Փաստ ինֆո

«Կիպրոսի Հանրապետությունից առայժմ չի ստացվել միայն փաստաթղթերի ստորագրությունների բնօրինակները, որպեսզի կարողանան փորձաքննություն իրականացնել»,- օֆշորի գործով Աշոտ Սուքիասյանի նկատմամբ դատական նիստում այսօր հայտարարեց  դատավոր Վլադիմիր Գրիգորյանը՝ արձագանքելով տուժող գործարար Փայլակ Հայրապետյանի հայտարարությանը, թե պետական մարմինները բոլորն անզոր են եղել այդ գործում, ուստի ինքն անձամբ է մեկնել Աֆրիկա՝ պարզելու՝ ունի՞ Աշոտ Սուքիասյանը Սիերա Լիոնեում ադամանդի հանք, թե ոչ:

Աշոտ Սուքիասյանի պաշտպան Յուրիկ Խաչատրյանն էլ հայտարարեց, որ իր պաշտպանյալին պատկանող հանքի մասին վկայող փաստաթղթերն ինքն է դիմել և ստացել Աֆրիկայից:

Գործարար Փայլակ Հայրապետյանին հարցեր ուղղելուց առաջ ամբաստանյալ Աշոտ Սուքիասյանի պաշտպան Յուրիկ Խաչատրյանը հայտարարություն հնչեցրեց, որ գործը  միակողմանի է լուսաբանվել ու ներկայացվել հասարակությանը, քանի որ մինչ իր պաշտպանյալը կալանքի տակ էր, Փայլակ Հայրապետյանը հարցազրույցներ էր տալիս՝ միակողմանի ներկայացնելով կատարվածը:

Հարցին, թե, վստահելով ու իր կարողությունները հանձնելով Աշոտ Սուքիասյանին, նրա հետ կիսե՞լ է նաև բիզնեսի ռիսկը, Փայլակ Հայրապետյանը դարձյալ շեշտեց, որ ինքը վստահել է կառավարությանը:

Տուժողին հարց ուղղելուց առաջ ամբաստանյալ Աշոտ Սուքիասյանն էլ նախ հայտարարություն արեց, թե իր կամքով է եկել Վրաստան, որպեսզի այնտեղից Հայաստան վերադառնա, բայց իրեն այնտեղ բռնել են: Ապա հարց ուղղեց Փայլակ Հայրապետյանին, թե պատկերացրե՞լ է արդյոք, թե որքան գումար է հարկավոր 10 000 աշխատատեղ հիմնելու համար, որի մասին դատական նիստի ամբողջ ընթացքում շեշտում է:

«Մենք պայմանավորվածություն չենք ունեցել, որ ես իմ ունեցվածքը տամ իրեն: Մենք պայմանավորվել ենք, որ ես էդ գումարները պիտի տամ էդ 23 կազմակերպություններին, որ 10 000 աշխատատեղ բացեն»,- ասաց Հայրապետյանը՝ հավելելով, որ պայմանավորվածություն է եղել տեխնիկա ձեռք բերելու, որը չի արվել: «Փոխարենը փողերի լվացում են արել, ոսկի են առել»,- հայտարարեց Փայլակ հայրապետյանը՝ հավելելով. «Ես ինչ իմանայի, որ Աշոտ Սուքիասյանը ՀՀ վարչապետի հետ միասին, ՀՀ կաթողիկոսից հետո երկրորդ մարդու հետ պայմանավորվել են, որ իմ գումարները վերցնեն ու ինձ խաբեն»:

«Ասում էիր՝ ես քո տղան եմ»,- դիմելով Հայրապետյանին՝ ասաց Աշոտ Սուքիասյանը: «Ես չգիտեի, որ դու սենց վատ զավակ ես»,- արձագանքեց Հայրապետյանը:

«Հայրապետյանը հայտարարում է, որ ես Աֆրիկայում ոչ մի հանք չեմ ունեցել, հող չեմ ունեցել»,- ասաց Աշոտ Սուքիասյանը՝ հարցնելով, թե «եթե ես ոչինչ չեմ ունեցել, ինչպե՞ս է Հայրապետյանն իմ հանքերով պայմանագրեր կնքել Ռուբիկ Մինասյանի հետ»: «Ես այդ պայմանագիրը բերել եմ, որ տամ բանկին, որ 6 ամսով իմ գումարները կանգնեցնեն»,- ասաց նա:

Ի դեպ, այսօր դատական նիստում հայտարարվեց, թե հենց Ռուբիկ Մինասյանն է եղել այն մարդը, որի հաշվի վրա են առաջին անգամ փոխանցվել Փայլակ Հայրապետյանի ունեցվածքի դիմաց ստացված վարկային միջոցները:

Աշոտ Սուքիասյանը նաև տեղեկացրեց, թե Ռուբիկ Մինասյանին այդ ընթացքում ձերբակալել են զեղծարարության համար: «Հայրապետյա՛ն, ինչո՞ւ չես ուզում խոստովանել, որ ուզում էիր ինձանից իմ բիզնեսը խլել»,- դիմելով տուժողին ասաց ամբաստանյալը: Այս դիտարկումը զայրացրեց Փայլակ Հայրապետյանին: Դատավորն ստիպված եղավ միջամտելու՝ լռեցնելու համար  աղմուկը: «Դրանք նման էին էն սոված գայլերին, որ ընկել էին, ուզում էին իմ ունեցվածքը վերցնեն՝ և՛ բանկը, և՛ վարչապետը, և՛ Կճոյանը»,- ասաց Փայլակ Հայրապետյանը:

Այսքանով տուժողին ուղղված հարցերն սպառվեցին, նիստն ավարտվեց: Իսկ  հաջորդ նիստը նշանակվեց հաջորդ հինգշաբթի օրը՝ հուլիսի 23-ին: