Փաստ ինֆո

ՀՀ կառավարության այսօրվա նիստում որոշում կայացվեց ՀՀ պաշտպանության նախարարությանն ամրացված մի շարք մարզային կառույցներ ՀՀ Քննչական կոմիտեի դեպարտամենտին հանձնելու մասին: Դրանք են՝ Գեղարքունիքի մարզի Սևան քաղաքի, Տավուշի մարզի Իջևան քաղաքի և Վայոց Ձորի մարզի Եղեգնաձոր քաղաքի ՀՀ ՊՆ քննչական ծառայությանը պատկանող վարչական շենքերը:

Որոշման ընդունումը պայմանավորված է այն հանգամանքով, որ Քննչական կոմիտեի համակարգում ներառվում է զինվորական քննչական գլխավոր վարչությունը և կայազորային քննչական բաժինները, որոնք ձևավորվել են ՀՀ պաշտպանության նախարարության քննչական ծառայության հենքի վրա: Ուստի և ՊՆ քննչական ծառայության կողմից օգտագործվող վարչական շենքներն իրենց գույքով ու մատուցվող ծառայություններով անհատույց փոխանցվում են ՀՀ քննչական կոմիտեին:

Առաջին հայացքից այս պարզ ու տրամաբանական որոշումը, որն այսօր կառավարությունը միաձայն ընդունեց՝ գրեթե առանց քննարկումների, իր մեջ մի շատ տարօրինակ դրույթ է պարունակում: Այսպես՝ Տավուշի մարզի Իջևան քաղաքի Աղայան 12 հասցեում գտնվող շենքի հետ միասին Քննչական կոմիտեին է փոխանցվում նաև «Գազպրոմ Արմենիա» ՓԲԸ-ին ունեցած 33 352 720 դրամ 36 լումա պարտքը: Ընդ որում, այն ենթակա է վճարման մինչև 2015 թվականի օգոստոսի 4-ը: Եվ այս պարտավորությունը ևս Քննչական կոմիտեն ստանում է շենքի հետ միասին՝ որպես նվեր:

Կառավարության կայքում ներկայացված որոշման նախագծից պարզ է դառնում, որ Քննչական կոմիտեն այս պարտքի մարումն անհնար է համարել և համապատասխան առաջարկություն ներկայացրել կառավարություն:

«Նշված վարչական շենքերում քննչական կոմիտեի զբաղեցրած տարածքների կոմունալ-կենցաղային ծախսերի դիմաց վճարումները մեր կողմից հնարավոր կլինի իրականացնել միայն 2016 թվականի հունվարի 1-ից՝ 2016 թվականի բյուջեում համապատասխան ֆինանսներ նախատեսելով»,- ներկայացնում է Քննչական կոմիտեն՝ հավելելով. «Նման մոտեցումը թույլ կտա 2016 թվականի բյուջետային հայտում 2015 թվականին ներառել համապատասխան հաշվարկներով հիմնավորված ֆինանսական միջոցներ, իսկ ՀՀ քննչական կոմիտեն հնարավորություն կունենա կնքել պայմանագրեր համապատասխան ծառայություն մատուցող կազմակերպությունների հետ որպես բաժանորդ»:

Կառավարությունը, սակայն այս առաջարկությունը չի ընդունել՝ պատճառաբանելով. «Չի ընդունվել, քանի որ ՀՀ ՊՆ բյուջեի տնտեսագիտական դասակարգման համապատասխան հոդվածներով նախատեսված չէ քննչական կոմիտեին որոշմամբ ամրացվող շենք-շինությունների կոմունալ-կենցաղային  ծախսերը»:

Իսկ որտեղի՞ց է ՀՀ ՊՆ Սևանի քննչական բաժինը 33 մլն-ից ավելի պարտք կուտակել «Գազպրոմ Արմենիա»-ին:

Այս հարցի պատասխանը ևս տրված է հենց նախագծում: Որոշման նախագծի «Առաջարկություններ» բաժնում գրված է. «Իջևան քաղաքի Աղայան 12 հասցեում գտնվող շենքը ՀՀ պաշտպանության նախարարության կողմից 2014 թվականին «Գազպրոմ Արմենիա» ՓԲԸ-ից ձեռք է բերվել այն պայմանով, որ շենքը հետագայում պետք է փոխանցվի ՀՀ քննչական կոմիտեին` փոխանցման արդյունքում ձեռքբերման արժեքը վճարելու պայմանով»:

Ասել է թե՝ կուտակված 33 մլն դրամի պարտքը ոչ թե սպառված գազի դիմաց չվճարված գումար է, այլ հենց շենքի արժեքը: Այսինքն՝ ՊՆ-ն մեկ տարի առաջ շենք է գնել «Գազպրոմ Արմենիա»-ից ու չի վճարել դրա դիմաց՝ իմանալով, որ մեկ տարի անց շենքի սեփականատերը փոխվելու է: Ու հիմա, փաստորեն, Քննչական կոմիտեն պետք է վճարի մասնավոր ընկերությանը իրեն «անհատույց» փոխանցված շենքի արժեքը: