Փաստ ինֆո

Կառավարությունը մտադիր է վաճառել «Հայփոստ» ՓԲԸ-ի իր մասնաբաժինը, որը, միանգամից ասենք, դրա ամբողջական կապիտալն է՝ 100%-ը:

«Հայփոստ»-ը մասնավորեցնելու որոշման նախագիծն արդեն ընդգրկվել է ՀՀ կառավարության վաղվա նիստի օրակարգում: Այդ նախագծով առաջարկվում է ընկերությունն ընդգրկել պետական գույքի մասնավորեցման 2006-2007 թվականների ծրագրի պետական բաժնեմաս ունեցող ընկերությունների ցանկում:

«Ընկերության մասնավորեցումը կնպաստի ՀՀ-ում փոստային կապի ոլորտի զարգացմանը,  հանձինս այդ ոլորտում իրականացվող նոր ներդումների, նոր, ժամանակակից սարքավորումների և տեխնիկայի ներդրման, ֆիզիկական ենթակառուցվածքների վերականգնմանը և արդիականացմանը, ինչպես նաև կիրականացնի սոցիալական ծրագրեր աշխատատողների համար»,- ասված է որոշման նախագծում:

«Հայփոստ»-ը հիմնադրվել է 1994թ.-ի հոկտեմբերի 12-ին: Եղել և մնում է պետական սեփականություն հանդիսացող ընկերություն, չնայած, որ դրա գործառույթներն ու կառավարիչները մի քանի տարին մեկ փոխվել են: 1997թ.-ի ապրիլի 1-ին «Հայփոստ»-ը որպես հատուկ նշանակության պետական ձեռնարկություն հանձնվեց Կապի նախարարության լիազորված պետական մարմնի կառավարմանը: 2006 թ.-ին Կառավարությունը որոշեց պրոֆեսիոնալ կառավարչի ներգրավել և «Հայփոստ»-ը 5 տարի ժամկետով հավատարմագրային կառավարման հանձնեց «Հայփոստ Թրաստ Մենեջմենթ» ՓԲԸ-ին: Հետագայում այս պայմանագիրը 2 անգամ վերանայվեց՝ 2008 և 2012 թ.թ.-ին, և պայմանագրի գործողության ժամկետը երկարացվեց մինչև 2016թ.-ի դեկտեմբերի 1-ը:

Ի դեպ, «Հայփոստ»-ի միակ բաժնետերն այսօր  Հայաստանի Հանրապետությունն է` ի դեմս ՀՀ տրանսպորտի և կապի նախարարության:

Ընկերության կանոնադրական կապիտալը 520 993 000 դրամ Է:

Նելլի Դանիելյան