Փաստ ինֆո

«Ժառանգություն» կուսակցության մամուլի քարտուղար Դավիթ Սանասարյանը քիչ առաջ Ազատության հրապարակում հացադուլ հայտարարեց ։ Նշենք, որ նա հանդես է գալիս  նաեւ որպես Էլեկտրաէներգիայի սակագնի բարձրացման դեմ բողոքի ակցիա իրականացնող նախաձեռնող խմբի հանրության հետ կապերի պատասխանատու։

Հացադուլ հայտարարելու իր որոշումը Դ.Սանասարյանը պատճառաբանեց  Ազատության հրապարակի սակավամարդությամբ։ Ըստ նրա՝ այն բանից հետո, երբ հայտարարվեց մեկ քայլ առաջ նախաձեռնության մասին, իշխանությունները խափանեցին իրենց խաղաղ ակցիան, եւ այդ գործողություններից հետո  Ազատության հրապարակն այս  պահին պետք է  բազմամարդ լիներ, ինչն այդպես չէ:

Նա իր հացադուլով մարդկանց կոչ է անում գալ Ազատության հրապարակ և վերադառնալ Բաղրամյան պողոտա:

Հիշեցնենք, որ Դավիթ Սանասարյանը Բաղրամյան պողոտայում հուլիսի 4-ին հայտարարել էր, թե շարունակում են  խաղաղ պայքարը եւ անցնում  վճռական փուլ: «Դիմում ենք իշխանություններին՝ Բաղրամյան պողոտան մենք չենք բացելու, քանի դեռ մեր պահանջները բավարարված չեն»,- հայտարարել էր Դավիթ Սանասարյանը՝ նշելով, որ վերջնաժամկետ է սահմանվել հուլիսի 6-ը՝ ժամը 21:00-ն, և եթե  պահանջներից գոնե մեկը չկատարվի ուրեմն սկսում ենք մեկ քայլ առաջ բողոքի ակցիան»:

Պահանջները նույնն էին՝ վերանայել և չեղյալ հայտարարել ՀԾԿՀ-ի կողմից ապօրինի կայացրած հոսանքի սակագնի որոշումը,  անցած տարվա սակագինը՝ նվազեցման նպատակով, պատժել բոլոր այն կարգազանց ոստիկաններին, ովքեր անօրինական կերպով հունիսի 23-ի առավոտյան բռնություններ գործադրեցին:

Սակայն այսօր՝ առավոտյան ոստիկանությունը  հանդես եկավ հայտարարությամբ  առ այն, որ պատրաստվում է վերականգնել Բաղրամյան պողոտայի՝ շուրջ երկու շաբաթ խաթարված երթևեկությունը, այդ թվում՝ դրան խոչընդոտող առարկաները պողոտայի երթևեկելի հատվածից հեռացնելու միջոցով:

 Վ.Օսիպյանն առաջարկեց  հավաքի կազմակերպիչներին և մասնակիցներին` այսօր մինչև ժամը 12.30-ը ինքնակամ վերացնել Բաղրամյան պողոտայի արգելափակումը: Ցուցարարները ինքնակամ չհեռացրեցին եւ ոստիկանությունը նախապես հայտարարած ժամանակահատվածից հետո առգրավեցին որպես բարիկադ օգտագործվող աղբամանները, բերման ենթարկվեցին պողոտայի երթեւեկելի հատվածում գտնվող ցուցարարներին եւ ժամը 13։20-ի սահմաններում վերականգնեցին պողոտայում երթեւեկությունը։