Փաստ ինֆո

 

Սահմանադրական բարեփոխումների մասնագիտական հանձնաժողովը հունիսի սկզբից մինչև հունիսի 12-ը կկազմակերպի որոշակի բովանդակային քննարկումներ  քաղաքական այն ուժերի հետ, որոնք հայտ և որոշակի  նկատառումներ են ներկայացրել:

 

Այս մասին լրագրողների հետ այսօրվա հանդիպմանը հայտնեց մասնագիտական հանձնաժողովի նախագահ, ՀՀ սահմանադրական դատարանի նախագահ Գագիկ Հարությունյանը՝ նշելով, որ նկատառումներ ներկայացվել են  14 կուսակցությունների կողմից:

 

Հանձնաժողովը պատրաստակամ  է բովանդակային  քննարկում կազմակերպել սահմանդարական բարեփոխումների որևէ հարցի վերաբերյալ, եթե որևէ  կուսակցություն նման ցանկություն հայտնի: 

 

Արդեն իսկ  երկու հանդիպում տեղի է ունեցել  Հայ Յեղափոխական Դաշնակցության  և «Ազգային ինքնորոշում» միավորման ներկայացուցիչների հետ,  քննարկվել է  նրանց առաջադրած հարցադրումների փաթեթը: Պայմանավորվածություն է ձեռք բերվել, որ Սահմանադրության նախագծի առանձին բաժինների վերաբերյալ հանձնաժողովի կողմից արդեն մշակված և առաջին ընթերցմամբ հավանության արժանացած տարբերակների առկայության դեպքում դրանք նույնպես կտրամադրվեն կուսակցություններին ու նրանց նկատառումները դարձյալ կարող են քննարկման առարկա լինել: 

 

Հանդիպում է եղել նաև «Բարգավաճ Հայաստան» կուսակցության ներկայացուցչի հետ՝ կուսակցությունը  վերապահումով է մոտենում  ընդհանրապես գործակցության աշխատանքներին՝  շեշտելով, որ այս փուլում  բովանդակային քննարկման մասնակից կլինեն միայն այն բաժինների վերաբերյալ, որոնք կառավարման համակարգին չեն առնչվում:

 

Իսկ մյուս բաժինների վերաբերյալ՝ մարդու իրավունքներ, դատական իշխանություն և այլն,  պատրաստակամություն են հայտնել մասնակցել բովանդակային քննարկումներին, բայց դեռևս հանձնաժողովն այդ մասին կուսակցությունից պատասխան  չի ստացել: 

 

Այդ քննարկումների  արդյունքներով Հանձնաժողովը կկարողանա  պաշտոնական ինֆորմացիա ներկայացնել Վենետիկի հանձնաժողովի լիագումար նիստին, իսկ Վենետիկի հանձնաժողովի հետ քննարկում կկազմակերպվի  հավանաբար հուլիսի 1-2-ին այն բաժինների վերաբերյալ, որոնք սահմանադրական բարեփոխումների մասնագիտական հանձնաժողովը կկարողանա նախապես ներկայացնել: 

 

Քաղաքական  կուսակցությունների հետ քննարկումների գործընթաց սկսելու առաջարկ ժամանակին  արել էր  ՀՀ նախագահ Սերժ Սարգսյանը, ով կարևոր էր   համարել, որ Հանձնաժողովը  ոչ միայն  կարողանա  գտնել անվտանգության ու  կայունության ապահովման երաշխիքներ, այլ նաև  սկսել որոշակի գործընթաց քաղաքական կուսակցությունների քննարկումներ կազմակերպելու առումով:

 

«Մենք ունենք լուծելու բավականին բարդ խնդիր,  ինչպիսին առաջադրել է հանրապետության նախագահը Հայեցակարգին հավանություն տալու ժամանակ,  համաձայնելով ժողովրդավարական զարգացումների ուղղվածությունը պաշտպանել և դա համարելով  շատ կարևոր, միայն այն մտահոգությամբ, որ գտնվեն լուծումներ ներքին և արտաքին անվտանգության և կառավարման   կայունության երաշխիքների ապահովման  հարցում»,- ընդգծեց Գագիկ Հարությունյանը՝  հիշեցնելով, որ հանձնաժողովը  գտել է, որ երկրի քաղաքական ուժերի միջև անհրաժեշտ քաղաքական փոխհամաձայնության պարագայում  խնդիրների համարժեք լուծումներ կարող են  գտնվել կառավարման խորհրդարանական համակարգի ներդրման պայմաններում, ինչն առավելապես քաղաքական ընտրության խնդիր է: