Փաստ ինֆո

Սահմանադրությունում փոփոխությունների նախագիծը մշակած  մասնագիտական հանձնաժողովի անդամների հետ Վենետիկի հանձնաժողովն ունեցել է քննարկումներ, որոնց ընթացքում ներկայացվել են կոնկրետ առաջարկություններ: Ինչպես լրագրողների հետ այսօրվա հանդիպմանը նշեց Վենետիկի հանձնաժողովի անդամ Քրիստոֆ Գրաբենվարտերը, իրենք պատասխան են ստացել, որ կոնկրետ կետերը հաշվի են առնվելու և ելնելով այն խոսքերից որոնք հնչեցվել են, իրենք  ունեն վստահություն, որ էական փոփոխություններ կլինեն տեքստում: Նրա գնահատմամբ, կան փոփոխություններ,  որոնք  գնում են դրական ուղղությամբ: «Կան մի քանի էական կետեր, որոնք մենք բարձրացրել ենք, և այդ ուղղություններով մենք դեռևս չենք հասել լավագույն պրակտիկայի»,- ասաց Վենետիկի հանձնաժողովի անդամը:

Լրագրողներից մեկի այն հարցին, թե արդյոք Վենետիկի հանձնաժողովը կարո՞ղ է երաշխավորել, որ առաջարկվող փոփոխություններն  ավելի կժողովրդավարայնացնեն երկիրը, պրն. Գրաբենվարտերը  նկատեց.  «Մենք՝  որպես Վենետիկի հանձնաժողով,  այն մարմինը չենք, որ  կարող է երաշխավորել գործընթացը: Մենք չենք կարող սերտիֆիկատ տալ, որ երկու-երեք տարի հետո ժողովրդավարությունն ավելի անմիջական կլինի, քան այսօր»:

Քրիստոֆ Գրաբենվարտերը նշեց նաև, որ իրենք չեն կարող չափել ժողովրդավարությունը, կարող են  ասել, որ,  օրինակ,  այսօր հինգ աստիճան ավելի շոգ է, քան երեկ, ժողովրդավարության մասին չի  կարելի  նույնը ասել:  

 Հանձնաժողովի անդամը պարզաբանեց, որ իրենք գնահատում են   տեքստն ու համատեքստը այն առումով, թե որքանով է այդ տեքստը համապատասխանում եվրոպական չափանիշներին և արդյոք այն համապատասխանո՞ւմ է  կամ համահո՞ւնչ է այն պրակտիկային, որը գոյություն ունի Սահմանադրական իրավունքի ոլորտում: