Փաստ ինֆո

Ազատամարտիկ Վարդան Թումանյանի առողջությանը դիտավորությամբ միջին ծանրության վնաս պատճառելու՝ 2 գործերը բացառված չէ, որ միացվեն և քննվեն միևնույն վարույթում:

Ավան և Նոր-Նորք վարչական շրջանների ընդհանուր իրավասության դատարանում ամբաստանյալ Վիկտոր Հովսեփյանի մասով քրեական գործով այսօրվա նիստում նախագահող դատավորը  տեղեկացրեց, որ տուժողի իրավահաջորդի ներկայացուցիչը միջնորդություն է ներկայացրել միացնել 2 գործերը եւ  քննել նույն վարույթում, քանի որ դրանք վերաբերում են նույն դեպքին:

Մեղադրողը չառարկեց միջնորդությանը, սակայն 2 տարբեր գործերով ամբաստանյալների պաշտպան Կարեն Մկրտչյանը չշտապեց դիրքորոշում հայտնել՝ նշելով, որ գործով մյուս 2 ամբաստանյալներ  Սարգիս Ղուկասյանի և Գևորգ Սարգսյանի հետ կնքած իր պայմանագրերի ժամկետները լրացել են և ինքը չգիտի կշարունակի արդյոք իրականացնել նրանց պաշտպանությունը, թե ոչ:

Նշենք, որ այսօր նույն դեպքին վերաբերող մյուս գործով ևս դատական նիստ էր նշանակված, սակայն այն հետաձգվեց՝ ամբաստանյալների բացակայության պատճառով:

Ըստ պաշտպան Կարեն Մկրտչյանի տեղեկության՝ իր երկու պաշտպանյալներն էլ թունավորվել են և ունեն առողջական խնդիրներ։ Ի տարբերություն պաշտպանի հայտարարության՝ դատական նիստին ներկա գտնվող  մահացած տուժողի քույրը հայտարարեց, որ  Ջունգլ մականվամբ ամբաստանյալ Գևորգ Սարգսյանը վթարի է ենթարկվել և ստացել մարմնական վնասվածքներ:

Կնոջ խոսքով՝ իր տեղեկությունը հարյուր տոկոսանոց է, սակայն նա խնդրեց դատարանին ևս մեկ անգամ ստուգել՝ տեղեկության իսկությունը:

Դատարանի որոշմամբ ամբաստանյալներ Սարգիս Ղուկասյանի և Գևորգ Սարգսյանի նկատմամբ բերման ենթարկելու որոշում կայացվեց՝ պատշաճ կարգով ծանուցված լինելու, սակայն ոչ պատշաճ վարքագիծ դրսևորելու համար: Գործերը միավորելու  միջնորդությունը կքննարկվի  հաջորդ նիստում:

Ըստ մեղադրանքի՝ Սարգիս Ղուկասյանը և Գևորգ Սարգսյանը Վիկտոր Հովսեփյանի հետ ծեծի են ենթարկել Վարդան Թումանյանին՝ դիտավորությամբ նրա առողջությանը պատճառելով միջին ծանրության վնաս՝ ատողջության տևական քայքայումով:

Սարգիս Ղուկասյանին, Գևորգ Սարգսյանին և Վիկտոր Հովսեփյանին մեղադրանք է առաջադրվել ՀՀ քրեական օրենսգրքի 113-րդ հոդվածի 2-րդ մասի 3-րդ կետով, նրանց նկատմամբ որպես խափանման միջոց ընտրելով չհեռանալու մասին ստորագրությունը:

Նախնական քննության տվյալներով՝  2014թ հուլիսի 13-ին Նոր Նորքի 7-րդ զանգվածի 49-րդ շենքի մոտ, տաղավարում տղամարդիկ նարդի և շախմատ են խաղացել, որի ժամանակ մասնակիցների և դրան հետևողների միջև վիճաբանություն է ծագել, քաշքշել են միմյանց, հայհոյել: Կարճ ժամանակ անց հանդարտված վեճը նորից բորբոքվել է և հենց այդ ժամանակ էլ ազատամարտիկ Վարդան Թումանյանը ծեծի է ենթարկվել, իսկ դեպքից 2 օր անց մահացել:

Փաստի առթիվ հարուցվել է քրեական գործ 112-րդ հոդվածի 2-րդ մասի 6-րդ և 14-րդ կետով, սակայն դեպքից հետո ազատամարտիկին ծեծելու մեջ կասկածվողները դիմել են փախուստի:

Դեպքից 2 օր անց՝ հուլիսի 15-ին Բավրայի անցակետով ՀՀ պետական սահմանը հատելու փորձ կատարելու ժամանակ Գևորգ Սարգսյանը և Սարգիս Ղուկասյանը հայտնաբերվել և բերման ենթարկվել, նրանց մեղադրանք է առաջադրվել, իսկ որպես խափանման միջոց՝ ընտրվել  կալանավորումը:

Իսկ փախուստի դիմած 3-րդ մեղադրյալը՝ Վիկտոր Հովսեփյանը հայտնաբերվել է ավելի ուշ, ուստիեւ  քրեական գործերը դատարան են ուղարկվել առանձին-առանձին։ Ի դեպ, նշենք, որ մինչև դատարան ուղարկվելը նրանց 3-ի նկատմամբ առաջադրված մեղադրանքները վերաորակվել է՝113-րդ հոդվածի 2-րդ մասի 3-րդ կետով, ինչպես նաև փոփոխվել խափանման միջոց կալանքը՝ չհեռանալու մասին ստորագրությամբ: