Փաստ ինֆո

Մատուցողուհու սպանության աղմկահարույց գործով նախագահող դատավորն  որոշում է կայացրել  դատարանի հանդեպ անհարգալից վերաբերմունք ցուցաբերելու պատճառաբանությամբ  գործով միակ ամբաստանյալ Դավիթ Թամրազյանի պաշտպան Կրոմվել Գրիգորյանի  նկատմամբ կարգապահական վարույթ հարուցելու համար Փաստաբանների պալատ դիմելու մասին:

Կրոմվել Գրիգորյանը «Փաստինֆո»-ի լրագրողի հետ զրույցում ներկայացրեց մեկ դատական նիստի ընթացքում լարվածության ողջ ժամանակագրությունը: 

Ըստ պաշտպանի, նիստում շարունակվում էր նախորդ դատական նիստում սկսված՝   գործով առանցքային վկա Միլենայի հարցաքննությունը: Պաշտպանի շուրջ 300 հարցերից 80 տոկոսին դատարանը թույլ չէր տվել, որ վկան պատասխանի՝  պատճառաբանելով, որ հարցը  մեղադրանքի հետ կապ չունի կամ որ վկան այդ հարցին  արդեն պատասխանել է: Հարցերն առնչվում էին  մինչև օրս վկայի հայտնած հանգամանքներին, ինչպես նաև մինչև այժմ չհնչած նոր հանգամանքներին:

Պաշտպանն անգամ դատարանին առաջարկել էր  ներկայացնել իր հարցաշարը, որպեսզի դատարանը համոզվի, որ այս կամ այն հարցը մինչև այժմ իր կողմից չի հնչեցվել: Մեղադրողը նույնպես չի հնչեցրել՝ դատախազն ընդամենը մեկ հարց է տվել՝  պնդո՞ւմ եք նախաքննության ընթացքում տված ցուցմունքը:

Մասնավորապես,  պաշտպանը հարցրել է վկային, թե սպանության գործիք դանակը, որ ճանաչել եք, քանի՞ սայրանի է: Թեև  ըստ գործում առկա արձանագրության, վկան երկսայր դանակ  է ճանաչել, սակայն դատարանում պատասխանել է՝  մեկսայրանի:  Վկան դատարանում հայտնել է նաև, որ իրեն ճանաչման ներկայացնելիս չեն հարցրել, թե ի՞նչ հատկանիշից է դանակը ճանաչել՝  «տարա մատս դրեցի վրան»: 

Վկան նաև դատարանում հայտնել է  նոր հանգամանքներ, որոնց մասին մինչ օրս չի ասել՝  ո՛չ նախաքննության,  և ո՛չ էլ նախորդ դատաքննության ժամանակ:  Մասնավորապես, նախկինում վկան ասել է, որ  առաջին անգամ  Դավիթն իրեն «Վալնա»  բարում է  ասել, որ սպանել է Մարիամին ու նկար է ցույց տվել:  Իսկ երկրորդ դատաքննության շրջանակում հարցաքննվելիս  վկան առանց հարցի սպասելու, սեփական ցանկությամբ  հայտնել է, որ Դավիթը մինչև  «Վալնա»  բարը  գնալն է իրեն ասել, որ Մարիամին սպանել է, դանակն էլ ցույց տվել:  Նախագահող դատավորը  հանել է պաշտպանի այն հարցը՝ թե  մինչև «Վալնա»   բարը  կոնկրետ որտե՞ղ  է Դավիթն  ասել ՝  ոտքով քայլելիս, տաքսու  կամ տրանսպորտի մեջ: «Ինչո՞ւ եք հանում» պաշտպանի հարցին հնչել է դատարանի պատասխանը՝  «այդ հարցի պատասխանն արդեն կա»:

Կ.Գրիգորյանը  դժգոհություն հայտնեց նաև այն կապակցությամբ, որ թեև դատարանն առաջինն էր  նկատել, որ ամբաստանյալի առողջական վիճակը   վատթարացել է և շտապօգնություն հրավիրել, սակայն բժշկին հարց չէր առաջադրել՝  կարո՞ղ է ամբաստանյալը շարունակել մասնակցել դատական նիստին, շտաօգնության հեռանալուց հետո դատաքննությունը շարունակվել էր:

Ամբաստանյալը նախ միջնորդել էր հետաձգել դատական նիստը վատ ինքնազգացողության պատճառով, ապա  նորից շտապօգնություն  կանչել, որպեսզի «համոզվեք, որ ես ի վիճակի չեմ նիստին մասնակցել»:  Միջնորդությունները մերժվել էին:

Պաշտպանն իր հերթին դատարանից ժամանակ էր խնդրել  դատարանին պատճառաբանված ինքնաբացարկի միջնորդություն ներկայացնելու համար՝ թվարկելով բոլոր խախտումները:  «Դուք պրոֆեսիոնալ փաստաբան եք, Դուք կարող եք հենց հիմա ներկայացնել»,- նշել էր դատավորը՝ ժամանակ չտրամադրելով փաստաբանին, ով  հարկադրված հանդես էր եկել  բանավոր ինքնաբացարկի միջնորդությամբ՝ այն դատարանը  թողել է  առանց քննության:

«Տեսնելով,  որ դատարանը բացահայտորեն շահագրգռված է, որպեսզի ավարտի վկայի հարցաքննությունը, օբյեկտիվ ճշմարտություն բացահայտելու ցանկություն էլ չունի», ղեկավարվելով  ՀՀ քրեական դատավարության օրենսգրքի 73-րդ հոդվածով՝  պաշտպանի իրավուքներն ու պարտականությունները,  Կ.Գրիգորյանը    հայտարարել էր, որ լքում է  դատարանի դահլիճը՝   հաշվի առնելով  նախագահող դատավորի  ապօրինի պահվածքը՝  հարցերը հանվում են, դատարանին  բացարձակապես չի հետաքրքրում  ամբաստանյալի առողջական վիճակը: Նախագահող դատավորն, ըստ Կրոմվել Գրիգորյանի,  ի պատասխան  հայտարարել  է՝   խնդրեմ, լքեք,  հեռացեք: «Հետո եմ տեղեկացել, որ անգամ նախագահող դատավորի թույլտվությամբ  դատարանի դահլիճը լքելուց հետո դատարանն իր հանդեպ անհարգալից վերաբերմունք ցուցաբերելու պատճառաբանությամբ  կարգապահական վարույթ հարուցելու համար Փաստաբանների պալատին դիմելու որոշում է կայացրել»,- ասաց Կ.Գրիգորյանը: