Փաստ ինֆո

Վենետիկի հանձնաժողովի այսօրվա հանդիպումը քաղաքակական ուժերի, քաղաքացիական հասարակության ներկայացուցիչների հետ առիթ էր լսելու քաղաքացիական հասարակության տեսակետները: «Փաստինֆո»-ի թղթակցի հետ զրույցում քննարկման մասնակից, «Հայ Յեղափոխական Դաշնակցություն» խորհրդարանական խմբակցության ղեկավար Արմեն Ռուստամյանը միաժամանակ նշեց, որ հանդիպման ժամկետը շատ սեղմ էր,  «անգամ հնարավորություն չունեցանք արտահայտվելու, չթողեցին մեզ արտահայտվել, բայց հրավիրել էին»:

Դա լավ չէր և նշանակում է, որ կազմակերպական խնդիր կար՝ կամ պետք է քաղաքական ուժերի ու քաղաքացիական հասարակության ներկայացուցիչների հետ առանձին-առանձին հանդիպեին, կամ էլ պետք է հնարավորություն տային խոսել:

Արմեն Ռուստամյանը նշեց նաև, որ  Սահմանադրությունում փոփոխությունների գործընթացը ճիշտ ուղղությամբ է ընթանում, որովհետև ՀՅԴ կուսակցությունը շուրջ 25 տարի պահանջել է, որպեսզի երկիրն անցնի խորհրդարանական կառավարման:

«Եվ համոզված ենք, որ այն բոլոր պրոբլեմները, որ Հայաստանում կուտակվել են,  դրանք կուտակվել են հենց գործող համակարգի թերությունների պատճառով և մենք համոզված ենք, որ այս ուղղությամբ գնալով՝  Հայաստանը նոր էջ  բացելու հնարավորություն կունենա, որտեղ ժողովրդավարությունն իր բոլոր մակարդակներով կիրացվի ՝ թե ներկայացուցչական, թե մասնակցային, թե նաև, բնականաբար, անմիջական ժողովրդավարության»,-   ասաց Արմեն Ռուստամյանը:     

Ըստ նրա, իր լսած հայտարարությունների մի զգալի մասը բացարձակ կապ չունի տեքստի հետ: Տպավորություն է ստեղծվում, որ մարդիկ չեն կարդացել, մի մասը կարդացել է, երևի լավ չի հասկացել:

Մյուս մասն էլ, Արմեն Ռուստամյանի տպավորությամբ,  ուղղակի քաղաքական նկատառումներից ելնելով՝ դեմ է, որովհետև  ուզում են անպայման, որ այդ նախագահական աթոռը պահպանվի, չնայած դրանից բոլորը դժգոհում են:

«Ովքեր որ ուզում են, որ պահպանվի նախագահական համակարգն ու աթոռը, թող մեկնաբանեն, թե ինչի՞ բոլոր երեք նախագահներից այս կամ այն կերպ դժգոհում էին, ինչի՞ չորրորդից չպետք է դժգոհեն»,-ասաց նա:    Ա.Ռուստամյանը կարծիք հայտնեց, որ «այս համակարգի հիմքում դրված է մենիշխանության դրվածքը, որն այդ ընթացքով վերացվում է կամ նվազեցվում է, ավելի կոլեգիալ է դառնում որոշումների կայացման գործընթացը, որը խորհրդարանական համակարգին բնորոշ է»:

Միակ խնդիրն, ըստ Արմեն Ռուստամյանի, կայուն մեծամասնության հետ կապված հարցն է, որն առաջին անգամ է ներմուծվում, բայց դա բխում է խորհրդարանական համակարգերի ուսումնասիրությունից: Հայաստանի՝  այս աշխարհաքաղաքական դիրքում ու պայմաններում, ոչ պատերազմ, ոչ խաղաղություն իրավիճակում գտնվելու պարագայում պերմանենտ ընտրությունների  փուլ տանել երկիրը ճիշտ չէ: Ա.Ռուստամյանը պարզաբանեց, որ դա  խորհրդարական համակարգում կարող է տեղի ունենալ, եթե մեծամասնություն չձևավորվի: Ա.Ռուստամյանը նշեց նաև, որ կայուն մեծամասնություն չի ենթադրում մեկ կուսակցության մեծամասնություն, սա շատերը չեն հասկացել կամ չեն ուզում հասկանալ: