Փաստ ինֆո

Հայոց ցեղասպանության ճանաչումը կարևոր է ոչ միայն Հայաստանի, հայ ժողովրդի, այլև՝ միջազգային հանրության համար՝ կանխարգելելու մարդկության դեմ նոր հանցագործությունները, նոր ցեղասպանությունները:  Բրազիլական  «Էստադաո»  թերթին տված հարցազրույցում նշել է ՀՀ արտգործնախարար Էդվարդ Նալբանդյանը: 

«Եվ այս է պատճառը, որ Հայոց ցեղասպանության, ինչպես նաև այլ ցեղասպանությունների ճանաչումն ու դատապարտումը չափազանց կարևոր է: Թերևս հնարավոր կլիներ կանխել մարդկության դեմ իրականացված նման այլ հանցագործությունները, եթե հարյուր տարի առաջ Հայոց ցեղասպանությունը պատշաճ կերպով ճանաչվեր և դատապարտվեր», - հավելել է ՀՀ արտաքին քաղաքական գերատեսչության ղեկավարն՝ ընդգծելով, որ  Հայոց ցեղասպանության 100-րդ տարելիցի ոգեկոչման հիմնական ուղերձն է՝   «Այլևս երբեք»:

ՀՀ ԱԳ նախարարը նշել է, որ  Հայոց ցեղասպանությունից հետո աշխարհն ականատես եղավ Շոային, Ռուանդայում, Կամբոջայում, Դարֆուրում և այլ վայրերում իրականացված ցեղասպանությունների: Միջազգային հանրությունը պետք է միավորի ջանքերը` մարդկության դեմ նոր հանցագործությունների կանխարգելման նպատակով:

ՀՀ ԱԳ նախարարը կարևորել է, որ մարտի 27-ին Ժնևում ՄԱԿ-ի Մարդու իրավունքների խորհրդում ընդունվեց Հայաստանի նախաձեռնած՝ Ցեղասպանության կանխարգելման վերաբերյալ բանաձև, որը համահեղինակեցին 72 պետություն, այդ թվում նաև` Բրազիլը: Բանաձևն ընդունվեց կոնսենսուսով:  «Գրեթե յուրաքանչյուր երկու տարին մեկ մենք նախաձեռնում ենք նմանատիպ բանաձև` նպատակ ունենալով կատարելագործելու կանխարգելման տարբեր մեխանիզմները: Կարևոր է, որ բանաձևն ընդունվեց Հայոց ցեղասպանության 100-րդ տարելիցի ոգեկոչման նախօրեին»,- ասաց Է.Նալբանդյանը:

ՀՀ ԱԳ նախարարը կարևորել է նաև, որ այս ապրիլին Եվրոպական խորհրդարանը Հայոց ցեղասպանության 100-րդ տարելիցի կապակցությամբ ընդունեց հատուկ բանաձև` հստակ ուղերձով:

 «Սա առաջին դեպքը չէ, երբ Եվրոպական խորհրդարանը ճանաչում է այն, սակայն նոր բանաձևը պարունակում է հստակ և պարզ ուղերձ Թուրքիային` առերեսվելու սեփական անցյալի հետ, ճանաչելու Հայոց ցեղասպանությունը և, այդպիսով, ճանապարհ հարթելու հայ և թուրք ժողովուրդների միջև իրական հաշտեցման համար»,-  ասել է Է.Նալբանդյանը:

Շատ կարևոր համարելով նորանոր երկրների կողմից  Հայոց ցեղասպանության ճանաչումը,  նախարարը հատուկ մատնանշել է   Գերմանիայի և Ավստրիայի կողմից իրականացված քայլերը՝   Գերմանիայի Նախագահի և Ավստրիայի խորհրդարանի հայտարարությունները  պարունակում են ոչ միայն Հայոց ցեղասպանության, այլ նաև հարյուր տարի առաջ տեղի ունեցածի համար պատասխանատվության իրենց մասնաբաժնի ճանաչում:  «Եվ մինչ Գերմանիան և Ավստրիան խոսում են պատասխանատվության իրենց բաժնի մասին, Թուրքիան՝   Օսմանյան կայսրության իրավահաջորդը, շարունակում է իր ժխտողական քաղաքականությունը։

Է.Նալբանդյանը նաև շատ կարևոր է համարել նաև  Բրազիլի Սենատի կողմից ընդունված բանաձևը՝  «սա առաջին քայլն է, և մենք հուսով ենք, որ այն կամբողջացվի այլ քայլերով՝ Բրազիլում պետական մակարդակով Հայոց ցեղասպանության ճանաչման նպատակով»:

Է՚.Նալբանդյանն   ընդգծել է Սուրբ Աթոռում կազմակերպված հատուկ պատարագի ընթացքում Հայոց ցեղասպանության վերաբերյալ Նորին Սրբություն Հռոմի պապի կողմից արված հայտարարության  կարևորությունն ու բարոյական նշանակությունը: 

Այդ կապակցությամբ Թուրքիայի քննադատությունն, ըստ Է.Նալբանդյանի,   Թուրքիայի, այլ ոչ թե Նորին Սրբության խնդիրն է՝  Նորին Սրբությունը ներկայացնում է աշխարհի 1,2 միլիարդ կաթոլիկներին և հանդիսանում է աշխարհի բնակչության այս շատ կարևոր հատվածի հոգևոր առաջնորդը։

Անկարան քննադատում է Եվրոպական խորհրդարանին՝ Հայոց ցեղասպանության կապակցությամբ նրա ընդունած բանաձևի պատճառով, հետ է կանչում իր դեսպաններին այն երկրներից, որոնք ճանաչում են Հայոց ցեղասպանությունը, ինչպես նրանք վարվեցին Բրազիլի Սենատի կողմից բանաձևի ընդունումից հետո:

«Էստադաո»-ի այն հարցին, թե  այս պահին Թուրքիայում ընթացող  քաղաքական փոփոխությունները  կարո՞ղ են որևէ ազդեցություն ունենալ Հայաստանի հետ հարաբերությունների վրա՝  Էդվարդ Նալբանդյանը նշել է, որ  անհրաժեշտ է հարգել ձեռք բերված համաձայնությունները և իրականացնել դրանք։

«Թուրքական կողմը հետ քայլ կատարեց։ Ի՞նչ տեղի կունենա ապագայում։ Վստահ եմ, որ վաղ թե ուշ մենք պետք է միասին շրջենք այս էջը... »,- նշել է  ՀՀ արտգործնախարարը՝  հավելելով.  ...բայց ոչ ժխտողականության քաղաքականությամբ։  «Շատ հստակ է, որ Հայաստանը երբեք հարցականի տակ չի դնի Հայոց ցեղասպանության փաստը, դրա միջազգային ճանաչման կարևորությունը։ Տեսե՛ք, թե որքան երկրներ և միջազգային կազմակերպություններ են ճանաչել Հայոց ցեղասպանությունը։ Իսկ Թուրքիան ձևացնում է, թե այն տեղի չի ունեցել, թե դա ցեղասպանություն չէ»: