Փաստ ինֆո

«Ո՞նց կարող է՝ ես հարցեր չունենամ, էս գործի մեխը սա է, ես էսօր էդ ցուցմունքների հիման վրա եմ այստեղ գտնվում»,- այսօր դատարանում հայտարարեց  քրեական աշխարհում հայտնի հեղինակություն Թևոս Սաֆարյանի` Կայարանցի Թևոսիկի եղբոր`Արթուր Սաֆարյանի սպանության մեջ մեղադրվող Իսրայել Սարգսյանը` ի պատասխան դատավորի հարցի, թե հարցեր ո՞ւնի ուղղելու դատարան հրավիրված Տիգրան Ասատրյանին:

Տիգրան Ասատրյանը, ով նույնպես մեղադրվում է Արթուր Սաֆարյանի սպանության մեջ և նրա նկատմամբ հարուցված քրեական գործը քննվում է առանձին վարույթով, այսօր հրաժարվեց դատարանում ցուցմունք տալ և որևէ մեկի հարցերին պատասխանել: Այս հանգամանքը զարյացրեց Իսրայել Սարգսյանին:

«Ինձ առաջադրված մեղադրանքը կառուցված է Տիգրան Ասատրյանի ցուցմունքների վրա: Այսինքն` Տիգրան Ասատրյանի ցուցմունքը վերցրել են կմախքի պես և վրան սկսել են հավաքել ինչ-որ մի հատ մարմին, որը որ չի հավաքվում: Ո՞նց եք մտածում, ես ո՞նց պետք ա նայեմ էս ամեն ինչին: Ինձ պետք է, որ այդ ցուցմունքները հրապարակվեն ու հանրությունը իմանա, թե իրականությունը ինչ է եղել»,- ասաց Իսրայել Սարգսյանը` հավելելով. «Ես լիքը հարցեր ունեմ, ինչի՞ չունեմ, ու ես կուզենամ, որ ինքը պատասխանի էդ հարցերին»: Տիգրան Ասատրյանը, սակայն, հրաժարվեց պատասխանել:

«Ինձ ինչ-որ գողության ու խարդախության համար չեք մեղադրում, ինձ մեղադրում եք երկու սպանության համար, և ոչ մեկը չի կարա ապացուցել, որ էդ սպանությունը տեղի է ունեցել: Եթե կարելի է ինչ-որ մեկի խոսքի, կամ ինչ-որ մի հատ ձայնագրության վրա մարդուն դատապարտել, ուրեմն այսօրվա դրությամբ կարելի է Հայաստանի 50 տոկոսին դատապարտել ինչ-որ խոսակցությունների համար: Բայց այսօր մենք այն դարաշրջանում չենք ապրում, որ կարելի է խոսակցությունը վերցնել, դնել գործի մեջ ու մարդուն ասել, որ դու մարդասպան ես:  Ես ոչ մի անգամ մարդ չեմ սպանել, չեմ էլ սպանի»,- դատարանում հայտարարեց Իսրայել Սարգսյանը:

Իսկ երբ Տիգրան Ասատրյանը, հրաժարվելով դատավարության մասնակիցների հարցերին պատասխանել` այդ թվում նաև` մեղադրող դատախազի, դատարանի թույլտվությամբ հեռացավ դատարանի դահլիճից, ամբաստանյալն էլ ավելի զայրացած դժգոհեց, թե` «հո հրաժարվելով չի: Ես իրեն լիքը հարցեր ունեմ տալու: Ոչ մի հիմք էլ չկա, ինքն է ինձ բռնել տվել, բերել այստեղ»:

Փոխարենը դատարանում այսօր հրապարակվեցին Տիգրան Ասատրյանի նախաքննական ցուցմունքները, որոնց համաձայն, չնայած կալանքի տակ գտնվելուն, եղբոր՝ Արթուրի վրա հրազենով հարձակումից անմիջապես հետո Կայարանցի Թևոսիկը գնացել է հիվանդանոց,  սակայն Արթուրն արդեն մահացած է եղել: Նա նաև նշել է, որ հիվանդանոցից Թևոսի հետ  միասին են վերադարձել Սաֆարյանների տուն:

Այդուհանդերձ, ՔԿՀ-ից այս տեղեկություները հերքել են` պաշտոնապես պատասխանելով, որ Թևոս Սաֆարյանը գտնվել է «Դատապարտյալների հիվանդանոցում» և չի մասնակցել եղբոր հուղարկավորությանը: