչպիսի հետազոտություններ են կատարվել և ինչպիսի մեթոդներ  կիրառվել:

Պաշտպանական կողմը առարկեց տուժող կողմի միջնորդության դեմ՝ նշելով, որ միջնորդության մեջ չի հիշատակվել  եզրակացության այն մասը, որը տուժող կողմին «ձեռք չի տալիս»: Կողմը գտնում է, որ միջնորդությունն անհիմն է և ենթակա է մերժման:

Մեղադրողը միջնորդության վերաբերյալ կարծիք կհայտնի արդեն հաջորդ՝ սեպտեմբերի 22-ի նիստում՝  միջնորդությանը ծանոթանալուց հետո:

 Ըստ մեղադրանքի՝ Սարգիս Ղուկասյանը և Գևորգ Սարգսյանը Վիկտոր Հովսեփյանի հետ ծեծի են ենթարկել Վարդան Թումանյանին՝ դիտավորությամբ նրա առողջությանը պատճառելով միջին ծանրության վնաս՝ ատողջության տևական քայքայումով:

Սարգիս Ղուկասյանին, Գևորգ Սարգսյանին և Վիկտոր Հովսեփյանին մեղադրանք է առաջադրվել ՀՀ քրեական օրենսգրքի 113-րդ հոդվածի 2-րդ մասի 3-րդ կետով՝ մի խումբ անձանց կամ կազմակերպված խմբի կողմից դիտավորությամբ առողջությամբ միջին ծանրության վնաս պատճառելը: Նրանց նկատմամբ որպես խափանման միջոց է  ընտրվել չհեռանալու մասին ստորագրությունը: