Փաստ ինֆո

ՀՀ դատական դեպարտամենտի նախկին ղեկավար Միսակ Մարտիրոսյանի դեմ առաջադրված  մեղադրանքի շինծու ու արհեստական  ապացույցները ձեռք են բերվել գործարքի արդյունքում՝ օգտվելով  ի պաշտոնե նրա տեղակալ, Դատական կարգադրիչների ծառայության ղեկավար Արմեն Մովսիսյանի խոցելի վիճակից: Հայտարարելով այս մասին իր պաշտպանական ճառում՝  Միսակ Մարտիրոսյանի պաշտպան Վարդան Զուռնաչյանը նշեց, որ Ա.Մովսիսյանի ցուցմունքներն ուղղորդված են եղել նախաքննական մարմնի կողմից: Նա տեսակետ հայտնեց, որ իր պաշտպանյալի դեմ ցուցմունք տալուց հետո Ա.Մովսիսյանի վիճակը բարելավվել է, մասնավորապես, հարազատների հետ տեսակցությունների արգելքը հանվել է:

Պաշտպանը հարց ուղղեց մեղադրանքի կողմին, եթե, ըստ Ա. Մովսիսյանի ցուցմունքի,  պետական բյուջեից հափշտակված 115 մլն գումարն ինքը բաժանել է երեք մասի՝ փայաբաժիններ   հատկացնելով   Միսակ Մարտիրոսյանին (նրան ընդհանուր առմամբ տրվել է քսան մլն դրամ) ու իր տեղակալ Գեղամ Գրիգորյանին, ապա ինչպե՞ս և որտե՞ղ են բաշխվել մնացած գումարները: Պաշտպանն ընդգծեց նաև, թե գործից պարզ չէ, թե Միսակ Մարտիրոսյանը կոնկրետ ի՞նչ գործողություններ է կատարել կաշառք ստանալու ուղղությամբ:

Վ.Զուռնաչյանը միջնորդեց դատարանին անհիմն ճանաչել Միսակ Մարտիրոսյանին առաջադրված մեղադրանքը, իսկ վերջինիս ճանաչել անմեղ ու արդարացնել՝  հանցակազմի բացակայության պատճառաբանությամբ:

Միսակ Մարտիրոսյանը սկսեց, սակայն չավարտեց իր 60-էջանոց պաշտպանական ճառը: Նա դժգոհություն հայտնեց, որ նախաքննական մարմինն հենց սկզբից շոուի էր վերածել գործով նախաքննությունը: Նա տարակուսանք հայտնեց, որ թեև մեկ այլ գործով՝  սանմաքրման աշխատանքներ կատարելիս յուրացվել էր  շատ ավելի շատ գումար՝  300 մլն դրամ (խոսքը հավաքարարների անունով գումարներ հափշտակելու գործի մասին է), սակայն վերջիններս մամուլի կողմից անհամեմատ ավելի քիչ ուշադրության արժանացան, քան Դատական դեպարտամենտում հափշտակությունների վերաբերյալ գործը: Իր լիազորությունները  կասեցնելու մասին որոշումը հրապարակելու մեջ ևս  Միսակ Մարտիրոսյանը անթաքույց միտում տեսավ՝ կոնկրետ իր անձի հանդեպ:

Ըստ նրա, ապաշնորհ սցենարիստի կողմից գրված ու վատ դերասանների կողմից խաղացված նախօրոք մշակված սցենարի մաս էր հարյուրավոր դատական կարգադրիչներին հարց ուղղելը, թե աշխատանքի ընդունվելիս կաշառք տվե՞լ են, թե՞ ոչ, ինչն արդյունք չտվեց:  Դրան հետևեցին ոչ պատականորեն ոստիկանությունում հայտնված երեք անձանց հայտարարությունները Միսակ Մարտիրոսյանին կաշառք տալու մասին:  Ամբաստանյալը ծաղկաքաղ կատարեց դատաքննության ժամանակ  արած իր հայտարարություններից ու ցուցմունքներից՝ ոստիկանությունում ցուցմունքներ տված անձանց ապօրինաբար ազատությունից զրկելու ու հոգեբանական ճնշում գործադրելով ցուցմունքներ կորզելու, քննիչների կողմից ցուցմունքներում, մասնավորապես, էջերը համարակալելիս,  կեղծիքներ կատարելու մասին, և այլն:

Միսակ Մարտիրոսյանը հայտարարեց, որ իր նկատմամբ խախտվել է արդար դատաքննության իրավունքը, ինքը զրկված է եղել իր դեմ ցուցմունք տված Արմեն Մովսիսյանին հարցաքննելու իրավունքից:  Միսակ Մարտիրոսյանն իր ճառի հրապարակումը կշարունակի արդեն հաջորդ դատական նիստում:

Հիշեցնենք, որ մեղադրող  Հակոբ Մելքոնյանն իր ճառում միջնորդել էր  Դատական դեպարտամենտի նախկին ղեկավար Միսակ Մարտիրոսյանին  դատապարտել 14  տարվա ազատազրկման՝  գույքի բռնագրավմամբ, որը չպետք է գերազանցի հանցագործությամբ պատճառված վնասի չափը:

Միաժամանակ մեղադրողը միջնորդել էր Մ.Մարտիրոսյանին զրկել որոշակի պաշտոններ զբաղեցնելու իրավունքից՝ երեք տարի ժամկետով:

Մեղադրողը պնդել էր  Միսակ  Մարտիրոսյանին առաջադրված մեղադրանքը`  ՀՀ քրեական օրենսգրքի 179-րդ  հոդվածի  3-րդ մասի  1-ին և 2-րդ կետերով՝ կազմակերպված խմբի կողմից առանձնապես խոշոր չափերով յուրացնելը, 311-րդ  հոդվածի 3-րդ մասի 2-րդ և 3-րդ կետերով՝ մի խումբ անձանց կողմից նախնական համաձայնությամբ խոշոր չափերով կաշառք ստանալը՝ երկու դրվագով,   և 311-րդ հոդվածի 1-ին մասով՝ կաշառք ստանալը: