Փաստ ինֆո

«Փաստինֆո»-ին հայտնի է դարձել, որ Սյունքի մարզպետի որդու և նրա ընկերների կողմից Զաքարյան եղբայրներին ծեծի ենթարկելու փաստով հարուցված քրեական գործի շրջանակներում այսօր հետախուզում է հայտարարվել Սյունիքի մարզպետ Սուրիկ Խաչատրյանի եղբորորդու՝ Մայիս Խաչատրյանի, նկատմամբ:

Հիշեցնենք՝ օրեր առաջ ձերբակալվել, ապա Զաքարյան եղբայրների նկատմամբ բռնություն կիրառելու մեղադրանքով կալանավորվել էին  Սյունիքի մարզպետի որդու՝ Տիգրան Խաչատրյանի մանկության մտերիմ ընկեր Յուրի Մանուչարյանն ու  մարզպետի վարորդ Արագած Ղևոնդյանի որդին՝ Դերենիկ Հակոբյանը:

Որոշ տեղեկությունների համաձայն, իրավապահներին հայտնի է դարձել, որ նրանց հետ միջադեպին մասնակից է եղել նաև Մայիս Խաչատրյանը:

Նշենք, որ վերոհիշյալ երկու անձանց ձերբակալություններից հետո, ինչպես արդեն հայտնել էինք, Սյունիքում հայտնի շրջանակներում խուճապ էր սկսվել: Լուրեր էին շրջանառում այն մասին, որ նախաքննական մարմին հարցաքննության հրավիրված որոշ անձինք չեն ներկայացել՝ վախենալով հնարավոր ձերբակալությունից, և դիմել են փախուստի:

Ի դեպ, կալանավորված Յուրի Մանուչարյանին ու Դերենիկ Հակոբյանին մեղադրանք է առաջադրվել՝ «մի խումբ անձանց հետ միասին Մուշեղ Զաքարյանին միջին ծանրության մարմնական վնասվածք հասցնելու համար»:

Թե ովքեր են միջադեպի մասնակից «մի խումբ անձինք», պաշտոնապես չի հայտնվում: Արդեն կարող եք ենթադրել, որ Մայիս Խաչատրյանը եւս մտնում է այդ խմբի մեջ։  Բայց, չի բացառվում, որ առաջիկայում միջադեպին մասնակցածների նոր անուններ կհնչեն:

Հիշեցնենք,  մայիսի 2-ին  Գորիսի Սդըղի գյոլ կոչվող տարածքում ծեծի ենթարկվելու արդյունքում տուժած Հարութ Զաքարյանն այս պահին բուժման նպատակով գտնվում է ՌԴ-ում: Հայաստանցի բժիշկների կարծիքով՝ աչքին ստացած վնասվածքի հետևանքով Հարութ Զաքարյանի մոտ կարող է գրանցվել օրգանի ֆունկցիայի կորուստ:

Նշենք նաև, որ պաշտոնական վարկածի համաձայն, միջադեպը սկսվել է ոչ թե «Սդըղի գյոլում», այլ՝ դրանից ժամեր առաջ՝ հենց Գորիս քաղաքի կենտրոնական փողոցներից մեկում, որտեղ մարզպետի որդին ու իր ընկերները ավտոմեքենայով բախվել են Մուշեղ Զաքարյանի ավտոմեքենային: Վթարի արդյունքում, ի դեպ, վնասվել էր հենց Զաքարյանի ավտոմեքենայի կողային հայելին: 

Այսինքն՝ վթարի հետևանքով տուժողը հենց Զաքարյանն է եղել: Չնայած դրան, մարզպետի որդին ու նրա ընկերները նախ վիճաբանություն են սարքել նրա հետ, ապա հարաբերությունները պարզելու համար նրան ժամադրել են Սդըղի գյոլում: 

Մի քանի ժամ անց, երբ Մուշեղ Զաքարյանը եղբոր՝ Հարութ Զաքարյանի հետ եկել են պայմանավորված վայրը, մարզպետի որդու ընկերներն ու մտերիմները, մի խումբ մարդկանցով ծեծի են ենթարկել նրանց: