Փաստ ինֆո

«Հղի Մերի Վաղինակի Մարգարյանը, 26 տարեկան, «Հղիություն 35 – 36 շաբաթական, ձախակողմյան պիելոնեֆրիտ, սուր ռեսպիրատոր հիվանդություն, հղիների անեմիա» ախտորոշմամբ հոսպիտալացվել է «Շենգավիթ» ԲԿ հղիների պաթոլոգիայի բաժանմունք ս. թ. հուլիսի 26 – ին, ժամը 16:20, բավարար վիճակում։ Ընդունման պահին հղին գանգատվել է ընդհանուր թուլությունից, ձախ գոտկային շրջանում բութ ցավերից, բարձր ջերմությունից»,- ասված է «Շենգավիթ» ԲԿ–ի տնօրինության տարածած հայտարարության մեջ:

«Հոսպիտալացման պահից սկսվել է դեզինտոկսիկացիոն, ինֆուզիոն, հականեմիկ և հակաբակտերիալ բուժում։ Հոսպիտալացման հաջորդ օրն առավոտյան հղին գանգատվել է ընդհանուր թուլությունից, հևոցից, հաճախշնչությունից, հազ չի նշել, ջերմությունը եղել է 37,8o C։ Այդ կապակցությամբ քանիցս զննվել է մասնագետների կողմից, իրականացվել են լաբորատոր և թոքերի ռենտգեն–հետազոտություններ, որոնց արդյունքում թոքաբորբ չի հայտնաբերվել։ Քիչ ուշ անալիզներում փոփոխությունների գրանցման կապակցությամբ հրավիրվել է կոնսիլիում, որոշվել է իրականացնել հեպատոլոգի և նեյրոօֆթալմոլոգի խորհրդատվություն։ Վերջինիս զննման արդյունքում կասկածվել է սուբարախնոիդալ արյունազեղում, ինչի պատճառով էլ որոշվել է հղիին տեղափոխել բազմապրոֆիլային բուժհաստատություն` ախտորոշումը հերքելու կամ հաստատելու և հետագա բուժումը կազմակերպելու նպատակով։ Ժամը 15:00 հիվանդը շտապ օգնության մեքենայով տեղափոխվել է «Էրեբունի» ԲԿ»։

Հենց «Էրեբունի» հիվանդանոցում էլ Մերի Մարգարյանի մոտ երկկողմանի թոքաբորբ են հայտնաբերել: Ինչպես մեզ հետ զրույցում հայտնել էին հիվանդանոցից, «35 շաբաթական հղի կնոջ մոտ հիվանդանոց ընդունվելիս ախտորոշվել է «երկկողմանի թոքաբորբ, պոլիօրգանային անբավարարություն»:  «Էրեբունի» ԲԿ-ից մեզ նաև հայտնել էին, որ  որ ծննդկանի վիճակն արդեն իսկ անհուսալի է եղել, ուստի բժիշկները որոշել են դիմել ծայրահեղ քայլի` կեսարյան հատում կատարել: Բայց նրա կյանքն այլևս փրկել չի հաջողվել: Ծայրահեղ ծանր վիճակում ծնված երեխան ևս 2 օր անց մահացել է :

Հիշեցնենք, հունիսի 29-ին, «Էրեբունի» բժշկական կենտրոնում  մահացած 26-ամյա Մերի Մարգարյանի հարազատները կատարվածի համար մեղադրում են «Շենգավիթ» բժշկական կենտրոնի բժշկուհի Շուշանիկ Բախշյանին: Հարազատները նշում են, որ հղի կինը 4 օր շարունակ բարձր ջերմություն է ունեցել, բայց միայն հուլիսի 26-ին են նրան հիվանդանոց ընդունել, իսկ հաջորդ օրն արդեն խորհուրդ են տվել տեղափոխել այլ հիվանդանոց` «Էրեբունի» ԲԿ, որտեղ էլ նա մահացել է: