Փաստ ինֆո

Իր հարևանի սպանության մեջ մեղադրվող  25-ամյա Արթուր Ազատյանն այսօր իր դատաքննական  ցուցմունքում հայտարարեց, որ ինքը սպանել է հարևանին անհրաժեշտ պաշտպանության սահմաններում: Ըստ ամբաստանյալի, տուժողն իրեն կոկորդից բռնել էր, որի հետևանքով ինքը խեղդվում էր, և քանի որ հարևանն ավելի ուժեղ էր, թափով ու ավելի տարիքով ձեռքն ընկած առաջին  առարկայով, ինչպես հետագայում է պարզվել՝ դանակով, հարվածել է տուժողին ու սպանել:

Ա.Ազատյանը հերքեց, որ  վիճաբանությունը հարևանի հետ ծագել էր իրեն «եզո»  անվանելու հարցի շուրջ: Ամբաստանյալը հայտարարեց, որ տուժողն է նախահարձակ եղել, սակայն ո՞րն է եղել պատճառը,  ամբաստանյալն ասաց. «Չեմ կարող ասել»:

 Ամբաստանյալը հայտնեց, որ հարվածելուց 15 րոպե հետո ինքը զանգահարել է շտապօգնություն, որը ժամանել է տասը րոպե հետո, մինչ բժիշկների ժամանումը, տղամարդն արդեն  մահացած էր:

Ամբաստանյալը հայտարարեց նաև, որ իրեն ոստիկանությունում ծեծել են՝  ասելով, «ասա, որ դու ես արել»: 

Այսօր հայտարարվեց դատաքննության ավարտի մասին, հաջորդ դատական նիստում մեղադրական ճառով հանդես կգա մեղադրողը: 

Հիշեցնենք, որ ըստ մեղադրանքի, Արթուր Ազատյանը 2014թ. նոյեմբերի 6-ին, ժամը 21:00-ի սահմաններում իր  տանը՝ գտնվելով ալկոհոլային հարբածության վիճակում, իրեն «եզո» անվանելու հարցի շուրջ վիճաբանել է իր հարևանի հետ, որի ընթացքում վերջինիս ապօրինաբար  կյանքից զրկելու դիտավորությամբ խոհանոցային դանակով մեկ անգամ հարվածել է նրա որովայնի ձախ շրջանին և  կյանքի հետ անհամատեղելի վնասվածքներ պատճառելով՝ սպանել է նրան:

Ա.Ազատյանին մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով՝ սպանություն: