Փաստ ինֆո

«Ո՛չ թալանին» նախաձեռնության  համակարգող խմբի անդամները հունիսի 28-ի առավոտյան վերսկսել են քննարկումները` իրենց հետագա գործողությունների ծրագրի վերաբերյալ:

Վերլուծելով Նախագահի հայտարարությունները` խմբի անդամ Վաղինակ Շուշանյանը հայտարարեց, որ ի վերջո կարելի է հայտարարել, որ էլեկտրաէներգիայի սակագնի բարձրացումը կանխելուն ուղղված մեծ պատերազմի առաջին ճակատամարտը հաղթել են, որին կարելի է գումարել հանրային մեծ նշանակություն ունեցող  եւս երկու գործերով արձանագրված հաջողությունները:

Վ.Շուշանյանի դիտարկմամբ` Նախագահի հայտարարած աուդիտը կլինի հրապարակային, որի արդյունքում ի հայտ կգան բոլոր թերությունները եւ «ի վերջո կհայտարարեն, որ սակագնի բարձրացումը սխալ է եղել»:

«Այս առումով կարող ենք ընդունել, որ գոնե մեծ պատերազմի առաջին ճակատամարտը հաղթել ենք: Առավել եւս, երբ այսքան ժամանակ անգամ ընդդիմության ներկայացուցիչներին հաշվի չեն առել, բայց այսօր ստեղծել ենք այնպիսի իրավիճակ, որ հետ քայլեր են կատարում», - Բաղրամյան պողոտայում պատասխանելով լրագրողների հարցերին ասել է Շուշանյանը` ավելացնելով, որ հաղթանակներին պետք է ավելացնենք եւս 2-ը. հունվարին տեղի ունեցած ոճրագործության գործով Պերմյակովին հանձնելը եւ Հրաչյա Հարությունյանին արտահանձնելը:

Շուշանյանի կարծիքով` Ավետիսյանների ընտանիքի անդամների սպանության մեջ մեղադրվող Վ.Պերմյակովին Հայաստանին հանձնելու որոշումը եւս միտված է եղել հանգստացնել ժողովրդին:

«Նախագահը չի կարող չեղարկել, բայց կասեցրել է, զուգահեռ երկու կարեւոր որոշում կայացրել: Իմ հորդորը կլինի սառը դատել որոշում կայացնելուց առաջ», - ասաց համակարգող խմբի անդամը` միաժամանակ ընդգծելով, որ3  եթե որոշում կայացվի առաջ գնալու, ապա առաջին գծում ինքը կգնա, բայց կարծում է, որ պետք է կայացվի կշռադատված որոշում:

Նա չբացառեց, որ այսօր երեկոյան` ժամը 18-ին հրավիրված հանրահավաքում որոշում կայացվի բացել Բաղրամյան պողոտան ու տուն գնալ, բայց դա կանեն առաջին ճակատամարտը հաղթած` սպասելով հաջորդ ճակատամարտերին: «Մեկ սխալ քայլ եւ նախահարձակ կլինենք: Այս դեպքում եթե քայլ չանենք, ապա իրենք մեզանից մեկ քայլ առաջ կլինեն», - նշեց նա: