Փաստ ինֆո

Իշխանության ներկայացուցչի նկատմամբ բռնություն գործադրելու մեջ մեղադրվող 28-ամյա Նարեկի գործով դատաքննությունն ավարտվեց և դատարանն անցավ դատական վիճաբանությունների փուլին:

Իսկ մինչ այդ, այսօր, դատարանում վերարտադրվեց դեպքի օրը 3 տարբեր լրատվամիջոցների կատարած նկարահանումները պարունակող սկավառակները, որոնք դատարանին ներկայացվեցին  պաշտպանական կողմի միջնորդությամբ:

Նշենք, որ նախորդ դատական նիստում պաշտպանական կողմը միջնորդել էր գործին որպես ապացույց կցել այդ սկավառակները և լուսանկարներ:

Դատարանում հետազոտված սկավառակներում պարզ երևում է, թե ինչպես են Նարեկին բերման ենթարկում կանգնած տեղից՝ նրա  ձեռքերից ոտքերից բռնած տեղափոխելով ոստիկանական ավտոմեքենա:

Նշենք, որ, ըստ վկա Խաչատուր Հովակիմյանի դատաքննական ցուցմունքի, ինքն անձամբ է Նարեկին բերման ենթարկել, սակայն նրա  ներկայացրած  իրավիճակն ու տեսագրությունների բովանդակությունը տարբեր էին։ Ըստ տեսագրության  Նարեկին Խ.Հովակիմյանը չի բերման ենթարկել։ Ավելին՝ Նարեկին բերման  ենթարկելիս  մի կին Խաչատուր Հովակիմյանին հարցնում է, թե ինչու այդ տղային տարան, ինչի ի պատասխան Հովակիմյանն ասում է, որ  չգիտի:

Նշվածի վերաբերյալ մեղադրողը կարծիք հայտնեց, որ ոստիկան վկան, ասելով բերման ենք ենթարկել, նկատի է ունեցել ընդհանրապես ոստիկաններին եւ ոչ թե կոնկրետ իրեն։ Այստեղ էլ հակադարձեց պաշտպանական կողմը՝ նշելով, որ վկան դատարանում հայտնել է, որ Նարեկին բերման են ենթարկել թևերը ոլորելով՝ 2 հոգով, սակայն  տեսանյութում երևում է, որ Նարեկին ձեռքերից ոտքերից գրկած են բերման ենթարկել:

Հաջորդ տեսանյութում երևում էր, որ Նարեկը ցույցի ընթացքում որևէ ակտիվ գործողություններ  չի կատարել։ Ինչ վերաբերում է այն պատճառաբանությանը, թե նա  փախուստի է դիմել, հետևել են ու բռնել, ապա պաշտպանական կողմը նշեց, որ տվյալ վայրում մարդկանց քանակն այնքան շատ է եղել, որ Նարեկը չէր կարող նրանց միջով վազեր և փախուստի դիմեր, որ նրան էլ բերման ենթարկեին:

Տեսանյութերն ուսումնասիրելուց հետո պաշտպանական կողմը նաև նշեց, որ ցուցարարների և ոստիկանների միջև բախումներ են եղել,  քաշքշել  միմյանց և չի բացառվում, որ այդ քաշքշուկի ընթացքում էլ տուժողը վնասվածք ստանար:

Նշված  տեսանյութերը գործին կցելու պաշտպանական կոմի միջնորդությանը մեղադրողը դեմ էր՝  նշելով, որ այն ենթակա է մերժման։ Դատախազի խոսքերով, եթե ոստիկանությունը ցանկանար որևէ մեկի «գլխին սարքեր», ապա կաներ դա ցույցին ակտիվ մասնակցություն ցուցաբերած այլ անձանց նկատմամբ և ոչ թե Նարեկի:

Դատարանը պաշտպանական կողմի միջնորդությունը բավարարվեց մասնակի, ներկայացված սկավառակներից միայն երկուսը  որպես այլ ապացույց կցվեց գործին:

Որպես այլ ապացույց գործին կցվեց նաև լուսանկարները:

Հաջորդիվ պաշտպանական կողմը հանդես եկավ միջնորդությամբ՝ դեպքի վայրում՝ Սարյան 22 շենքի մոտ քննչական փորձարարություն կազմակերպելու նպատակով՝ պարզելու, թե ինչպիսի դիրքում է կանգնած եղել Նարեկը և տուժողը, ինչպես է հարվածը տեղի ունեցել, նկարագրվող դիրքից հնարավոր էր, որ տուժողը հարված ստանար նշված հատվածում:

Այս միջնորդությունը մեղադրողին զավեշտալի թվաց: «Ու՞մ պետք է գտնենք, որ համաձայնի հարվածեն իր հետույքին,- ասաց նա:

Միջնորդությունը մերժվեց:

Դեպքի վայրի զննության վերաբերյալ պաշտպանական կողմի միջնորդությունը ևս մերժվեց:

Նշենք նաև, որ պաշտպանական կողմի միջնորդությամբ այսօր դատարան էր հրավիրվել նաև  փորձագիտական եզրակացություն տված փորձագետ Արսեն Բաբայանը:

Եզրակացության մեջ նշվել է, որ տուժողին պատճառվել են վնասվածքներ բութ և կոշտ առարկաներով, չի բացառվում՝ նաև ձեռքերով և ոտքերով:

Ըստ փորձագետի՝ փորձաքննությունն անցկացվել է օբյեկտիվ զննությամբ, լաբորատոր փորձաքննության անհրաժեշտություն չի եղել:

Պաշտպանական կողմի հարցադրմանը, թե արդյոք փորձաքննություն իրականացնելիս լուսանկարչական մեթոդ կիրառվե՞լ է, տուժողի ստացած վնասվածքը լուսանկարվել է, թե ոչ, փորձագետն ասաց, որ  չի իրականացվել, քանի որ այս մեթոդը կենդանի մարդկանց դեպքում չի կատարվում,  այլ միայն դիակի նկատմամբ:

Ինչ վերաբերում է նրան, թե տուժողը հնարավոր էր ավտոմեքենային հպվելու հետևանքով վնասվածք ստանար, փորձագետն ասաց, որ իրեն կոնկրետ առաջադրվել է հանգամանք՝ ձեռքերով և ոտքերով հարվածելու վերաբերյալ:

Ըստ մեղադրանքի՝ Նարեկը 2014թ. հունիսի 23-ին, ժամը 14:00-ի սահմաններում Երևան քաղաքի Սարյան փողոցի 22 շենքի մոտ տեղի ունեցող բողոքի ակցիայի ընթացքում ծառայողական պարտականությունները կատարելու կապակցությամբ կյանքի կամ առողջության համար ոչ վտանգավոր բռնություն է գործադրել իշխանության ներկայացուցիչ հանդիսացող` ՀՀ ոստիկանության Երևան քաղաքի վարչության ՊՊԾ գնդի երրորդ հատուկ գումարտակի ծառայող, ոստիկանության սերժանտ Կ. Սաղաթելյանի նկատմամբ, նրան պատճառելով առողջության թեթև վնասի հատկանիշներ չպարունակող մարմնական վնասվածքներ:

Նարեկին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով, նրա նկատմամբ որպես խափանման միջոց է ընտրվել չհեռանալու մասին ստորագրությունը: