Փաստ ինֆո

22: 30 «Ոչ թալանին» նախաձեռնության անդամ Վաղինակ Շուշանյանը հայտարարեց, որ Բաղրամյան պողոտայում իրենց մեջ սադրիչներ են հայտնվել, որոնք ՀԱԿ-ի անունից իշխանափոխության կոչերով թռուցիկներ են բաժանել: «ՀԱԿ-ից հերքում են իրենց կապը այդ մարդկանց հետ»,- ասաց նա:

22:25 «Չենք նահանջելու ու չենք սակարկելու, մեր պահանջը հստակ է՝ ոչ մի լումա ավել»,- Բաղրամյան պողոտայում հայտարարում է «Ոչ թալանին» նախաձեռնությունը՝ վստահեցնելով, որ պայքարելու են մինչև հաղթանակ ու կիսատ չեն թողնելու այն, ինչպես եղել է մինչև հիմա Հայաստանում եղած մյուս պայքարների ժամանակ:

22:00 «Ոչ թալանին» նախաձեռնությունը կոչով դիմեց Երևանի փոխոստիկանապետ Վալերի Օսիպյանին՝ պահանջելով բացել Մոսկովյան փողոցի երթևեկությունը և դրանով իսկ ապահովել իրենց անվտանգությունը, քանի որ արդեն 2-3 ժամ է, ինչ փողոցը փակվել է ոստիկանության կողմից: Վալերի Օսիպյանը խոստացավ կատարել նախաձեռնության անդամների խնդրանքը՝ շնորհակալություն հայտնելով համագործակցության համար:

20:53 «Ոչ թալանին» նախաձեռնության անդամները կանխեցին ալկոհոլի մուտքը հանրահավաքի տարածք: Նկատելով ցուցարարների միջով անցնող տղամարդուն, ով սայլակով երկու արկղ գարեջուր էր տեղափոխում, հանրահավաքի կազմակերպիչները, կանգնեցնելով նրան, հրավիրեցին ոստիկաններին՝ պարզելու, թե ով է նա և ինչ նպատակով է հայտնվել այդտեղ: Ի վերջո դեպքը մեկնաբանվեց նրանով, որ հարակից սրճարանի համար պատվիրված խմիչք է, իսկ, թե ինչու էր հայտնվել հանրահավաքի վայրում, մութ մնաց:

20:28  «Ոչ թալանին» նախաձեռնության անդամները Բաղրամյան պողոտայում հավաքվածներին հայտարարեցին, որ Էջմիածին քաղաքից դեպի Երևան է ուղևորվում ցուցարարների մի խումբ, որն առաջիկայում կհասնի մայրաքաղաք ու կմիանա Բաղրամյան պողոտայի բողոքի ակցիային:

20:20 Երևանի փոխոստիկանապետ Վալերի Օսիպյանը «Ոչ թալանին» նախաձեռնության անդամներին զգուշացրեց՝ թույլ չտալ ցուցարարների շարքերում ալկոհոլ օգտագործած մարդկանց ներկայությունը՝ հավելելով, որ երեկ գիշերը իրենց կողմից նման մարդիկ են հայտնաբերվել և հեռացվել Բաղրամյան պողոտայից:

20:15 Իրազեկման երթին մասնակցող երիտասարդների խումբը հասավ Բաղրամյան պողոտա: Շուրջ 1 ժամ առաջ, դուրս գալով Ազատության հրապարակից, երթի մասնակիցները՝ «Ոչ թալանին» պաստառներով, անցան Նալբանդյան, Սայաթ Նովա փողոցներով ու միացան Բաղրամյան պողոտայում անցկացվող հանրահավաք-նստացույցի մասնակիցներին:

19:43 Այս պահին մի խումբ երիտասարդներ, մի քանի տասնյակ հոգուց բաղկացած խմբով, «Ոչ թալանին» վանկարկումներով և պաստառներով անցնելով Նալբանդյան փողոցի բանուկ հատվածով շարժվում են դեպի Նալբանդյան-Կորյուն փողոցների խաչմերուկ:

18:45 Չնայած տեղացող անձրեւին՝ երիտասարդները շարունակում են մնալ պողոտայում՝ վանկարկելով «Հայաստան», «Հաղթանակ»։

18:20 Երևանի Բաղրամյան պողոտայում այս րոպեներին մեկնարկում է արդեն ավանդական դարձած հանրահավաքը՝ ընդդեմ էլեկտրաէներգիայի սակագնի բարձրացման: Չնայած մայրաքաղաքում տեղացող անձրևին, Բաղրամյան պողոտան դարձյալ բազմամարդ է: