Փաստ ինֆո

Արդեն շուրջ 20 օր է, ինչ Երևանի Շենգավիթ համայնքում և Վանաձորում մեկնարկել են պրոբացիոն ծառայության փորձնական ստորաբաժանումների աշխատանքները: Վեր հանված խնդիրները, արված ու անելիք աշխատանքները «Փաստինֆո»-ի հետ հարցազրույցում ներկայացնում է ՀՀ Արդարադատության փոխնախարար Սուրեն Քրմոյանը:

-Առաջին 20 օրվա ընթացքում նախ մենք փորձել ենք այդ փորձարարական ծրագրերում ներգրավված աշխատակիցներին շարունակական վերապատրաստում ապահովել: Այսինքն՝ այս ամբողջ ընթացքում, բացի փորձարարական տեղամասերի աշխատակիցներից, այնտեղ աշխատում են նաև մեր միջազգային փորձագետները, բացի այդ՝ ներկայում մենք տիպային փաստաթղթերի ձևեր ենք մշակում, դատապարտված անձանց ռիսկերի և վարքագծի գնահատման գործիքներ ենք մշակում և փորձում ներդնել այդ տեղամասերում: Տեղեկացնեմ նաև, որ մոտակա օրերին ծրագրում ենք նաև պիլոտային տեղամասերի և ծրագրի ղեկավարներին, ինչպես նաև նախարարության պատասխանատուին գործուղել Վրաստան, որտեղ կկարողանան ծանոթանալ, թե պրակտիկ ինչպես է պրոբացիայի ծառայությունը աշխատում Վրաստանում: Եվ փորձում ենք այս ընթացքում մեր փորձարարական տեղամասերը զինել համապատասխան գործիքներով, գիտելիքներով, համապատասխան փաստաթղթայն ձևերով:

- Առանց օրենսդրական կարգավորումների դժվար չէ՞ աշխատելը:

- Դե, իհարկե, առանց օրենսդրական կարգավորումների դժվար է աշխատել, դրա համար մենք փորձարարական տեղամասերում շեշտը դրել ենք այն գործառույթների վրա, որոնք կարելի է կատարել գործող օրենսդրության շրջանակներում կամ առանց հատուկ կարգավորումների: Մասնավորապես՝ եթե մենք խոսում ենք այլ պետական մարմինների հետ համագործակցության մասին, տեղեկացնեմ, որ մենք խնդրել ենք մեր բոլոր գործընկեր նախարարություններին՝ Աշխատանքի և սոցիալական հարցերի, Առողջապահության, Սպորտի և երիտասարդության, Ոստիկանությանը համապատասխան աշխատակիցներ առանձնացնել, որոնք կօգնեն մեզ պիլոտային տեղամասերում: Եթե մենք խոսում ենք դատապարտված անձանց վերասոցիալականացման մասին, նրանց համար որոշակի կրթական, մշակութային միջոցառումների կազմակերպման մասին, մենք այստեղ որևէ լրացուցիչ օրենսդրական կարգավորման կարիք չունենք: Միաժամանակ մենք մշակում ենք համապատասխան օրենսդրական փաթեթը և համապատասխան կարգավորումները՝ էլեկտրոնային մոնիթորինգի իրականացման համար, որովհետև, ինչպես գիտեք, պլանավորում ենք սեպտեմբեր ամսից փորձարարական տեղամասերում էլեկտրոնային մոնիթորինգի սարքերը փորձենք կիրառել, որպեսզի, երբ որ վերջնական որոշում ընդունվի և օրենսդրական փաթեթն էլ ընդունվի, մենք ունենանք ամբողջական օրենսդրություն և փորձարկված համակարգ, որպեսզի ծառայությունը բնականոն աշխատի և իր առջև դրված նպատակներին հասնի և խնդիրները լուծի:

-Պրոբացիոն ծառայությունը քաղաքացիական ծառայությո՞ւն է լինելու, թե՞ զինվորական:

- Հատուկ ծառայություն է լինելու: Մենք նախատեսում ենք հայեցակարգով, որ զինվորական ծառայություն չի լինելու: Այսինքն՝ նախատեսվում է, որ հատուկ համազգեստ չեն կրելու, հատուկ ուսադիրներ չեն կրելու, բայց ունենալու են հատուկ ծառայությանը բնորոշ դասային աստիճաններ, որովհետև պլանավորում ենք, որ առնվազն ծառայության 1/3-ից մինչև կեսը մենք տեղափոխման կարգով կնշանակենք գործող Այլընտրանքային պատիժների կատարման ստորաբաժանումից, ծառայության մնացած մասը կներգրավենք հոգեբաններ, սոցիալական աշխատողներ որոնք կօգնեն և կհամալրեն այդ ծառայությունն ու կապահովեն միջազգայնորեն սահմանված չափանիշներին համապատասխան գործունեությունը:

-Կարծում եք հեշտությա՞մբ կհամաձայնեն համազգեստից հրաժարվել այդ ծառայողները:

-Ասեմ, որ ներկայում էլ լուրջ քննարկումներ են տեղի ունենում: Իհարկե, մարդիկ, որոնք տասնյակ տարիներ կրում են համազգեստ, որոշակի դժվարություններ կառաջացնեն, բայց մենք փորձում ենք մշակվող օրենսդրության սահմաններում անել ամեն ինչ, որպեսզի նրանց սոցիալական երաշխիքները պահպանենք առնվազն նույն մակարդակով, ինչ ունեն քրեակատարողական ծառայողները: