Փաստ ինֆո

23:05 Երևանի փոխոստիկանապետ Վալերի Օսիպյանը ցուցարարներին հորդորեց չխախտել համակեցության կանոնները և դադարեցնել աղմուկը, քանի որ ժամը 23:00-ից հետո լռության ժամ է: Ի պատասխան փոխոստիկանապետի այդ հայտարարության, ցուցարարները սկսեցին վանկարկել. «Հայաստան»: «Մենք ցանկություն չունենք որևէ խնդիր ունենալ ձեզ հետ, մենք ձեզանից մեկն ենք, ուղղակի համակեցության կանոններն են գործում 23:00-ից հետո»,- հայտարարեց Վ.Օսիպյանը՝ հավելելով. «Հակառակ դեպքում ոստիկանությունը կընդունի, որ դուք այդ ամենը դիտավորյալ եք անում, որ ոստիկանության հետ որևէ բախում ունենաք»:

21:27 Ազատության հրապարակում ցուցարարներին այցելել է երգիչ Արսեն Գրիգորյանը` Մրոն: Հրապարակում հավաքվածները պարում են նրա կատարմամբ երգերի ներքո: Իսկ Բաղրամյան պողոտայում հանրահավաքի մասնակիցները պայքարը շարունակելու և ավելի թեժացնելու կոչով են դիմում հավաքի մասնակիցներին` միաժամանակ կոչ անելով զերծ մնալ միմյանց «սևացնելուց»:

20:45 Քանի որ նախաձեռնող խմբի շրջանակներում լիակատար համաձայնություն չեղավ, անհրաժեշտ է վերանայել պայքարի մարտավարությունը: Բաղրամյան փողոցում հայտարարեցին նստացույցի մասնակիցները` պատրաստակամություն հայտնելով լսել բոլոր առաջարկները և ժողովրդավարության կանոններին համաձայն որոշումներ կայացնել: Ելույթ ունեցողը վերահաստատեց նաև, որ պայքարի պահանջները մնացել են նույնը` չեղարկել ՀԿԾՀ որոշումը, վերանայել սակագինը, պատժել խաղաղ ցուցարարների նկատմամբ բռնություն կիրառած ոստիկաններին և դադարեցնել քաղաքացիների նկատմամբ սկսված քրեական հետապնդումները: Բաղրամյանում հավաքվածները միաձայն ողջունեցին այս հայտարարությունը:

19:53 Բաղրամյան պողոտայում շարունակում են «չեղարկում» վանկարկել: Հանրահավաքում ելույթ են ունենում պատահական մարդիկ:

19:40 Բաղրամյան պողոտայում քաղաքացին պնդում է, որ իրեն թույլ չեն տալիս հեռանալ Բաղրամյանից: Նա Երևանի փոխոստիկանապետ Վալերի Օսիպյանին է հայտնել իր վրդովմունքը` առ այն, որ մի խումբ քաղաքացիներ իրեն թույլ չեն տալիս հեռանալ: «Գուցե սադրիչ է» լրագրողների հարցին Օսիպյանը պատասխանեց. «Չէ, դե ինչ սադրիչ»: Քաղաքացին, ով չցանկացավ ներկայանալ, հերքեց, որ իրեն թույլ չեն տալիս հեռանալ, անգամ լրագրողներին մեղադրեց «ծախված» լինելու մեջ: «Այստեղ բոլորն էլ առած-ծախված են»,- ասաց նա:

Երևանի Բաղրամյան պողոտան դարձյալ մարդաշատ է: Մարդիկ սովորականի պես հավաքվել են այստեղ, բայց, ի տարբերություն նախորդ օրերի, ելույթներ ու կոչեր այսօր առայժմ չեն հնչում:

«Ոչ թալանին» նախաձեռնության անդամներն ու իրենց համակիրները շարունակում են մնալ Ազատության հրապարակում: Քիչ առաջ հայտարարվեց, որ 19:00-ին նրանք հանրային քննարկում են անցկացնելու Կոմիտասի արձանի մոտ: Իսկ ինչ վերաբերում է Բաղրամյան պողոտա գալուն, նախաձեռնության անդամները նշում են, որ օրվա ընթացքում իրենք այստեղ լինում են, բայց արդեն ոչ թե որպես համակարգորղներ, այլ  շարքային քաղաքացիներ: