Փաստ ինֆո

Բուդաղյանների հետ կապված գործերով սկսում է անզորության զգացողություն առաջանալ, բայց այժմվանից էլ պարզ է, թե ինչ է լինելու այս ամենի վերջը և ՄԻԵԴ քանի վճիռ է լինելու միայն Արա Բուդաղյանի  գործով:

«Փաստինֆո»-ի լրագրողի հետ զրույցում այս մասին հայտարարեց Արա Բուդաղյանի պաշտպան Հայկ Ալումյանը՝ հավելելով, որ «համարեք, որ Արա Բուդաղյանի նկատմամբ  կալանավորման, գրավի միջնորդությունը մերժելու ու  կալանքի ժամկետը երկարացնելու որոշումները ՄԻԵԴ երեք վճիռ են, կամ մի հատ մեծ վճիռ է՝ երեքը մեկում»:  Հ.Ալումյանն ընդգծեց, որ իրենք անպայման դիմելու են  ՄԻԵԴ, «անգամ եթե հենց վաղը Արա Բուդաղյանին ազատեն ու ներողություններ խնդրեն, միևնույն է, ՄԻԵԴ դիմելու ենք»: 

 Օրերս Սյունիքի մարզպետի ավտոմեքենայի ուղղությամբ կրակոցների գործով մեղադրյալ  Արա Բուդաղյանի կալանավորման ժամկետը երկարացվել է ևս  երկու ամսով, որոշումը բողոքարկվել է Վերաքննիչ դատարան:  

Պաշտպանը նշեց, որ այս անգամ նախաքննական մարմինը  որպես հիմնավորում ներկայացրել էր Արա Բուդաղյանի հետ չառնչվող,  երկու այլ անձանց առերես հարցաքննության արձանագրությունը:  «Կա՞  մի բան,  որը անուղղակի կամ անուղղակի վկայում է Արա Բուդաղյանի մասնակցության մասին»   պաշտպանի հարցին քննիչը  բացասական պատասխան է տվել, սակայն, այնուամենայնիվ,  կալանավորման ժամկետը երկարացվել է:

Հ.Ալումյանը նշեց, որ ինքը որոշել է  հատկապես կալանքի վերաբերյալ գործերով Վճռաբեկ դատարանն այլևս չսպառել, քանի որ  հատկապես այդ գործերով ակնհայտ է, որ Վճռաբեկ դատարանն պաշտպանության  արդյունավետ միջոց չէ: Հ.Ալումյանը պարզաբանեց, որ եթե մարդուն  որոշում են  երկու ամսով կալանավորել, ապա անիմաստ է բողոք ներկայացնել Վճռաբեկ դատարան՝ վերջինս օրենքով ունի երեք ամիս ժամանակ միայն  որոշում  կայացնելու համար բողոքը վարույթ ընդունել-չընդունելու մասին: Վարույթ ընդունելուց հետո էլ մի երկու-երեք ամիս հետո էլ որոշում է կայացնելու բողոքը մերժել-չմերժելու մասին:

Պաշտպանը նշեց, որ հիմա այն փուլն է, որ մարդիկ ամբողջությամբ կախված են դատարանի քմահաճույքներից, իսկ դատարաններն էլ՝ հատկապես Կենտրոնի դատարանը,  ԱԱԾ ստորաբաժանումից ոչնչով չի տարբերվում,  ու Արա Բուդաղյանը հիմա փաստորեն ԱԱԾ պատանդ է:

Կալանավորման համար պետք է լինի ողջամիտ կասկած, որ այս անձը կարող է կատարած լինել հանցագործությունը,  ու պետք է լինի հիմք, որ անձը՝ ազատության մնալով,  կարող է թաքնվել, խոչընդոտել քննությանը, նոր հանցանք կատարել:  «Ոչ հիմնավոր կասկածը կա,  ոչ էլ գեթ մեկ ապացույց, որ եթե Ա.Բուդաղյանը մնա ազատության մեջ,  կարող է թաքնվել, խոչընդոտել քննությանը, նոր հանցանք կատարել»,- ասաց Հայկ Ալումյանը: Նա հավելեց. «Ինչ խայտառակ տեսարան է լինելու, երբ որ քրեական գործի ամբողջ նյութերը բացվեն հանրության առաջ ու բոլորը տեսնեն, թե ինչի վրա է հիմնված մեղադրանքը»,- նշեց պաշտպանը: 

