Փաստ ինֆո

 Աշխարհահռչակ ֆրանսահայ շանսոնյե Շառլ Ազնավուրը Pleine Vie ամսագրին տված հարցազրույցում  խոսել նաև Հայոց ցեղասպանության, իր մանկության մասին։


Լրագրողը նշել է, որ երգչի մայրը Հայոց ցեղասպանության ժամանակ կորցրել է իր գրեթե ողջ ընտանիքը, և հարցրել, թե ինչ ազդեցություն է դա ունեցել երգչի հետագա կյանքի վրա։


Ի պատասխան Ազնավուրը նշել է, որ շատ կցանկանար չլինել ներգաղթյալի որդի, սակայն «այդպես է դասավորվել կյանքը»։ Նա պատմել է, որ 14 տարեկանում Ֆրանսիայում ծնողների փաստաթղթերի հարցով մոտեցել է համապատասխան մարմնի պատուհանին և սկսել բղավել, որ ֆրանսիացի է։


Ազնավուրը մեծ ցանկություն է ունեցել ինտեգրվելու ֆրանսիացիներին։ Նա պատմել է, որ 4 տարի շարունակ իր ծնողների ընկերներն օգնել են իր ընտանիքին թղթեր ստանալու հարցում։ Ազնավուրը հուզված նշել է, որ այդ հիշողությունները շատ խորն են։


Լրագրողի այն հարցին, թե ինչու է Հայոց ցեղասպանության ճանաչումն այդքան կարևոր, Ազնավուրը պատասխանել է. «Թուրք երիտասարդությունը հոգնել է, որ բոլորը նրանց են մատնացույց անում։ Իրենց տատիկներն ու պապիկները «հրաշալի» չեն եղել, սակայն սխալ է նրանց մեղադրելը կամ նույն հարթության վրա դնելը»։


Շառլ Ազնավուրը նշել է, որ Ցեղասպանության ճանաչումը կազատի երկու ժողովուրդներին և կբացի հայ-թուրքական փակ սահմանները։


Նա շեշտել է, որ ֆրանսիացի է և շատ է սիրում Ֆրանսիան՝ չնայած, որ սիրում է նաև Հայաստանը։ Երգիչը նշել է, որ այն հայերից չէ, ովքեր բացականչում են «Լավ թուրքը մեռած թուրքն է»։

Ազնավուրը հորդորել է, որ մարդիկ պետք է իրենց երեխաների մեջ մարդկայնություն սերմանեն։