Փաստ ինֆո

22:50 Բաղրամյան պողոտայում մեկնարկել են հանրային քննարկումները, որոնց մասնակցում են բոլոր ցանկացող քաղաքացիները: Յուրաքանչյուրը հայտնում է իր կարծիքը պայքարի հետագա ընթացքի մասին: Քննարկումն անցնում է աղմկոտ ու ոչ այնքան կառուցողական մթնոլորտում: Հակառակ նախապես արված հայտարարությանը, «Ոչ թալանին» քաղաքացիական նախաձեռնությունն առ այս պահը Բաղրամյան չի եկել ու չի հայտարարել վերջնական որոշման մասին:

20:50 Բաղրամյան պողոտայում է Երևանի ավագանու «Բարև Երևան» խմբակցության անդամ Դավիթ Սանասարյանը, ով փորձում է բանակցություններ վարել ոստիկանների հետ՝ ՀՀ փոխոստիկանապետ Հունան Պողոսյանի գլխավորությամբ: Այս ընթացքում ցուցարարները միացրել են բարձրախոսները, որտեղիից երաժշտություն է հնչում:

20:43 Հրմշտոց է սկսվել ոստիկանների ու ցուցարարների միջև: Ցուցարարների շարքերում նրանց հետ բացատրական աշխատանք տանող Վալերի Օսիպյանն ու մի խումբ ոստիկաններ, նկատելով, որ ցուցարարները փորձում են բարձրախոսներ տեղադրել Բաղրամյան պողոտայի հակառակ կողմում՝ Բաղրամյան-Մոսկովյան անկյունում, փորձում են հասնել դրանց: Ցուցարարները փակում են ոստիկանների ճանապարհը՝ թույլ չտալով հասնել բարձրախոսններին ու վանկարկելով «հեռացեք»:

20:35 Բաղրամյան պողոտայում իրավիճակը լարված է: Ոստիկանությունն արգելում է ցուցարարների բարձրախոսներ միացնել: Փողոցի երկայնքով որպես բարիկադներ շարված աղբամանների հետևում շարվել են ոստիկանության «Հրեշտակների» և կարմիր բերետավորների ջոկատները: Ժողովուրդը պահանջում է ճանաչել իրենց ինքնաբուխ հավաք անցկացնելու իրավունքը: Վալերի Օսիպյանը պնդում է, որ հավաքն ինքնաբուխ չէ, ապօրինի է: Ցուցարարները վանկարկում են «հեռացեք», մի կին էլ առաջարկում է. «Մի հեռացեք, միացեք մեզ»:

20:10 Բաղրամյան պողոտայում իրարանցում է: Ի պատասխան Երևանի փոխոստիկանապետ Վալերի Օսիպյանի՝ բարձրախոսներ միացնելու արգելքին, հավաքվածները պահանջում են, որպեսզի ոստիկանությունը զբաղվի ավելի կարևոր գործերով: Ցուցարարները շրջապատել են Օսիպյանին ու հարցեր են ուղղում նրան. «10 հատ աղբամանի համար գործ եք հարուցում, իսկ ինչո՞ւ գործ չեք հարուցում, որ ջարդեցիք մեր երեխաներին», «Սուրիկի տղին ինչի՞ չեք բռնում»:

20: 00 Երևանի փոխոստիկանապետ Վալերի Օսիպյանը Բաղրամյան պողոտայում հավաքված ցուցարարներին արգելում է բարձրախոսներ միացնել: Հավաքվածները պահանջում են մինչև ժամը 23:00-ն թույլ տալ օգտվել իրենց իրավունքից, սակայն, Վալերի Օսիպյանը խորհուրդ տվեց դրա համար նախ դիմել քաղաքապետարան և ստանալ հավաք կազմակերպելու իրավունք: Ի պատասխան՝ պողոտայում հավաքվածները վանկարկեցին «մենք ենք տերը մեր երկրի» և «հեռացեք»:

19:40 Բաղրամյան պողոտայում 2 երիտասարդ ցուցարար որոշում են կայացրել հացադուլ հայտարարել՝ ՀԾԿՀ-ի որոշումը չեղարկելու պահանջով: Տեղեկությունն ստանալով՝ Երևանի փոխոստիկանապետ Վալերի Օսիպյանը մոտեցավ նրանց, հարցրեց ովքեր են ու ինչ պահանջ ունեն, նաև զգուշացրեց, որ իրենց մոտ չպիտի ունենան նաև ծխախոտ:

18:30 Բաղրամյան պողոտայից հավաքի մասնակիցներն այս րոպեներին  պատրաստվում են Երևանի կենտրոնական փողոցներով իրազեկման երթ անցկացնել: Նախատեսվում է, որ երթից հետո պողոտա են գալու նաև «Ոչ թալանին» քաղաքացիական նախաձեռնության անդամները, ովքեր կհայտարարեն օրվա ընթացքում քաղաքացիական խմբերի ու մասնագետների հետ իրենց նախաձեռնած քննարկումների արդյունքում ընդունած որոշման մասին: