Փաստ ինֆո

Պահակակետում ինքնասպանություն գործած զինծառայող Մանուչար Մանուչարյանի զինակից ընկեր Լավրենտի Դավթյանը, ով Մանուչարի հետ իրականացրել է  պահակային ծառայություն, նրանից ոչ շատ հեռու լսել է 1 կրակահերթով 3 կրակոցի ձայն: Այս մասին այսօրվա դատական նիստում ասաց վկա Դավթյանը, ով  վերջապես ներկայացել էր դատարան։ Հիշեցնենք, որ նախկինում Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը մի քանի անգամ որոշում է կայացրել նրան բերման ենթարկելու մասին։

Վկան հայտնեց, որ դեպի օրը ինքը և Մանուչարը եղել են վերակարգում, պահակային ծառայություն  իրականացրել, ինքը ելել է 4-րդ, իսկ Մանուչարը 5-րդ դիտաշտարակի մոտ:  Ըստ վկայի՝ այս երկու դիտաշտարակների միջև հեռավորությունը մոտավորապես 20-25 մետր է, այդուհանդերձ նրա պնդմամբ չի լսել զենքը լիցքավորելու ձայն և չի տեսել բուն ինքնասպանության պահը, իսկ կրակահերթի ձայնը լսելուց հետո անմիջապես զանգահարել է և տեղեկացրել պահակապետին և նրա օգնականին:

Վկայի պնդմամբ՝ կրակահերթի ձայնը  լսել է հերթափոխն ընդունելուց հետո 45 րոպեից մինչև 1 ժամվա ընթացքում, սակայն մինչ այդ ինքը պարբերաբար տեսել է Մանուչարին։ Ըստ նրա, Մանուչարը  դիտաշտարակը չի լքել: «Եթե լքեր, ես կտեսնեի»,- ասաց նա:

Նշենք, որ դատաքննության ընթացքում հարցաքննված մի քանի վկաներ հայտնել են, որ դեպքից որոշ ժամանակ առաջ Մանուչարը լքել է դիտաշտարակը, եղել  զորանոցում, անգամ զուգարանի թուղթ է վերցրել, որից հետո վերադարձել է պահակային ծառայության:

Բնութագրելով սպանված զինակից ընկերոջը՝ վկան ասաց, որ նա նորմալ, համեստ տղա էր, արտառոց ոչինչ չի նկատել նրա մոտ, սակայն շփվող չի եղել:

Ամբաստանյալները ևս, ըստ վկայի բնութագրման, նորմալ տղաներ են։  Ինչ վերաբերում է  ամբաստանյալ Բաբկեն Գաբոյանին, ապա վկան հերքեց այն տեղեկությունները, որ նա արտոնյալ զինծառայող է եղել. «մյուսներից չի տարբերվել»:

Ինչ վերաբերում է զինակից ընկերոջ ինքնասպանություն կատարելուն, ապա վկան հայտնեց, որ մտքով չէր անցնի, որ Մանուչարը նման քայլի կգնա և ինքնասպան կլինի, սակայն նաև չբացառեց, տեղի ունեցածը, հնարավոր է, զենքի հետ վարվելու կանոնների խախտման արդյունք լինի:

Հաջորդ դատական նիստը տեղի կունենա հուլիսի 31-ին: