Փաստ ինֆո

Աղմկահարույց օֆշորի գործով դատաքննությունն այսօր սկսվեց ավելի քան 2 ժամ ուշացումով: Պատճառը՝ դատավորի զբաղվածությունն էր:

Դատական նիստում շարունակվեց ամբաստանյալ Աշոտ Սուքիասյանի գործունեությունից տուժող գործարար Փայլակ Հայրապետյանի հարցաքննությունը:

Այսօր գործարարը կրկին նշեց, որ մինչ այդ ամբաստանյալին չի ճանաչել և վստահել է նրան միայն այն պատճառով, որ գործին խառվվել են նախկին նախարար Ներսես Երիցյանը, նախկին վարչապետ Տիգրան Սարգսյանը, Նավասարդ արք. Կճոյանը:

Հենց նրանց ներկայացրած՝ Հայաստանում ադամանդագործության զարգացման ծրագրին վստահելով էլ իր ամբողջ գույքը գրավադրել է «Ամերիաբանկ»-ում՝ 12 մլն դոլարի վարկի դիմաց: Բանկում կազմված բիզնես ծրագրի համաձայն, Աշոտ Սուքիասյանն Աֆրիկյան Սիեռա Լեոնեում հանքեր ուներ, որտեղից Հայաստան պիտի ներմուծեր ոսկու ու ադամանդի հումք: Դրանց վերամշակման համար Փայլակ Հայրապետյանն արդեն արտադրություն էր հիմնել, հրավիրել ՀՀ լավագույն մասնագետներին: Բայց ողջ ունեցվածքը գրավադրելուց 5 ամիս հետո հասկացել էր, որ խաբված է ու որ Աշոտ Սուքիասյանը ոչ մի հանք էլ չունի:

Աշոտ Սուքիասյանը տուժողին հարց ուղղեց՝ նշելով, որ 2012-ի հոկտեմբերին Փայլակ Հայրապետյանն իրեն ռուսերենով նամակ է գրել, որ, եթե իր ամբողջ ունեցվածքը չգրանցի Հայրապետյանի անունով, վատ կլինի, եթե համաձայնի, իրեն այլևս չեն մեղադրի: «Եթե որևէ ունեցվածք չունեի, ինչպես ասում եք, ի՞նչ պիտի գրանցեի»,- հարցրեց ամբաստանյալը:

Փայլակ Հայրապետյանի շահերի ներկայացուցիչը չհերքեց, որ այդպիսի նամակ եղել է, բայց և ասաց. «Ուզում էինք համոզվել, թե ինչ ունի: Էդպես էլ ոչինչ ցույց չտվեց»:

Այսօր դատարանում Փայլակ Հայրապետյանը դարձյալ հիշատակեց Տիգրան Սարգսյանի անունը՝ որպես իր հարստահարման հիմնական մեղավորի: Դատավորի հարցին, թե կոնկրետ ի՞նչ գործ է ունեցել նրա հետ, գործարարը պատասխանեց. «Եթե նախարարներն ինձ խաբել են, հենց նա է պատասխանտու դրա համար»:

Հիշեցնենք, նախորդ նիստերից մեկում Փայլակ Հայրապետյանն արդեն փորձել է դատարանին միջնորդություն ներկայացնել՝ նախկին վարչապետ Տիգրան Սարգսյանին, Նավասարդ արք. Կճոյանին, էկոնոմիկայի նախկին նախարար Ներսես Երիցյանին, Ֆինանսների նախկին նախարար Դավիթ Սարգսյանին, ամբաստանյալ Աշոտ Սուքիասյանի կնոջը, հաշվապահին, «Ամերիա» բանկի  և «Արմսվիստ» բանկի մի շարք պաշտոնատար աշխատակիցներին, Բելառուսի քաղաքացի՝ գործով անցնող Տրիկոզյուկին, ինչպես նաև Ազգային անվտանգության կոմիտեի նախագահին դատակոչելու վերաբերյալ, սակայն  դատավորն առաջարկել էր հետաձգել միջնորդությունը մինչև վկաների դատակոչի փուլին հասնելը:

Իսկ դատական հաջորդ նիստին՝ օգոստոսի 6-ին, դատարանը կանցնի ամբաստանյալի հարցաքննությանը: