Փաստ ինֆո

Սահմանադրության փոփոխություններ պետությունները կարող են կատարել միայն ծայրահեղ դեպքերում, երբ որ գործող Սահմանադրության պայմաններում արդեն հնարավոր չէ զարգանալ, առաջ գնալ: Մինչդեռ Հայաստանի  պարագայում դրա մասին խոսելն ավելորդ է, որովհետև գործող  Սահմանադրությունն, որն ակնհայտ է, տեղ-տեղ կարող էր ավելի լավը լինել,  այդպես էլ երբևէ  լիարժեք չի էլ գործել: «Փաստինֆո»-ի լրագրողի հետ զրույցում այսօր նշեց ՀՀ փաստաբանների պալատի խորհրդի անդամ, փաստաբան Երվանդ Վարոսյանը՝ հավելելով, որ կարևորը Սահմանադրության գործելն է, ոչ թե դրանում մշակված մեխանիզմների իրավական տեսակետից կատարյալ լինելը:

«Ուստի խոսել այն մասին, որ առկա են ինչ-որ խութեր, թերություններ, որոնք երկրի զարգացմանը խոչընդոտում են, ավելորդ է»,- ասաց փաստաբանն՝ ընդգծելով, որ այս պարագայում  որևէ պատճառ չկա նոր Սահմանադրություն  ընդունել:

Փաստաբանը նաև նշեց, որ ինքն  ընդհանրապես խիստ դեմ է սահմանադրական փոփոխություններին, քանի որ  ոչ միայն երկրի օրենսդրության հիմքն ու առանցքը, այլև ընդհանրապես բոլոր ոլորտներում երկրում գործող խաղի կանոններ սահմանող  Սահմանադրության փոփոխությունն ինքնին ցնցում է ցանկացած երկրի համար:

Երվանդ Վարոսյանը նշեց, որ  հանրությունը տեղյակ է, որ ստեղծվել է փաստաբաններից կազմված աշխատանքային խումբ, որը զբաղվում է Սահմանադրության նախագծի ուսումնասիրությամբ՝ իրավական տեսակետից: «Աշխատանքային խմբով որոշել ենք բովանդակային քննարկումների մեջ չմտնել՝   մինչև որ պատրաստի պրոդուկտը՝ եզրակացությունը կամ զեկույցը, չգիտեմ ինչպես այն  կկոչվի, չհրապարակենք»,- ասաց նա:

Ե.Վարոսյանը տեղեկացրեց, որ խմբի առաջին աշխատանքային հանդիպմանը շեշտադրում է կատարվել, որ իրոք սահմանադրական փոփոխություններ Հայաստանի Հանրապետությանն այս փուլում պետք չեն: «Հիմա մենք փորձելու ենք իրավական տեսակետից հիմնավորել՝ ինչո՞ւ պետք չեն, ինչպես նաև անդրադառնալ նախագծում առկա, մեր կարծիքով,  վտանգավոր նոր զարգացումներին և դրանք նույնպես ներկայացնել հանրությանը»,- ասաց Ե.Վարոսյանը: