Փաստ ինֆո

Հարևանի սպանության մեջ մեղադրող 26-ամյա Արթուրի գործով տուժողի իրավահաջորդ Լալա Համբարձումյանն այսօրվա նիստում ներկայացրեց քաղհայցի պահանջ՝ ամբաստանյալից 880 000 ՀՀ դրամի չափով գումար բռնագանձելու մասին:

Ըստ տուժողի իրավահաջորդի՝ նշված գումարի չափը ներառում է մահացած եղբոր՝ տուժողի, մահվան հետ կապված, այդ թվում նաև հուղարկավորության ծախսերը և նրա մոր առողջական վիճակի կտրուկ վատացման պատճառով գնված դեղերի համար ծախսված գումարը:

Տուժողի իրավահաջորդը նշեց, որ մայրը մինչև հիմա չգիտի որդու մահվան իրական պատճառը, և որ որդու մահվանից հետո նրա առողջական վիճակը կտրուկ վատացել, իսկ դեղերը գնում է ինքը:

Երևանի Շենգավիթ վարչական շրջանի ընդհանուր իրավասության դատարանում, Ալեքսանդր Ազարյանի նախագահությամբ, այսօր շարունակվեց գործի քննությունը դատարանը հետազոտեց գործում իրեղեն ապացույց ճանաչված մահճակալի ծածկոցը, վերմակը, տուժողի և ամբաստանյալի հագուստները:

Դատարանի կողմից սահմանված ապացույցների հաջորդականության համաձայն այսօր նախատեսվում էր նաև ամբաստանյալի հարցաքննությունը, սակայն վերջինս հայտարարեց, որ  պատրաստ չի ցուցմունք տալ և որ ցանկանում է ցուցմունքը գրավոր ներկայացնել՝ քաղհայցի պահանջին ծանոթանալուց հետո:

Դատական նիստը հետաձգվեց և նշանակվեց մեկ ամիս անց՝ հուլիսի 22-ին, դատարանի արձակուրդում գտնվելու պատճառով:

Ըստ մեղադրանքի՝ Արթուրը 2014թ. նոյեմբերի 6-ին՝ ժամը 21:00-ի սահմաններում, իր տանը, գտնվելով ալկոհոլային հարբածության վիճակում, իրեն «եզո» անվանելու հարցի շուրջ վիճաբանել է իր հարևան Անդրանիկի հետ և խոհանոցային դանակով մեկ անգամ հարվածել նրա որովայնի ձախ շրջանին:

Անդրանիկին պատճառվել են ձախից որովայնի կողմնային պատի ծակած-կտրած, որովայնի խոռոչ թափանցող վերքով, որովայնամզի, հետորովայնամզային տարածության, որովայնային աորտայի վնասման ձևով կյանքի հետ անհամատեղելի վնասվածքներ, ինչի հետևանքով նա մահացել է:

Արթուրին մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով,  իսկ որպես խափանման միջոց է ընտրվել կալանավորումը: