Փաստ ինֆո

Սեռական շահագործման նպատակով կանանց թրաֆիքինգի գործով այսօրվա դատական նիստը հետաձգվեց` ամբաստանյալ Հերիքնազ Խաչատրյանի երկու պաշտպանների բացակայության պատճառով:

Դատարանը, նախագահությամբ Արշակ Վարդանյանի, ներկաներին տեղեկացրեց, որ պաշտպաններ Հրանտ Գևորգյանը և Մերուժան Մկրտչյանը պատշաճ կարգով ծանուցվել են, սակայն դատական նիստին չեն ներկայացել։ Նշենք, որ նախորդ դատական նիստին պաշտպանները ևս չէին ներկայացել:

Այսօր դատարանն ապահովել էր  գործով ամբաստանյալ Հերիքնազ Խաչատրյանի քրոջ՝ Բավական Խաչատրյանի ներկայությունը, ով սեռական շահագործման նպատակով մարդկանց հավաքագրելու համար 2014թ. դատապարվել է 11,5 տարվա ազատազրկման: Ընդ որում՝ նրան դատարանում հարցաքննելու վերաբերյալ  միջնորդություն ներկայացրել էր պաշտպանական կողմը:

Ըստ մեղադրանքի՝ Հերիքնազ Խաչատրյանը, բնակվելով Արաբական Միացյալ Էմիրությունների Դուբայ քաղաքում, ինչպես նաև Նելլի Ներսիսյանի ղեկավարությամբ զբաղվելով մարմնավաճառությամբ, միավորվելով վերջինիս և Հայաստանում բնակվող իր ավագ քրոջ՝ Բավական Խաչատրյանի, հետ, անդամագրվել է մարդկանց շահագործման նպատակով ստեղծված կազմակերպված խմբին, որի ղեկավարն է Նելլի Ներսիսյանը:

Նրանք իրենց հանցավոր մտադրությունն իրագործելու նպատակով կատարել են համապատասխան դերաբաշխում: Ըստ այդմ՝ Նելլի Ներսիսյանը, ղեկավարելով հանցավոր խմբի գործողությունները, անձամբ կազմակերպել է հավաքագրված անձանց մուտքի հրավեր ստանալը, կատարել նրանց Դուբայ տեղափոխելու հետ կապված ծախսերը, իսկ Հերիքնազ և Բավական Խաչատրյանները կատարել են կանանց հավաքագրման և Դուբայ տեղափոխելուն, փոխանցելուն, թաքցնելուն ուղղված գործողություններ: Հերիքնազ Խաչատրյանին մեղադրանք է առաջադրվել ՀՀ քրեական օրենսգրքի 2 հոդվածներով՝ ՀՀ քրեական օրենսգրքի 132-րդ և 34-132-րդ հոդվածների 3 մասի 1-ին կետով՝ կազմակերպված խմբի կողմից մարդու թրաֆիքինգը կամ շահագործումը և դրա փորձը: Նրա նկատմամբ որպես խափանման միջոց է ընտրվել կալանավորումը: