Փաստ ինֆո

Այսօր՝ ժամը 8-ից,  Արագածոտնի, Արարատի, Արմավիրի, Գեղարքունիքի, Կոտայքի, Լոռու, Շիրակի, Սյունիքի և Տավուշի մարզերի 32 համայնքներում մեկնարկել են ՏԻՄ ընտրությունները: Համայնքներից 18-ում, այդ թվում 3 քաղաքային՝ Արտաշատում, Ալավերդիում և Աբովյանում, անցկացվում են համայնքի ղեկավարի, 12 համայնքում` ավագանու անդամի ընտրություններ, իսկ 2 համայնքներում` միաժամանակ համայնքի ղեկավարի և ավագանու անդամի ընտրություններ: 

Քվեարկությունը կավարտվի ժամը 20-ին:

Հիշյալ համայնքներում ընդհանուր առմամբ մասնակցում են համայնքի ղեկավարի 38 և ավագանու անդամի 102 թեկնածու:

20 համայնքներում, որտեղ համայնքի ղեկավար են ընտրում, գործաղ համայնքապետերից վերընտրվելու ցանկություն են հայտնել 16-ը: Ընդ որում՝ նրանցից 8-ը քվեարկվում են առանց մրցակցի:

Ընտրապայքարի մեջ չմտած համայնաքապետերի թվում են Արտաշատի, Ալավերդու և Աբովյանի գործող քաղաքապետերը: 17 գյուղական համայնքներից միայն մեկում՝ Գեղարքունիքի մարզի Աղբերքում, գործող գյուղապետը չի առաջադրվել:

Արտաշատում քաղաքապետի պաշտոնի միակ հավակնորդը  ՀՀ վարչապետ Հովիկ Աբրահամյանի որդին է՝ անկուսակցական, «Իմպերիում Գրուպ» ՍՊԸ տնօրեն Արգամ Աբրահամյանը: Նրա թեկնածությունն առաջադրել է ՀՀԿ-ն:

Ալավերդիում քվեարկությանը մասնակցում են քաղաքապետի երկու անկուսակցական թեկնածուներ՝ «Սթրոնգ Սթոուն Գրուպ» ՍՊԸ  տնօրեն Արթուր Աբգարյանը և Սանահինի մեքենայացված գծային ուղեմասի պետ Կարեն Փարեմուզյանը: Վերջինիս թեկնածությունն առաջադրել է ՀՀԿ-ն:

Աբովյանում քաղաքապետի պաշտոնի համար պայքարում են 5 ինքնաառաջադրված անկուսակցականներ՝ Ազգային ժողովի Տարածքային կառավարման և տեղական ինքնակառավարման հարցերի մշտական հանձնաժողովի փորձագետ Վահագն Գևորգյանը, «Չարենցավանի բեռնաուղևորատար ավտոտրանսպորտ» ԲԲԸ գլխավոր տնօրեն Արթուր Հարությունյանը, ով  առավել հայտնի է «Պալաչ» մականունով, ոչ տեղ մի չաշխատող՝ Աբովյանի նախկին քաղաքապետ Կարապետ Իսրայելյանը, Էդվին Թադևոսյանը և Արթուր Հարությունյանը: Ինչպես  ավելի վաղ տեղեկացրել ենք, երկու  Արթուր Հարությունյանների հայրանունները ևս նույնն են՝ Գեղամի:

Աբովյանում թեև բոլոր թեկնածուներն ինքաառաջադրվել են, սակայն այստեղ ՀՀԿ-ն որոշել է պաշտպանել Վահագն Գևորգյանի թեկնածությունը: Նրա թեկնածությունը պաշտպանելու մասին որոշում ունի նաև «Բարգավաճ Հայաստան»-ը:

Նշենք, որ այսօրվա ՏԻՄ ընտրությունների ժամանակ դիտորդական առաքելություն իրականացնելու նպատակով ՀՀ կենտրոնական ընտրական հանձնաժողովում հավատարմագրվել է 9 տեղական հասարակական կազմակերպության 372 դիտորդ: