Փաստ ինֆո

Վաղը երեկոյան նախատեսվում է ընդդեմ էլէներգիայի սակագնի բարձրացման քաղաքացիական նախաձեռնության մեծ հավաք: Այդ հավաքի ընթացքում էլ քաղաքացիները պետք է որոշեն հետագա քայլերը: «Ազատության» ուղիղ եթերում նշվեց, որ քաղաքացիական նախաձեռնությունից ասել են, որ իրենք չեն կարող որոշել բոլորի փոխարեն, սակայն կարծիք են հայտնել, որ Սերժ Սարգսյանի հայտարարությունն իրենց համար անընդունելի է:

Բաղրամյան պողոտայում ավելացել են նոր պաստառներ` «Պահանջը չի կատարվել» բովանդակությամբ:

22:38 Չնայած անձրեւին` Բաղրամյան պողոտայում երիտասարդ ցուցարարները շարունակում են երգել, պարել, ինչն ուղեկցվում է «Հայաստան» վանկարկումներով:

22:20 Նախաձեռնող խմբի անդամներից Վաղինակ Շուշանյանը Երեւանի ոստիկանապետի տեղակալի հետ բանակցությունների ժամանակ խնդրեց չխոչընդոտել եւ ապահովել ինքնաբուխ խաղաղ հավաքի անվտանգությունը` պնդելով, որ իրենց հավաքները շարունակելու են խաղաղ բնույթ կրել, իսկ հետագա գործողությունները կորոշեն մեծ հանրահավաք ժամանակ: Երեւանի փոխոստիկանապետ Վալերի Օսիպյանը հորդորեց դադարեցնել հանրահավաքը: «Հաշված րոպեների հարցը Բաղրամյան պողոտայում հասարակական կարգը կարող է վերականգնվել, բայց մենք ուզում ենք, որ բացատրական աշխատանքների արդյունքում համակարգող խումբը դադարեցնի հանրահավաքը», - ասաց Վ.Օսիպյանը:

22:15 «Ոչ թալանին» նախաձեռնող խմբի ներկայացուցիչը հայտարարեց, որ իշխանությունները կայացրել են այնպիսի որոշում, որը չի բավարարում իրենցպահանջին եւ գիշերը մնում Բաղրամյան պողոտայում: Առաջարկվեց գիշերվա ընթացքում խմբերի բաժանվել եւ որոշել գործողությունների ծրագիրը, ինչը կքննարկեն  եւ միասին որոշում կկայացնեն: Նախաձեռնող խումը հունիսի 28-ին` ժամը 6-ին հրավիրել է մեծ հանրահավաք` միասին որոշելու հետագա գործողությունները:

Այս հայտարարությանը հաջորդեցին «Մենք ենք տերը մեր երկրի», «Հայաստան» վանկարկումները:

22:10 Երիտասարդ ցուցարարները շուրջպար են բռնել Բաղրամյան պողոտայում, մինչ նախաձեռնող խմբի անդամները շարունակում են քննարկումները:

Բաղրամյան պողոտայում նորից ցուցարարներին են միացել պատգամավորները, մասնավորապես` Նիկոլ Փաշինյանը, Թեւան Պողոսյանը: Նիկոլ Փաշինյանը հայտարարեց, որ այսօր եւս պատրաստ է կենդանի պատ կանգնեն  ցուցարարների եւ ոստիկանների միջեւ:

20:20 Բաղրամյան պողոտայում ցուցարարները շարունակում են երգել ու պարել, իսկ նախաձեռնող խմբի անդամները քննարկում են իրենց հետագա գործողությունները` հանրությանը ներկայացնելու համար:

20:06 նախաձեռնող խմբի անդամ Արմեն Մկրտչյանը հայտարարեց, որ տարածված հաղորդագրությունը հաղթանակ չէ: «Ի վերջո, կառավարության բյուջեն եւս ձեւավորվում է մեր հարկերից: Սա կարելի է համարել փոքրիկ հաջողություն: Ժողովրդին կներկայացնենք մեր առաջարկությունները եւ ժողովուրդը կորոշի», - ասաց նա:

«Ոչ թալանին» քաղաքացիական նախաձեռնությունը Բաղրամյան պողոտայում շարունակում է բողոքի ակցիան: Նախաձեռնության ակտիվիստները հայտարարել են, որ իրենց հետագա քայլերի մասին կհայտարարեն ՀՀ Նախագահի աշխատակազմի լրատվական ծառայության տարածած մամուլի հաղորդագրությունն ուսումնասիրելուց հետո:

Բաղրամյան պողոտայում է նաեւ ՀՀ ոստիկանապետ Վովա Գասպարյանը:

Ավելի վաղ տեղեկացրել ենք, որ Նախագահ Սերժ Սարգսյանն այսօր խորհրդակցություն է անցկացրել Հանրապետության տնտեսական քաղաքականության պատասխանատուների հետ, որի ընթացքում շարունակվել են Հայաստանի էներգետիկ անվտանգությանը, այդ համակարգի հետագա առողջացմանը և առկա խնդիրներին լուծումներ գտնելուն ուղղված քննարկումները:

Խորհրդակցության վերաբերյալ հաղորդագրություն է տարածել Նախագահի աշխատակազմի լրատվական ծառայությունը, ըստ որի`  էլեկտրաէներգիայի  սակագնի բարձրացումն արդարացված է եւ սակագինը չբարձրացվելու դեպքում էներգետիկ համակարգը դոմինոյի էֆեկտով փլուզման վտանգի առաջ կկանգնի:

Միաժամանակ Նախագահն առաջարկել է` ընտրել աշխարհում էներգետիկայի ոլորտում մեծ փորձ ունեցող և մեծ հեղինակություն վայելող որևէ միջազգային խորհրդատվական ընկերություն, եթե հարկ կա, այդ ընտրության ժամանակ ներգրավել նաև բողոքի ակցիայի ակտիվ տղաներից մի քանիսին, և այդ ընկերությանը հանձնարարել աուդիտորական ընկերության ներգրավմամբ պատասխանել հետևյալ հարցերին`

• ինչքանով էր հիմնավորված սակագնի բարձրացումը, և

• սակագնի չբարձրացման դեպքում ինչպիսի՞ վտանգներ են սպառնում էներգետիկ համակարգին:

«Համոզված եմ՝ սակագնի բարձրացումը չեղյալ հայտարարելը ծայրահեղ վտանգավոր է: Ուստի, մինչև եզրակացության կազմումը այդ ընկերության կողմից կառավարությունը իր վրա կվերցնի սակագնի բարձրացման ամբողջ բեռը: Անշու՛շտ, մենք ընթացող ծրագրերին կամ սոցիալական ծախսերին չենք դիպչի, այլ գումարներ կգտնենք անվտանգության հետագա ամրապնդման համար նախատեսվող միջոցներից», - հայտարարել է Նախագահը: