Փաստ ինֆո

Ռուսաստանի Քննչական կոմիտեի աշխատակիցներն աշխատանքի ընթացքում կիրառում են հոգեբանական մեթոդիկա, որը ներառում է մարդու  «սուպերհիշողության ռեժիմը»:  «newsru.com»-ի փոխանցմամբ, այս մասին պատմել է գերատեսչության պաշտոնական ներկայացուցիչ Վլադիմիր Մարկինը «Россия 24»  հեռուսաալիքի եթերում: Նա ընդգծել է, որ այդպիսի մեթոդը կարող է վտանգավոր լինել միայն հոգեկան հիվանդ մարդկանց համար:

«Ցանկացած մարդու գիտակցության  մեջ կա այսպես կոչված  «սուպերհիշողության» ռեժիմ: Մենք ունենք հիշողության ակտիվացման մասնագետներ, ովքեր  մարդու հետ աշխատելիս հնարավորություն են տալիս նրան հիշելու այնպիսի դեպքեր, այնպիսի հանգամանքներ, որոնց մասին նա անգամ չէր կասկածի, որ հիշում է»,- վկայակոչում  է Մարկինի բառերը «Интерфакс»-ը:  Նա ավելացրել է, որ նման մեթոդները կիրառվում են, «երբ անհրաժեշտ է լինում հիշել հանցագործի կերպարը, բուն պատահարը, հանցագործությունը կամ դրա հաջորդականությունը, ինչ-որ տարրեր, մանրամասներ»:

Որպես կանոն, նշել է Մարկինը, հիշողության ակտիվացման մասնագետ լինում է հոգեբանը: Աշխատելով մարդու հետ՝  նա «միացնում է նրա սուպերհիշողությունը և դրանից հետո արդեն աշխատում է քննիչը, ով, ստանալով լրացուցիչ տեղեկատվություն, անցկացնում է դատավարական հարցաքննություն և արտացոլում ցուցմունքները արձանագրության մեջ: Այդ ժամանակ արդեն դա ապացույց է հանդիսանում»,-  ասել է ՔԿ պաշտոնական ներկայացուցիչը:

Մարկինն ավելացրել է, որ խոսքը գնում է հիպնոսի մասին և տվյալ մեթոդն «վտանգավոր չէ մարդու համար, այն կարող է վտանգավոր լինել միայն հոգեկան հիվանդ մարդու համար»:

Քննչական կոմիտեի տվյալներով,  2015թ. Ռուսաստանում սպանությունների բացահայտման ցուցանիշը կազմել է 93%, որը  4% -ով ավելին է անցյալ տարվա ցուցանիշից:  «Եթե համեմատենք այլ երկրների հետ, ապա  օրինակ, Գերմանիայում սպանությունների բացահայտումը կազմել է  95%,  Կանադայում՝  70%,  իսկ  այ  ԱՄՆ-ում՝  64%  է»,- նշել է Մարկինը: