Փաստ ինֆո

«Վաղը որևէ իրավաբան կարող է քննիչին ասել` դու նախաքննություն իրականացնելու իրավունք չունես, դու միայն կազմակերպում ես նախաքննությունը»,- այսօր լրագրողների հետ հանդիպմանը նման կանխատեսում արեց «Սարգսյան իրավաբանական խումբ» իրավաբանական միավորման ղեկավար, իրավաբան Տիգրան Սարգսյանը` վկայակոչելով Սահմանադրական բարեփոխումների նախագծի այն դրույթը, որը քննչական մարմիններին վերագրում է «նախաքննությունը կազմակերպելու», այլ ոչ թե իրականացնելու լիազորություն:

Սահմանադրության նորմերը պետք է լինեն պարզ և որոշակի, նշեց Տիգրան Սարգսյանը` հավելելով, որ հակառակ պարագայում այն ընկալելի չէ հանրության, անգամ` իրավապաշտպանների, լրագրողների համար:

«Փաստինֆո»-ի դիտարկմանը, թե նախագծի հեղինակներն ու իշխանության ներկայացուցիչ իրավաբաններն անվերապահորեն գովաբանում են նախագիծը, մինչդեռ, նրանց հակառակորդները, ճիշտ հակառակը՝ անխնա քննադատում: Այս պարագայում հասարակությունն ինչպես կողմնորոշվի, ի վերջո, լա՞վն է նախագիծը, թե՞ վատը` Տիգրան Սարգսյանը խորհուրդ տվեց հասարակության յուրաքանչյուր անդամի նախ ինքնուրույն ընթերցել այն, նշելով, թե անգամ իրեն ծանոթ շատ իրավաբաններ խոստովանել են, որ չեն կարդացել նախագիծը, քանի որ այն իրենց չի հետաքրքրել: Բացի այդ, բանախոսը կարծիք հայտնեց, որ ճշմարտությունը ծնվում է բանավեճի ընթացքում, ուստի իր համոզմամբ նախագծի շուրջ պետք է տարբեր կարծիքներ ունեցողների բանավեճեր տեղի ունենան, որպեսզի հանրությունը կողմնորոշվի՝ այո է ասելու Սահմանադրության նախագծին, թե ոչ: