Փաստ ինֆո

Կառավարության այսօրվա նիստում ուշագրավ մի երկխոսություն տեղի ունեցավ Անշարժ գույքի պետական կոմիտեի նախագահ Արման Սահակյանի և վարչապետ Հովիկ Աբրահամյանի միջև:

Արման Սահակյանը ներկայացնելով կառավարության թիվ 2 մասնաշենքի գնման գործընթացին վերաբերող նախկին որոշման մեջ փոփոխություններ կատարելու մասին նոր նախագիծը՝ նշեց, որ շենքը գնող «Տանգո» ընկերությունը, որը պատկանում է գործարար Էդուարդո Էռնեկյանին, շենքի դիմաց հերթական վճարումը՝ 3  մլն դոլարը, պետք է վճարեր մարտ ամսին, սակայն, վճարելու է մինչև հուլիսի 1-ը: Այս նորությունը hանկարծակիի բերեց վարչապետ Հովիկ Աբրահամյանին: «Բայց Էռնեկյանի հետ պայմանավորվել էին, որ պետք է այս շաբաթ վճարեր»,- անկեղծ զարմացավ վարչապետը:

Ու, չնայած դրան, կառավարությունը որոշեց թույլ տալ Էռնեկյանին վճարումը կատարել մինչև հուլիսի 1-ը:

Հիշեցնենք, 2014թ-ին Կառավարությունն օտարել էր կառավարության թիվ երկու մասնաշենքի նկուղային և առաջին հարկերը «Տանգո» ընկերությանը: Իսկ քանի որ նկուղային հարկում գտնվում է «Արարատ» ռեստորանը, Էռնեկյանը, որպես կանխավճար, երեք օրվա ընթացքում «Արարատ» ՍՊԸ-ին պետք է վճարել էր 140 000 դոլար: Բայց ավելի ուշ որոշվել էր, որ Էռնեկյանը կանխավճարը կվճարի 10 բանկային օրվա ընթացքում` բայց արդեն 1 միլիոն դոլարի չափով:

Ինչևէ, ըստ Արմեն Սահակյանի այսօր ներկայացրած տեղեկատվության, «Տանգո» ՍՊԸ-ն 4 մլն դոլար արդեն վճարել է, իսկ մնացած 3 մլն-ը կվճարի մեկ ամսվա ընթացքում:

Ի դեպ, շուրջ 1 ամիս առաջ, վարչապետն ընդունել էր Էդուարդո Էռնեկյանին: Այդ հանդիպման մասին պաշտոնական լրահոսը բավական սահմանափակ տեղեկատվություն տարածեց: Այսօր, սակայն, մի փոքր գաղտնազերծվեց, թե ինչ հարցեր էին քննարկել կառավարության ղեկավարն ու գործարարը:

Ինչ վերաբերում է կառավարության նոր մասնաշենքի շինարարությանը, ապա վարչապետի հարցին, թե երբ կավարտվի շինարարությունը, քաղաքաշինության նախարար Նարեկ Սարգսյանը տեղեկացրեց, որ թեև ըստ ժամանակացույցի ավարտը նախատեված է մինչև 2016թ. մարտ ամիսը, բայց շենքը շահագործման կհանձնվի արդեն փետրվար ամսին: