Փաստ ինֆո

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում այսօր շարունակվեց զինծառայող Մանուչար Մանուչարյանին ինքնասպանության հասցնելու գործի քննությունը:

Դասակի հրամանատար, կապիտան, գործով   վկա Վահե Մուրադյանը, ով դեպքի ժամանակ՝ 2013թ. հուլիսի 31-ին, ծառայել է տվյալ զորամասում, իսկ ներկայումս ծառայում է մեկ այլ զորամասում, դժվարացավ անգամ հայտնել, թե որոնք են իր պարտականությունները: Վկան հայտնեց, որ դեպքի օրն առավոտյան կամ ժամը 06.45-ին կամ 07.45 զորամասում տեսել է շարքային  Մանուչար Մանուչարյանին: Մասնավորապես, ըստ վկայի, ինքը տուժողին  հանդիպել է սպայական սենյակից դուրս գալու պահին և իր այն հարցին, թե ի՞նչ է անում այդտեղ՝   զինծառայողը պատասխանել էր, որ զուգարանի թուղթ է ուզում վերցնել, ապա թուղթը վերցրել է ու գնացել:

Վկայի նախաքննական ու դատաքննական ցուցմունքներում  առկա էին  մի շարք հակասություններ: Այսպես՝    դատարանում նա հերքեց, որ դեպքի օրն առավոտյան Մանուչարը իրենից հեռախոս է խնդրել զանգելու համար, մինչդեռ  նախաքննության ընթացքում հայտնել էր, որ դեպքի օրն առավոտյան հանդիպել է Մանուչարին, ով սպայական սենյակ- պահեստանոցից  ցանկացել է զուգարանի թուղթ վերցնել, ապա իրենից հեռախոս է խնդրել  զանգահարելու համար և մի քանի րոպե անց վերադարձրել  է հեռախոսը: «Ոչ մեկի չի զանգել, ինձանից հեռախոս չի վերցրել»,- հայտարարեց վկան՝ հավելելով, որ նախաքննական մարմին տված ցուցմունքի ժամանակ սխալվել է այդպես ասելով, քանի որ նախկինում եղել են դեպքեր, երբ  Մանուչարն  իրենից հեռախոս  է խնդրել:

Հակասություն կար նաև, թե ինքն ո՞ւմից է հեռախոսազանգի միջոցով տեղեկացել դեպքի մասին. նախաքննական մարմնին վկան  հայտնել էր, որ սպա Հովսեփյանն է տեղեկացրել, իսկ դատարանում նշեց Սիմոնյան ազգանունը։ Այս հակասության վերաբերյալ էլ վկան հայտարարեց, թե նախաքննության ընթացքում սխալ է ասել։ 

Վկայի դատաքննական և նախաքննական մարմնին տված ցուցմունքներում առկա հակասությունների շարքը շարունակվեց:   Դեպքին նախորդող օրը ամբաստանյալ Բաբկեն Գաբոյանը վկա կապիտանի թույլտվությամբ   մասնակցել է  հորեղբոր որդու հարսանեկան արարողությանը։  Զինծառայողը վերադարձել է կեսգիշերին՝ իր հետ ուտելիք է բերել, հյուրասիրել  կապիտան Վահե Մուրադյանին: Վերջինս միայնակ չի ճաշակել և  իր հրավերով միացել է կապիտան Աբրահամյանը,  շարքային Մանուչարյանին ևս կապիտանը «հաց է տվել»:

Թե  ինչպես էր վերակարգում ընդգրկված  Մանուչար Մանուչարյանը  հայտնվել սպայական սենյակում՝ վկայից այդպես էլ չհաջողվեց կոնկրետ պատասխան ստանալ:

Ամբաստանյալ Արման Ստեփանյանի պաշտպան Նորայր Նորիկյանի հարցին , թե ո՞վ է հաց ուտելուց հետո հավաքել սեղանը, և թե ինչո՞ւ վկան   որպես հրամանատար չի զեկուցել վերադասին, որ պահակային վերակարգում գտնվող շարքայինը գտնվում է սպայական սենյակում և ոչ թե պահակակետում՝ վկան հայտարարեց, որ  չի զեկուցել այդ մասին, սակայն պնդեց, որ սեղանը հավաքել են ինքը և մյուս կապիտանը:

Նախաքննության ընթացքում, ի դեպ, վկան հայտնել էր, որ սեղանը հավաքել են կապիտան Աբրահամյանը և շարքային Մանուչարյանը:

Նախաքննության ու դատաքննության ցուցմունքներում վկան տարբեր կերպ էր բնութագրել Մանուչար Մանուչարյանին.  դատարանում   վկան հայտնեց, որ Մանուչարը նորմալ, աշխույժ, միշտ պարտականությունները կատարող երեխա էր, սակայն նախաքննական մարմնին հայտնել էր հանգիստ զինվոր էր, լսող, խելացի:

Վկան  ամբաստանյալների վերաբերյալ  դրական կարծիք հայտնեց՝ նշելով, որ ամբաստանյալ Արման Ստեփանյանը ծառայության ընթացքում անթերի կատարել է իր պարտականությունները, իսկ գործով մյուս ամբաստանյալը՝ Բաբկեն Գաբոյանը, եղել է այնպիսի զինծառայող, ինչպիսին մյուսները. «հեղինակություն» չի եղել:

Մեղադրողը հրապարակեց վկայի նախաքննական մարմնին տված լրացուցիչ ցուցմունքը, որում վկան հայտնել է, որ Գաբոյանը հեղինակություն է վայելում և ուտելիքներով տոպրակը տվել է Մանուչարյանին, որ բերի սպայական սենյակ և իրեն փոխանցի:

Դատարանում վկան հայտարարեց, որ «հեղինակություն» ասելով ինքն, իբր, նկատի է ունեցել, որ կարգարդրել է Մանուչարին որպես ջոկի նախկին հրամանատար:

Հակասություններ կային նաև  նախաքննական մարմնին տված ցուցմունքների միջև՝  դեպքից 2 օր անց տված ցուցմունքը  այլ էր, քան մոտ 1 ամիս անց տված ցուցմունքը:

Ամբաստանյալ Արման Ստեփանյանի պաշտպան Նորայր Նորիկյանը հայտարարեց, որ եթե կապիտան Վահե Մուրադյանը զեկուցեր, որ շարքայինը պետք է գտնվեր պահակակետում,  ծառայողական պարտականությունները կատարելիս, ոչ թե այլ վայրում, ապա դեպքը չէր լինի:

Պաշտպանը նաև հավելեց, որ վկայի դատաքննական ցուցմունքները պետք է իրավական հետևանքներ առաջացնեն:

Ըստ մեղադրանքի՝ Բաբկեն Գաբոյանը սեփական անձի վարկանիշը բարձրացնելու, համածառայողների շրջանում ենթադրյալ առավելությունը ցույց տալու, գերակայությունն ամրապնդելու նպատակով, կատարել է իր լիազորությունների և իրավունքների սահմաններից դուրս դիտավորյալ գործողություններ:

Երեկոյան «քուն» հրամանից հետո  զորանոցում զինծառայության պարտականությունները կատարելու հետ կապ չունեցող առիթով՝ իր քաղաքացիական շորերը լվանալու պահանջը չկատարելու համար Բ.Գաբոյանի, ինչպես նաև նույն զորամասի ժամկետային զինծառայող, սերժանտ Արման Ստեփանյանի կողմից Մ.Մանուչարյանի նկատմամբ բռնություն է գործադրվել:

Նախաքննական մարմնի գնահատմամբ` Մանուչարը պարբերաբար ենթարկվել է ծեծի, ստորացումների, անձնական արժանապատվությունը նվաստացնող գործողությունների ու ծաղրի, որի հետևանքով նրա մոտ զարգացել է «Սուր դեպրեսիվ հակազդում», որն արտահայտվել է տրամադրության դիսթիմիկ ֆոնով, ընկճվածությամբ, հուսահատվածությամբ, ստեղծված իրավիճակից որպես անելանելի ընկալման զգացողությունով: Արդյունքում՝ վերջինս 31.07.2013թ.՝ ժամը 13:00-ի սահմաններում, իրեն ամրակցված ԱԿՍ-74 տեսակի ինքնաձիգով ենթակզակային շրջանում կրակոց արձակելով գործել է ինքնասպանություն, այսինքն՝ անզգուշությամբ պատճառվել է այլ ծանր հետևանք։