Ի  պատասխան  Սյունիքի մարզպետ Սուրիկ Խաչատրյանի և ՄԻԵԴ-ում Հայաստանը ներկայացնող դատավոր  Արմեն Հարությունյանի միջև ազգակցական կապի վերաբերյալ մեր հարցի, Հայկ Ալումյանը հայտնեց, որ մարզպետը ՄԻԵԴ դատավորի քեռին է:  «Մեզ համար դա ամենացավալի հետևանքների կարող է հանգեցնել: Առանց այդ էլ Հայաստանի կառավարությունը սովորել է ինչ-որ հնարքների միջոցով ձախողել Հայաստանի վերաբերյալ գործերի քննությունը Եվրոպական դատարանում, երկու տարուց   ավելի է ՄԻԵԴ-ում Հայաստանի վերաբերյալ գործեր համարյա չեն քննվում: Նոր են ՄԻԵԴ-ում հասկացել,  որ ոչ թե օբյեկտիվ, այլ սուբյեկտիվ պատճառներ կան, հիմա էլ մի հատ էլ տեսնեն, որ արդեն ազգակցական կապերի հետ կապված խնդիրներ կան»,- ասաց պաշտպանը: 

Հայկ Ալումյանը մտավախություն ունի, որ եթե  Բուդաղյանների գործի հետ Արմեն Հարությունյանը  կապ ունենա, ապա խնամիական, ընկերական և այլ հարաբերությունները  հիմա էլ տեղափոխվեն  ՄԻԵԴ մակարդակ: «Դա շատ անցանկալի կլիներ, որովհետև դեռ ՄԻԵԴ-ի հետ կապված որոշակի հույսեր ունենք՝ ոչ միայն Սուրիկ Խաչատրյանի հետ կապված,  այլ ընդհանրապես դա դատավորի գործունեության շատ վատ մեկնարկ կլինի» ,- ասաց Հ.Ալումյանը:

 Պաշտպանը միաժամանակ գտնում է, որ  Արմեն Հարությունյանն իրենից կասկածները հեռացնելու հարցում թիվ մեկ շահագրգիռ անձը պետք է լինի, նա պետք է ինչ-որ քայլեր ձեռնարկի, գոնե չառնչվի այդ գործի հետ:

Հ.Ալումյանը նշեց նաև, որ մարզպետի առանձնատան մոտ միջադեպի  գործում շատ մեծ դերակատարություն է ունեցել նաև  ՀՀ գլխավոր դատախազ, ՄԻԵԴ-ում ՀՀ կառավարության ներկայացուցիչ  Գևորգ Կոստանյանը՝  նրա  միջոցով  է այդ գործն այդ ընթացքը ստացել, գլխիվայր շրջվել: Մասնավորապես,  դեպքից 4-5 օր հետո Գ.Կոստանյանը արդեն սկսել էր հրապարակային հայտարարություններ անել, որ դեպքի մեղավորները Բուդաղյաններն են այն դեպքում,  որ այդ օրվա դրությամբ քրեական գործում  որևէ նյութ չի եղել, որի հիման վրա կարելի էր այդպիսի հայտարարություններ անել: «Իհարկե,  հետո սարքվել են այդպիսի որոշ նյութեր: Այսինքն՝  գլխավոր դատախազն սկզբից ասել է, որ Բուդաղյաններն են  մեղավոր, հետո նրա հայտարարության համար սկսել են գործի նյութերը հարմարեցնել»,- ասաց Հ.Ալումյանը: