Փաստ ինֆո

Սյունիքի մարզպետի տան մոտ զինված միջադեպի ժամանակ սպանված Ավետիք Բուդաղյանի հոր՝ Էմիլ Բուդաղյանի, ու նրա  ներկայացուցիչ, փաստաբան  Հայկ Ալումյանի բողոքների գործով դատական նիստում վերջինս  այսօր ժամանակ է խնդրել՝ ԱԱԾ հարցում ուղղելու և  դրա պատասխանը դատարանին ներկայացնելու  համար:  Դատարանը բավարարել է միջնորդությունը:

Խոսքը Սուրիկ Խաչատրյանի վարորդի ու երկու ազգականների հեռախոսահամարները լսելու ու ձայնագրառելու մասին դատարանի որոշումը չկատարելու պատճառների վերաբերյալ ԱԱԾ-ին  հարցում ուղղելու մասին է: Բուն միջադեպի քննության գործով Սյունիքի մարզի դատարանն արդեն հարցում  ուղղել է  ԱԱԾ-ին, սակայն Հայկ Ալումյանի գնահատմամբ, այն որևէ հստակություն չի մտցնում, թե ինչ տեխնիկական պատճառներ են եղել, որոնք թույլ չեն տվել կատարել հեռախոսների ձայնագրառումների  մասին դատարանի որոշումը:

Փաստաբանը հարցում ուղղելու հարցը բողոքների գործով դատական նիստում բարձրացրել էր այն բանից հետո, երբ դատարանը մերժել էր այդ հարցումն ուղղել ԱԱԾ-ին:

Հայկ Ալումյանը մինչ այդ, դատական նիստում, ներկայացրել է ապացույց զինված միջադեպի գործում ավելացած պահունակի մասին.  ըստ Արագած Ղևոնդյանի ցուցմունքի,  իրեն Սուրիկ Խաչատրյանի առանձնատան խոհանոցում  տվել են ատրճանակ, որը պահունակ չի ունեցել, մինչդեռ քրեական գործում այն հայտնվել է  պահունակի հետ միասին՝ ե՞րբ և ինչպե՞ս է այն հայտնվել, գործից չի հասկացվում: 

Հայկ Ալումյանը «Փաստինֆո»-ի թղթակցի հետ զրույցում նկատեց, որ գործում մեկ նյութեր են կորում, մեկ էլ անհասկանալի կերպով հայտնվում:  Փաստաբանը պարզաբանեց, որ ատրճանակն, իբր, սպանված Ավետիք Բուդաղյանինն է եղել, սակայն այդ դեպքում ստացվում է, որ վերջինս չէր կարող կրակել առանց պահունակի ատրճանակից: 

Հայկ Ալումյանը նաև այսօր դատարանին է ներկայացրել մեկ այլ   գործով  դատախազի որոշումը, որով վերացվել է մահվան հիմքով քրեական հետապնդում չիրականացնելու մասին քննիչի որոշումը:  Մահացածի այրին այդ գործով բողոք էր ներկայացրել դատախազին՝ պահանջելով, որ իր ամուսնու մահվան հիմքով քրեական հետապնդում չիրականացնելու  հարցը քննի դատարանը և ոչ թե նախաքննական մարմինը:

Մինչդեռ Սյունիքի գործով Ավետիք Բուդաղյանի մահվան հիմքով քրեական հետապնդում չիրականացնելու որոշումը դատախազը թողել է անփոփոխ՝   ինչպե՞ս է պատահել, որ մի դեպքում դատախազը վերացնում է քննիչի որոշումը, իսկ մյուս դեպքում՝ ոչ, հարց է տալիս Հայկ Ալումյանը: Փաստաբանը դատարանին է ներկայացրել այս հարցի առնչությամբ Վճռաբեկ դատարանի արտահայտած իրավական դիրքորոշումը:

Հայկ Ալումյանը  դատարանի ուշադրությունն է հրավիրել նաև այն հանգամանքի վրա, որ Սյունիքի զինված միջադեպի գործն ուղարկվել է  պաշտպանության նախարարության քննչական բաժին այն հիմքով, որ Արտակ Բուդաղյանը զինծառայող է և նրան հանցագործություն է վերագրվում: Մինչդեռ այդ ժամանակ  և դրանից հետո Արտակ Բուդաղյանը գործով վկա էր և նրան հանցագործություն չէր վերագրվում, ուստի, ըստ Հայկ Ալումյանի, որևէ իրավական հիմք չկար  գործը ՊՆ քննչական բաժին ուղարկելու համար: Այսինքն, փաստաբանի եզրահանգմամբ,  գործը քննվել է ոչ պատշաճ մարմնի կողմից և այդ մարմնի քննության ընթացքում ձեռք բերված ապացույցներն ևս անօրինական են: